¹ Yesu nabhana bhegha bhaye bhakaghya bhakahika hang'e (na) Yerusalemu kuhika Bethfage, ko kekereghe ikya mizeituni, ho Yesu yatomire abhanabhegha bhabhere, ² akabhatebhya, "Moghende mukishishi ikyende kiyo mmorasikane niitikere ebhohirwe hayo, ne ekemori kyaye. Moghatanshore mondetere. ³ Omonto ono arabhabhori ku riyo, moghambe 'Omokama araghatuna, no omonto uyo narabhaitabheri mushe nawe" ⁴ Eng'ana eno yabhaye igho nera yaghambirwe nabharoti ebhe niikihiko. Akabhatebhya, ⁵ Motebhi abhahara abha Sayuni, maha, omonene wabho arisha wenyu, umwitughami nurinyora yikaye kutikere, ekemori ikitikere, omona witikere.

⁶ Nho abhanabhegha bhaimokire kughya kokora kokora kigho Yesu yabharaghereyi. ⁷ Bhakareta itikere ne ekemori kyaye, bhakakibhisya imyenda ghyabho, (na) Yesu akaikarako. ⁸ Bhara bharenge hara mbari shingibho shyabho hanse konshera, abhande bhakabhotora amato aghe emete bhakaghyarya komohanda. ⁹ Abhanto abharu bhakamosorana Yesu bhara kora ikituri no okoghamba igha, "Umwitabheribhwa omona uwa Daudi! No umwitabheribhwa ono akusha ku rina iryo Omokama umwitabheribhwa ighoro bhokong'u!"

¹⁰ Hano Yesu yahikire Yerusalemu, umughi ghonswe mbaitakeri no okoghamba, "Ono newe?"

¹¹ "Aabhanto abharu bhakahonshokya, "Ono Yesu Omoroti, ararwa Nazareti iya Galilaya."

¹² Ghweki Yesu akasoha mwisengero irya Waryobha. Akakenya bhonswe bhano bhaghoranga no okoghorya mwisengero. Akamara akaghwesya shemensha shya bhano bhaswenianga shimbirya niibhitumbe ibhya abhaghorya abha shinguti. ¹³ Akabhatebhya, "Yakonirwe, 'Righutu ryane nderebherekerwa righutu irya amasabho, 'naho bhenyu morekore risana irya abhasaki."

¹⁴ Ghweki abhahukuru (na) abhabheru bhakamughyako mwisengero, akabhahwenia.

¹⁵ Naho enkagha abhaimereri nabhakonikoni abha risengero hano bharoshe ghano yakore, nahano bhaighure abhana bharashaghana mwisengero bharaghamba, "Yaitabheribhwa Omona uwa Daudi," bhakarera.

¹⁶ Bhakamotebhya, "Wighure kera kekoghambwa nabhanto?" Yesu akabhatebhya, "Nighure! Naho temwakasomire, 'Kurwa muminywa ighya abhana nunyora mbara bhakoghonka?"

¹⁷ Ghweki Yesu akabhatigha akaghya Bthania no okorara iyo.

¹⁸ Kunkyo hano yakyoranga mumughi, yarenge asengeye. ¹⁹ Akarora umtini mbareka yo omohanda. Akaghyaho, nawe teyanyoreko kentohe mmato aghene gharengeko. Akaghotebhya, "Otakama shehagho ghweki." Hayo hayo umutini ghuyo ghokoma.

²⁰ Abhana bhegha hano bharoshe igho, bhakaroghora no okoghamba, "Niyake ebhaye umtini ghono ghomire kamwe igho?"

²¹ Yesu akahonshokya no okoghamba, "Nehene nkobhatebhya, nyore hano morabhe nu umughiro motana ehaho, temorekora kya kya kiyo kekorwe ku umutini ghuyo, naho mmoratebhi ekekereghe kiyo, kegheghwe no okorekerwa munyansha, naekoreke. ²² Kyokyonswe keno morasabhe kokosama, eno moraitabherya, moranyore."

²³ Yesu Yesu hano yahikire mwisengero, abhaimereri bha risengero nabhaghaka bhakamushako hano yaghyanga no okomobhorya, "Nkoshinguruke okokora amang'ana ghano? Newe yakoha shinguru sheno?"

