¹ Ho yamare Yesu akashumansha nabhanabhegha bhaye. Akaghamba, ² "Abhakonikoni (na) Mafarisayo bhaikareye ikitumbe kya Musa. ³ Ku gho kera bhakobhahama mokore, mokore eno morabhaiteghera. Nawe motakasha kobhegha, ghano bhakokora, kobhora bho nkwighambera bhare ghara bhatakokora. ⁴ Mbohene, bho nkobhoha bhare emeseyi gheno bhatakotora kwitika, ghweki bharatora abhande komareko ghabho. Naho abhene tebhakotora koghegheghahe. ⁵ Amakoro ghabho ghonswe nkoghakora bhare okoreke bhamahwe nabhanto. Kobhora nkogharehya bhare amasandeko ghabho no okogharehya ororebhebhe urwu imienda ghyabho. ⁶ Abhene bhahanshire kwikaraahaiya ku nyangi niibhitumbe ibhya esoko momasengero, ⁷ no okokeribhwa kosoko mometera, no okobherekerwa "Umweghya" nabhanto. ⁸ Naho bhenyu temokobherekerwa "Abheghya," Nkokobha mona Umweghya omwe, nabhenyu bhonswe mbamwe more. ⁹ Motakabherekera omonto wowonswe mukyaro mono abhe suwenyu, kokobha mona Tata omwe umwene, nawe arenge kwisaro. ¹⁰ Ghweki motakasha kobherekera 'umweghya,' kobhora mona Umweghya omwe umwene, Kristo. ¹¹ Nigho ono arenge omonene ko bhenyu we arebha omobhaghati wenyu. ¹² Ono wonswe akwikumya narikibhwa. Naora akwiyikya narikumibhwa.

¹³ Mohoko ghwenyu abhakonikoni na Mafarisayo, abhaniko! Morasekera abhanto obhokama ubhwa mwisaro. Nunyora mbenyu temosohehe, na temorebhaitabheerya bhaara bhakosoha kokora igho he. ¹⁴ Mohoko ghwenyu abhakonikoni na Mafarisayo abhaniko! Kokobha mukutubha abhasino.

¹⁵ Mohoko ghwenyu Abhakonikoni na Mafarisayo, abhaniko! Moramboka inyansha no ukuhika kokora omonto omwe aitabheeri ghaara mukweghya, nahano yabha kya bhenyu, moramokora abhe kabhere yo omoona mobhehwe ebheghogho khigho more.

¹⁶ Mohoko ghwenyu abhatangati abhahukuru, bhano mokoghamba, Ono wonswe akutyanera mwisengero, tekentohe. Nawe ono akutyana kokeghera ikya risengero, aibhohire umwene. ¹⁷ Bhenyu abhahukuru abhakangi, nkehe ekenene kokera ikyende, ekeghera hamwe risengero reno ritabheribhwi ku Waryobha? ¹⁸ Ghweki wowonswe ono akutyana ko hano bhakoghambera eng'ana tekentohe. Nko ora akutyana ku umutuho ghono ghorenge ighoro yaye nabhohirwe nu ukutyana kwaye. ¹⁹ Bhenyu abhahukuru, nkehe ekenene kokera ikyende umutuho hamwe ahase ahu ukurusirya eng'ana hano hana ekeghera keno kikurwa ko Waryobha? ²⁰ Ku igho, umwene ono akutyanera hara akurusirya eng'ana nkutyanerare kuriyo nakobhento bhyonswe bhano bharenge ighoro yaye. ²¹ Naora akutyana mwisengero, nkutyanare kuriyo nakoora aikaye monse yaye. ²² Naora akutyanera risaro, nkutyanerare ikitumbe ikyo obhohoru ikya Waryobha (na) aikayeko ighoro.

²³ Mohoko ghwenyu abhakonikoni (na) Mafarisayo, abhaniko! Kobhora morahaka umutuho ko bizali, no umuchicha no omonanaa, naho moratigha amang'anaamarito agho umwahokano- obhohene, obhohanshe, nu umughiro. Nigha mobhe moraghakora, te kukutigha aghande motakoghakora. ²⁴ Bhenyu abhatangati abhahukuru, bhenyu bhano mokokenena ekekonde ekeke eno moramera engamia!

²⁵ Mohoko ghwenyu, abhakonikoni (na) Mafarisayo, abhaniko! Kobhora moroghya ighoro ye ebhekombe naighoro iya shesahani monse haishoye esako eno etana ekerengere. ²⁶ Bhenyu Mafarisayo abhahukuru, moghi mokekombe namosahani, okoreke orobhareka urwa kebhara ronswe rorabhe.

²⁷ Mohoko ghwenyu abhakonikoni (na) Mafarisaayo, abhaniko! Kobhora mutubhaini nashembehera shera shehakirwe eng'enyi, eno kebhara eramahekana ni nshiya, naho monse shishoye amaghuhaagha bhano bhakwa ne kera ekento nkinyanku. ²⁸ Bhuyo bhyuyo, bhenyu bhonswe keghoro mororokya mbahene more naho monse mbaniko nabhasarya.

²⁹ Mohoko ghwenyu. Abhakonikoni (na) Mafarisayo, abhaniko! Kobhora morahaghasha shembehera ishya abharoti no okong'arya shembehera ishya abhahene. ³⁰ Bhenyu moraghamba, nyore shinsiko kishya bhatata bheto, tetokasangire nabho kwita abharotihe. ³¹ Ku igho nkwiyorokya more abhene igha bhenyu nabhana abha bhano bhaitireabharoti. ³² Ghweki bhenyu murishorerya kuishirya ibhitimba ibhya bhasuwenyu. ³³ Ninshoka more abhana abha shinshoka nighake morikengerwa ikina ikya mobhehwe ebheghogho? ³⁴ Ku igho, maha, ndabharetea abharoti nabhanto abhe esoko, nabhakonikoni. Abhamwe bhabho morabhaite no okobhanyankya. Nabhamwe morabhashaturi ebhesamore momasengero ghenyu no okobhakenya kurwa mumighi ghenyu. ³⁵ Keno kerebha murinyora amaihime agha abhahene bhonswe bhano bhaitirwe mukyaro, kurwa amanyinga agha Habili omohene kuhika ko manyinga agha Zakaria omona uwa Barakia, ono mwiteye ghate iya abhahoreru (na) ahase aho okotebherya eng'ana. ³⁶ Mbohene, nkobhatebhya amang'ana ghano ghonswe ngaranyore rekora reno.

³⁷ Yerusalemu, Yerusalemu, uwe ono ukwita abharoti no okobhatema namaghena bhara bharetwa kobhenyu, nkarenga nkokomania abhana bhaho hamwe kya hano engoko yakoma nia ibhishushu momabhabha ghayo, naho tuwitabhereyi! ³⁸ Maha, righutu ryaho rena obhosorombaru. ³⁹ Naoni ndakotebhya, kukurwa bhono tokendorahe, kohekera hano oreghamba, 'Yitabheribhwa ora akusha ku rina iryo Omokama.'"