¹ Yesu akarishoka kurwa mwisengero akaghya shyaye. Abhanabhegha bhaye bhakamughyako kumorokya amahaghasho agha risengero, ² Naho akabhahonshokerya no okobhatebhya igha, "Bhono, temokomaha amang'ana ghano ghonswe? Mbohene nkobhatebhya, tereho reghene reno reresgha ku ryende ritighe kwatibhwahe."

³ Nahano yaikaye ko kekereghe ikya mizeituni, abhana bhegha bhaye bhakamotebhya kukibhisire igha, "Totebhi amang'ana ghano ndohe gharebha? Nkentoke kerebha ikyorokeryo ikyu kusha kwaho niikihiko iki kyaro?"

⁴ Yesu akabhahonshokerya no okobhatebhya, "Mwangare ghweki atakasha kobhaho omonto ono arebhasirya. ⁵ Kobhora mbaru bharisha kohetera irina ryane. Mbhareghamba, 'Oni noni Kristo', mbarisirya bharu. ⁶ Murighwa amahe nu ubhwitani momahe motakasha kohaha, kobhora amang'ana ghano ngarebhaho; niikihiko urinyora ketarabha. ⁷ Ku igho ikyaro nkeremokera ikyaro kyende, no obhokama mbhoreemokerana. Inshara nerebhaho niibhirighiti bhyaru ibhi ikyaro ntahana nsharu. ⁸ Naho amang'ana ghonswe ngarebha kyo obhosongo ubhwo kwebhora.

⁹ Nho bharebhaemerera kobhanyankya no kobhaita. Morerererwa nabhairo bhonswe kughirya iya irina ryane. ¹⁰ Nho abharu bharitema no okonyankyana no okokorana shiniko' ¹¹ Abharoti abharongo mbarisha kobharongohera. ¹² Kobhuyo obhosarya mburyengerya, obhohanshe ko bharu mburisuha, ¹³ Naho ono areghomerya ghonswe ghayo, naritunguribhwa. ¹⁴ Eng'ana eno iyo obhonene neretebheribhwa ku kyaro kyonswe kubhuhiku kyu ubhushuti ubhwa abhairo abhi ibhyaro bhyonswe. Nho ikihiko Kerehekera, ¹⁵ Ku igho, hano moremaha ubhutindi ubhwo obhosarya, rera ryaghambirwe no omoroti Danieli ririemera ahase ahahoreru ono akosoma ghweki amanyeri, ¹⁶ Nho bhano bharenge Yuda bhakenyere mokekereghe. ¹⁷ Naora urinyora arenge korosara naretamwa kwika koghegha kyokyonswe kera ukurwa muighutu. ¹⁸ Wonswe ono arinyora arenge momoghondo tarekyora koghegha ingibho yaye. ¹⁹ No mohoko ghwabho abhashenda nabhano bhakoghonkya ku shinsiko shiyo! ²⁰ Mosabhe igha motakasha kokenya enkagha iye embeho, nunyora ndusiko urwu kumunya. ²¹ Kobhora nerebhaho inyanko enene, eno etakabhayeho kurwa bhotonge ubhwi ikyaro kohekera bhono, ghweki terebhahohe. ²² Nyore shinsiko shiyo shekeng'ehibhwi, taho ono akatunguribhwihe. Bhono nkobhora abhahorwa, shinsiko shiyo nshirieng'ehibhwa.

²³ Hano urinyora omonto wowonswe arebhatebhya 'Maha, Kristo nhano are! Hamwe, 'Kristo nera are' motakaitabherya amang'ana ghayo. ²⁴ Kobhora Amaitabherya agho obhorongo naabharoti abharongo mbarisha nu ukorokya ebherengyo ne ebheroghoryo ebhenene, kukughirya ukusirya hano ekatorekaini ko bhahorwa. ²⁵ Momahe, mwikabhahe amang'ana ghayo ghatarabha kororwa. ²⁶ Ku igho, hano bharebhatebhya, "Kristo arenge mokekongo,' motakaghya mokekongo iyo. Hamwe, 'Momahe, arenge mwighutu, 'motakaitabherya amang'ana ghayo. ²⁷ Kya igho oromesyo rokamereka kurwa roghoro ubhorabhu kughya nyansha, nigho erebha kukusha ko Omona uwa Adamu. ²⁸ Hohonswe hara eketondo kere, nho amatonyi ghakwirigha righa.

