¹ Nigha obhokama ubhwa koryobha mbhutubhaini no omwene moghondo, yamutire kwemoka kutwenya abhanto bhamokore emeremo momoghondo ughwa emezabibu. ² Hano yaikeraini nabho abhahake imbirya emwe ku urusiko akabhatoma kubhya komoghondo ghwaye ughwi emezabibu. ³ Akakyorayo ghweki hano shahetire shesa isato akanyora abharemi bhande bhaimereye bhatana emeremo momotera. ⁴ Akabhatebhya, "bhenyu bhonse mubhi momoghondo ughwa emezabibu, kyokyonswe ikyo obhoronge ndabhahana.' Kuigho bhakaghya kokora emeremo. ⁵ Akamara akakyorayo konkagha iya kasansabha naiya kenda akakora igho igho. ⁶ Enkagha iya shesa ikomi naemwe, akaghya akanyora abhande bhaimereye bhatana meremo, akabhatebhya, "nkwake mwimereye hano motana omoremo ghoghonswe urusiko urughima?

⁷ Bhakamotebhya, nkobhora titunyore moremohe. Akabhatebhya, 'Bhenyu bhonse moghende momoghondo ughwe mezabibu.'

⁸ Enkagha iyo omoghorobha hano yahikire mwene moghondo akatebhya umwimereri, bherekera abharemi bhonswe obhahake, usimiri bhano bhamarereyi kughya ohekere kobhara bhatangatire.' ⁹ Hano bhaishire bhano bhahaywe emeremo komoghorobha, kera uwomwe wabho akanyora ehera emwe. ¹⁰ Hano bhaishire abhakori bhe meremo bhanobhasimiri, mbhakanyire igha mbharahanwe nsharu, Naho bhonse mbhanyore ehera emwe emwe kera monto. ¹¹ Hao bhamare koghegha ehera yabho bhakamwekora mwene moghondo ora.

¹² Bhakaghamba, "abhakori bhe emeremo bhano bharure nyuma mbakore ko esa emwe iyene, naho otoreng'aini bhonse, bheto ntokore urusiko urughima komobhaso."

¹³ Naho mwene moghondo yahonshoye akatebhya uwomwe wabho, mosani tenkore ng'ana ngoghohe, Bhono! Titwikereraini naoni ko ehera emwe? ¹⁴ Ghegha kera kekorengire oghende shaho. Mbhushomerwa bhwane mbhahake bhano bhaishire komoghorobha kerengere kemwe nauwe.

¹⁵ Bhono! Tibhuya kuoni kokera nkutuna kokora kobhento bhyane? H amwe iriso ryaho nisareku kobhora oni mbhuyande? ¹⁶ Kuigho umusiti arekangata no omotangati arebha uwe umusiti."

¹⁷ Hano Yesu yarinanga kughya Yerusalemu, akaghegha abhana bhegha bhaye ikomi nabhabhere mbhareka, nakonshera akabhatebhya, ¹⁸ 'Maha toraghya Yerusalemu, no Omona uwa Daudi naraghotwe nabhaimereri abha Amakuhani nabhakoni koni. Mbharamokengere ikina akwe, ¹⁹ Mbharimurusya kobhairo bhamunyanki, komotandeka nokomosokerya. Naho kurusiko urwa katato nareryoka."

²⁰ Ghweki nyakuwabho abhana abha Zebedayo akasha ku Yesu nabhana bhaye. Akamuhighamera nokomosabha ekento kurwa kumwene. ²¹ Yesu akamotebhya, "Nke ukutuna? Akamotebhya, Hama abhana bhane bhabhere bhano bhaikare, uwomwe bhoryo bhwaho nuwonde bhomosi ubho obhokama bhwaho."

²² Naho Yesu yahonshoye nokoghamba, "Tomanyire kera okosabhahe. Bhono! Oratora kunywera ekekombe keno ndinywera?" B hakamotebhya," Toratora."

²³ Akabhatebhya, "Ekekombe mbhohene murakinywera. Naho ukwikara bhoryo nabhomosi toni nkobhahahe nkobhara bhaserenibhwi [na] Tata wane umwibhori."

²⁴ Abhana bhegha abhande ikomi hano bhaighure igho, bhakaroghoribhwa nabhawamwabho abhabhere bhara. ²⁵ Naho Yesu yabhabherekeye akabhatebhya, "Momanyire igha abhabhahi abhi ikyaro bharebhaha obhotoro obho okwemerera. ²⁶ Nawe etakabha igho kobhenyu. Eno eho ono wonswe arituna kobha omonene mobhenyu mukumo abhe mobhaghati wenyu. ²⁷ Ono aretangata kobha umwimereri wenyu mukumo abhe mobhaghati wenyu. ²⁸ Nkyaigho Omona uwa Adamu tiyaishire kokorwahe, neyaishire kokora, nukurusya obhohoru bhwaye kobha ubhutungurya kobharu."

²⁹ Enkagha bhararwa Yeriko, ehamate enene ekamosorana. ³⁰ Bhakarora abhahukuru bhabhere bhaikaye mbareka yo omohanda. Hano bhaighure igha Yesu araheta, bhakashera bhokong'u bharaghamba, "Omokama Omona uwa Daudi utwabhere." ³¹ Naho abhanto bhara bhakabhakemera, nokobhatebhya mukire, nunyora nigho, abhene bhakashera bhokong'u nokoghamba, "Omokama, Omona uwa Daudi, twabhere."

³² Ghweki Yesu akaemera akabhabherekera nokobhabhorya, "Nke mukutuna mbakore?" ³³ Bhakamotebhya, "Omokama nigha amaiso gheto ghamahe." ³⁴ Nho Yesu, akabha nikyabhera, akakunya amaiso ghabho, enkagha iyo, bhakabha nobhotoro bhokomaha nabhakamosorana.