¹ Hano Yesu yamare ghayo, akemoka kughya Garilaya, ² akaghya morotonga urwa Yudea mobhoronge obho omoro ughwa Yoroda.

³ Amafarisayo bhakamughyako, bhakamosakya, bhakamotebhya, "Bhono mbhuya ko omonto kutigha mokaye kukughirya yoyonswe era?

⁴ Yesu akahonshora nokoghamba, "Temwasomire, igha ora yatangire kobhombhwa nu umushasha kose no omokari? ⁵ Naghweki akaghamba, 'kukughira iyo umushasha naratighe suwabho nanyakuwabho, nokobha namokaye, kubhubhere bhwabho mbharebha mobhere ghomwe? ⁶ Igho tebhabhere ghwekihe, bhono mobhere ghomwe. Bhono, kera keghotanibhwi {na} Waryobha, taho monto wowonse arakyahokanihe."

⁷ Bhakamotebhya, "Bhono nkwake Musa yatohameye kurusya amandeko agha ukutighana nokobhorana?"

⁸ Akabhatebhya, "Ko ukwanga kwitabherya konkoro yenyu Musa akaitabherya mutighe bhakenyu, naho kurwa kare tiyarenge ighohe. ⁹ Ndabhatebhya, igha wowonse ono aritigha mokaye, kukughira iyo obhosorare, nokoteta uwonde, uyo mutwari. Ghweki umushasha aratete omokari ono yatighwa mutwari."

¹⁰ Abhana bhegha bhakatebhya Yesu, "Nyore nigho kumushasha no omokari, tibhuya koteta."

¹¹ Naho Yesu akabhatebhya, "Tekera monto akotora komanya ameghyo ghano, nko bhara bhatakwitabheribhwa kunyora. ¹² Kobhora hobhare bhara bhaibhoywe bhashigharu kurwa moshenda isha bhanyakuwabho. Ghweki hobhare bhano bhakorwa igho nabhanto. Hobhare bhano bhaikora mbashigharu, kukughira iyo obhokama ubhwa koryobha. Ono akotora kunyora ameghyo ghano aghaitabheri."

¹³ Ghweki akareterwa abhana abhake okore abhatore amabhoko naho abhana bhegha bhakabhakanya. ¹⁴ Naho Yesu akaghambha, "Mobhahatere abhana abhake bhonswe bhashe kuoni, motakabhakanya kusha kuoni, kobhora obhokama ubhwa koryobha nubhwa abhanto kyabhayo. ¹⁵ Akabhatora amabhoko.

¹⁶ Maha omonto omwe akasha ku Yesu no okoghamba, Umweghya, nkentoke ikiya keno ndakore okore nyore obhohoru ubhwa bhokora?"

¹⁷ Yesu akamotebhya, "nkwake okobhorya ne ekentoke ikiya? Aho omonto omwe ono arenge omohene, nawe nyore aratuna obhohoru, ghota imyahokanyo ighya Waryobha."

¹⁸ Omonto ora akamobhorya, "myahokano ghehe?" Yesu akaghamba, "Otakaita, otakakora amaigha, otakaibha, otakaghamba obhorongo, ¹⁹ Soka suwenyu nanyakuwenyu, hansha nyarobheri waho kyaigho wihanshire umwene."

²⁰ Omonto uyo akamotebhya, "Amang'ana ghayo naghaitabherya. Nke ikyende ndatune?"

²¹ Yesu akamotebhya, "Nyore oratuna kobha omohoreru, kaghi, oghori ibhyaho bhyonswe ohane abhataka, noranyore nemongo koryobha. Omare ushe onsorane." ²² Hano umumura uyo yaighure ghayo Yesu yamotebhiri, akemoka asorombaye, kobhora yarenge nebhento bhyaru bhokong'u.

²³ Yesu akatebhya abhana bhegha bhaye, "mbohene nkobhatebhya, nkekong'u komonto umwame kosoha kobhokama ubhwa koryobha. ²⁴ Ghweki ndabhatebhya, mbhunyohu engamia koheta mwibhanga irye insindani, kokera umwame kosoha mobhokama ubhwa Waryobha."

²⁵ Abhana bhegha hano bhaighure igho, Bhakaroghora bhokong'u nokoghamba, "Nohe aritunguribhwa?"

²⁶ Yesu akabhamahera akaghamba, "Kobhairo reno teretorekanehe, Naho ko Waryobha ghonswe nkotorekana ghare."

²⁷ Nho Petro yamohonshoye nokoghamba, "Maha, tutighire bhyonswe nokokosorana uwe. Nkentoke toranyore?"

²⁸ Yesu akabhatebhya, "Mbohene ndabhatebhya, ora ansoraini oni, korekora rehya enkagha Omona uwa Adamu hano arikare kukitumbe ikya obhohoreru bhwaye, bhenyu bhonswe murikara kubhitumbe ikomi nabhibhere ibhye esemoka, kobhakengera ikina shesemoka ikomi nibhere isha Israel. ²⁹ Kera omwe weto ono yatighire righutu, bhamura bhabho, bhahara bhabho, suwabho, nyakuwabho, abhana hamwe omoghondo kukughira iyi irina ryane, naranyore kokeraho nokoghabha obhohoru ubhwa bhokora.

³⁰ Naho abharu bhabho bhano bhatangire bhono.