²⁹ Naho hano inyanko (ya) shinsiko shiyo erehwa, iryobha ndiririma, umweri teghorebharahe, ibhinyonyoni bhereghwa kurwa kwisaro, nashinguru ishya kwisaro shirisingisa. ³⁰ Nho ikyorokeryo ikyo Omona uwa Adamu kiriorokibhwa kwisaro, nashehamate shyonswe ishya kukyaro shiriarama. Mbaremaha Omona uwa Adamu arasha kurwa mwisaro kushinguru no obhohoreru obhonene. ³¹ Narebhatoma abharaghe bhaye ko obhoraka obhonene ubhwa enkobhyo, mbarebhakomania abhahorwa bhaye kurwa shentahana shonswe inye ishi ikyaro, kurwa ikihiko kemwe ikya risorokohekera ikyende.

³² Mweghe riyo kurwa ko omote ughwo umtini hano risagharya ryasebhoka nu ukurusya amato, momanye igha emaho nhang'ere. ³³ Ku igho, hano morerora ghayo ghonswe momanye igha ahikire hang'e mokeseku. ³⁴ Nehene nkobhatebhya igha, rekora reno tererehetahe, kohekera amang'ana ghonswe ghano gharorwe. ³⁵ Risaro niibhyaro mbereheta, nawe amang'ana ghane tegharehetahe.

³⁶ Naho ko nkagha iyo taho omonto ayemanyirehe nunyora nabharaghe abha mwisaro, nokanyora Omona, n Tata umwene kere. ³⁷ Kigho yabhaye kushinsiko ishya Nuhu, nigho erebha kukusha oko Omona uwa Adamu. ³⁸ Kokobha ku shinsiko shiyo hano egharika etarare erahika abhanto mbaryanga nu ukunywa mbatetire no okotetwa kohekera urusiko rora Nuhu yasohire Mosafina, ³⁹ tebhamanyire kyokyonswe kohekera hano bhashorwe bhonswe - nigho erebha ukusha oko Omona uwa Adamu. ⁴⁰ Nho abhabhere bhano bharebha momoghondo- uwomwe aregheghwa, no uwomwe asaghe. ⁴¹ Nho abhanto bhabhere bhano urinyora bharasya hamwe - uwomwe naregheghwa no uwomwe asaghe. ⁴² Ku igho mobhe maiso kobhora temomanyire urusiko rono arisha Omokama wenyu. ⁴³ Ghweki momanye igha, hano omonene mwene ighutu akamanyire ne nkagha ke eno umwibhi akaishire, nakaikaye ararenda, takaikereyi righutu ryaye resoherwe nu umwibhi. ⁴⁴ Ku igho, bhonswe mobhe maiso, ko Omona uwa Adamu narisha enkagha eno motaremanya.

⁴⁵ Bhono nawe arenge omohoreru, omoghorwa mwene bhongo, ono omona waye amohaye shinguru ighoro (ya) bhara bharenge mwighutu ryaye, okoreke abhahe ibhyakorya ko nkagha inshiya? ⁴⁶ Naitabhereyi omobhaghati uyo, ono omonene waye aranyore arakora igho enkagha eno ikusha. ⁴⁷ Nehene ndabhatebhya igho omonene naratore ighoro ye kera ekento kera kerenge ikyaye. ⁴⁸ Naho nyore omoghorwa omoghogho araghambe monkoro yaye, 'Omonene wane yateghetire,' ⁴⁹ ghweki akasimya kotema abhabhaghati bhaye, naakarya nu ukunywa, ⁵⁰ Omokama omoghorwa uyo arashe kushinsiko sheno shetakomanywa, ne enkagha eno atamanyire. ⁵¹ Omokama waye naramobhotore matene matene no okomotora ku mweya ghomwe koreng'ana (na) abhabhisa, bhano kerebha ekero no okotakunya amaino.