²⁴ Yesu akahonshokya no okobhatebhya, "Oni wonswe nendabhabhori iswari imwe. Nyore morantebhi, oni wonswe nendabhatebhi nku shinguruke nkokora ghano. ²⁵ Ubhusubhwa ubhwa Yohana- he bhwarwa, mwisaro kose ko bhairo?" Bhakabhoriana abhene, bharaghamba toraghamba, bhwarure mwisaro, naratotebhi, nkwake motamwitabhereyi? ²⁶ Naho toraghamba, bhwarure mobhairo, 'torobhoha ehamate, kobhora bhonswe nkomaha bhare Yohana kyo omoroti." ²⁷ Ghweki bhakahonshokerya Yesu kokomotebhya, "Tetomanyirehe" Akabhatebhya ghweki, "Nunyuora noni tendebhatebhyahe nkwa nguruke nkokora amang'ana ghano.

²⁸ Bhono nke mukwiteghera? Omonto ono ana abhana bhabhere. Akaghya ku womwe no okomotebhya, 'Omona wane, kaghi okore emeremo momoghondo ughwi emizabibu ²⁹ rero Omona akahonshokya no okoghamba, 'tengihe, 'Naho yamare akasyorya amaiteghero ghaye akaghya.

³⁰ Omonto ora akaghya ko omona uwa kabhere no okoghamba ekento kerakera. Omona ono akahonshokya no okoghamba, 'nitakwenda, omokama', nawe tiyagheyehe. ³¹ Nohe ko abhana abhabhere bhayo ono yakore ghano suwabho yatunire? Bhakaghamba, "Omona omotangi." Yesu akabhatebhya, "Nehene nkobhatebhya, abhakomania abha righoti nabhasorare bharesoha ko obhokama ubhwa Waryobha bhenyu motarasoha. ³² Kobhora Yohana yaishire kobhenyu ne enshera endonge, nawe temwamwitabhereyihe, enkagha abhakomanya abha righutu nabhasorare mbamwitabhereyi. Nabhenyu, hano mwaroshe riyo rerakorwa, temwasabhire mabhehe no okosasamahe.

³³ Mwiteghere ekerengyo kyende. Yarengeho omonto, ono yarenge ne ekerengere ekenene ikyo omoghondo. Akemya emezabibu, akagheghetera akakora ne ekento ikyo okometera idivai, akahaghasha obhotaro ubhwa abharendi (arakodisha) ko abhanaghya abhe zabibu. Ghweki akaghya ku kyaro kyende. ³⁴ Enkagha iyo okoghesa emezabibu hano yahikire, yatomire abhabhaghati bhaye ko abharemi bhaghi komogheghera shezabibu shyaye. ³⁵ Naho abharemi bhakaghegha abhabhaghati bhaye, bhakatema omwe, bhakaita uwonde okotema uwonde namaghena. ³⁶ Ghweki mwene moghondo ora akatoma abhabhaghati abhande abharu bhokong'u kokera bhara bhatangire, abharemi abhe emezabibu bhakabhakora bhora bhora. ³⁷ Hano ghayo ghahoye mwene moghondo ora akatoma omona waye wabho, araghamba, "Mbarasoke omona wane.'

³⁸ Nawe abharemi abhe emezabibu hano bharoshe omona ora, bhakatebhania, 'Ono mmoghabhi, Mushe, tumwite togheghe obhoghabhi.' ³⁹ 'Bhono bhakamoghegha bhakamorekera kebhara yo omoghondo bhakamwita. ⁴⁰ Bhono mwene moghondo hano arisha, nighake arekora abharemi abhe emezabibu?"

⁴¹ Bhakamotebhya, "Narebhasarya abhanto abhaghogho bhara ko nshera yo obhoro bhokong'u ghweki (arekodisha) omoghondo ghora ko abharemi bhande abhe emezabibu, abhanto bhano bharehaka hano emezabibu gheretobha.

⁴² Yesu akaghamba, "Temwasomore ko amakonikoni, 'Reghena reno abhahaghashi bhangire ndyo ryaghomiri obhorosa. Reno ndyarure ko Omokama, nkotoroghoryere?'

⁴³ Bhono ndabhatebhya, Obhonene bhwa Waryobha murirusibhwa bhahanwe ikyaro keno kekomanya shehagho shyaye. ⁴⁴ Ono wonswe ono areghwa kweghene riyo naribhunwa bhunwa bhetene bhetene. Naho ono wonswe ririghwera, nderemosya."

⁴⁵ Nko abhaimereri abha risengero (na) mafarisayo hano bhaighure ebherengyo bhyaye, bhakarora mbo akoghambera. ⁴⁶ Nahano bhatunanga koghorokya amabhoko, mbobhohire abhanto bhara, kobhora abhanto mbamobhohire igha moroti.