¹ Yesu akaghamba nabho kobherengyo, araghamba, ² "Obhonene ubhwa mwisaro mbutubhaini no omonene ono yasareniri ubhwenga ubhwa omona waye. ³ Akatoma abhabhaghati bhaye kokomania abhanto bhano bharenge bhararekirwe kusha ku inyangi iyu ubhwenga nabho tebhaishirehe. ⁴ Omonene akatoma abhabhaghati bhande akaghamba. "Mobhatebhi bhonswe bhano bhararekirwe, Momahe, nsereniri ibhyakorya. Entang'ana namakohe ghane ghaghoghirwe, nakera eng'ana ebhaye, Mushe munyangi iyu ubhwenga." ⁵ Abhanto tebhaitabhereyi bhuyaheokorarekwa kwaye. Abhamwe bhakaghya momeghondo ghyabho, abhande bhakaghya kushurushya. ⁶ Abhande bhakabhasha abhabhaghati abho omonene bhakabhanyankya no okobhaita. ⁷ Naho omonene yarereye. Akatoma abhasirikare bhaye akaita abhaiti bhaye nu ukusikya umughi ghwabho no omoro. ⁸ Akamara akatebhya abhabhaghati bhaye, "Ubhwenga bhobhaye, naho bhano bhararekirwe tebhobharehe. ⁹ Kuigho mughi momahokano agha rikori rinene morareke abhanto abharu kokeryaho bhashe ku inyangi iyu ubhwenga." ¹⁰ Abhabhaghati bhakaghya momahokanya agha shenshera no okorareka abhanto bhonswe bhano bhasikaini abhaiya nunyora mbaghogho. Ribhuru iryo ubhwenga rekeshora abhagheni. ¹¹ Naho omonene yasohire komaha abhagheni, akamaha omonto uwomwe ono ataibhohire ingibho iyu ubhwenga! ¹² Omonene akamobhorya, 'Mosani nighake wahikire hano otana inghibho iyu ubhwenga?' Omonto uyo teyahonshokiri kentohe. ¹³ Nho omonene yatebhiri abhabhaghati bhaye, "Mobhohe omonto ono amabhoko namaghoro momorekere kebhara mukisunte, eno arikura no okotakunya amaino. ¹⁴ Kobhora abhanto abharu bharebherekerwa, naho abhahorwa mbake."

¹⁵ Nho Mafarisayo bharureho no okorya iniko iyo koghota Yesu komangana ghaye umwene. ¹⁶ Nho bhatomire abhanabhegha bhabho (na) Maherode. Bhakatebhya Yesu, "Umweghya, ntomanyire uwe monto wabhohene ore, ghweki oreghya agha Waryobha kobhohene. Tukwitabherya amaiteghero agho monto wonde tukorokya kwibhaghera he. ¹⁷ Ku igho totebhi, nke ukwiteghera? Bhono mbuya kohaka righoti ko Kaisari hamwe tighohe?"

¹⁸ Yesu yabhamanyire obhoghogho bhwabho no okoghamba, "Nkwake mokonsakya, bhare bhaniko? ¹⁹ Munyoroki imbirya eno ekohaka righoti." Nho bhamoreteye shimbirya. ²⁰ Yesu akabhabhorya, "Ekesosa nirina reno mbhya wawe?"

²¹ Bhakamohonshokerya, "Ndya Kaisari." Nho Yesu yabhatebhiri, "Mohane Kaisari ibhyaye ibhya Waryobha mohane Waryobha." ²² Hana bhaighure ighobhakaroghora. Bhakamara bhakamutigha bhakaghya.

²³ Urusiko ruyo abhamwe abha Masadukayo bhakasha ko Yesu, bhara bhakoghamba abhaku tebhakaryokibhwahe. Bhakamobhorya, ²⁴ bharaghamba, "Umweghya, Musa yaghambire, hano omonto arakwe atarebhora abhana, wamwabho aghabhe omokari uyo amwibhori omona abhe emberekerwa iya wamwabho. ²⁵ Bharengeho abhamwe muhungate. Omotangi akateta akakwa ataibhoye omona. Akateghera wamwabho omokari. ²⁶ Wamwabho uwa kabhere wonswe akakora ighoigho, nu wakatato wonswe akabha ighoigho kohekera uwa muhungate. ²⁷ Hano ghabhaye igho ko bhonswe, Omokari ora wonswe akakwa. ²⁸ Bhono kokoryokibhwa omokari uyo arebha moka we ko bhonswe abhamwe bhara muhungate? Kobhora bhonswe mbamotetire."

²⁹ Naho Yesu yabhahonshokeyi no okobhatebhya, "Morasarya, kobhora temomanyire amakonikoni nunyora shinguru ishya Waryobha. ³⁰ Kobhora mubhuryokibhwa abhanto tebhakoteta nunyora nkotetwa. Abhanto nkobha bhare bhonswe kya abharaghe mwisaro. ³¹ Naho ko abhanto kuryokibhwa, temorasoma amakonikoni kera Waryobha yaghambire ko bhenyu, akaghamba, ³² Noni Waryobha uwa Ibhrahimu, Waryobha uwa Isaka, (na) Waryobha uwa Yakobo? Waryobha te Waryobha uwa abhaku, Waryobha uwa bhara bhakoheshera."

³³ Enkagha bhara bharenge bhaekomaini hano bhighure reno, mbaroghore ameghyo ghaye.

³⁴ Naho Mafarisayo hano bhaighure igha Yesu akiri Amasadukayo, mbaikomaini abhene hamwe. ³⁵ Uwomwe wabho, mwahokania, akamobhorya kokomosakya. ³⁶ "Umweghya, nehamo ke eno erenge enene kokera omwahokanyo?"

³⁷ Yesu akamohonshokerya, "Nkehameryo ohanshe Omokama ko nkoro yaho yonswe, nakomaiteghero ghaho ghonswe. ³⁸ Eno yo ehamo enene nayo entangi. ³⁹ Iya kabhere nitubhaini naiyo- Mukumo ohanshe nyarobheri waho kigho wihanshire umwene. ⁴⁰ Imyahokano ghyonswe (na) Abharoti ngiteng'eye shehamo ibhere sheno."

⁴¹ Mafarisayo hano bharenge bhikomaniri hamwe, Yesu akabhabhorya. ⁴² Araghamba, "Bhono! Nke mukwiteghera ighoro (ya) Kristo? Umwene Mmona wawe?' Nabho bhakamohonshokerya, "mmona uwa Daudi."

⁴³ Yesu akabhahonshokerya, "Nkwake Daudi mo nkoro aramobherekera Omokama, araghamba, ⁴⁴ 'Omokama akatebhya Omokama wane, "Ikara okobhoko kwane ukwa bhoryo, kohekera hanondekora abhabhisa bhaho bhatorwe momaghoro ghaho."'?" ⁴⁵ Nyore Daudi aramobherekera Kristo "Omokama," nighake arabhe omona waye?" ⁴⁶ Taho ono yamohonshokeyi he, taho ono yakarehire komobhoryahe kurwa ruyo no kokoghenderya.