¹ Yooto kulaany Yeesu mweeng' ankwaay ak rubiikyii kooyeey Kaabernaam. ² Kuyite, kiimutyi chiito ake nyee kisonkochoot keekalaboonunee tiirbeet. Nto bere kukas Yeesu kule kiikoosee keey bichootoinee, kumwoochi chiichoo kule, “Wenyoo, kimkim, kaakeenyoowuung' kaat choolwookateeng'uung'.”

³ Yooto, kumwoochi keey kaaneetikaab kiruutek kule, “Kaakoowuuytee keey chiichi Yeyiin.” ⁴ Koonket Yeesu kiyee kimiite koosoote bichoo ankumwooy kule, “Am nee yu osootee moo ng'al chee miyootech? ⁵ Kuskus keemwooy kule, 'Kaakeenyoowuung' kaat ng'ookiswookikuuk nto keemwoowuung' kule, 'Ng'eet ankiiweesyet? ⁶ Okase ra kule aboonte anii *Weritaab Chii, kaamukeyweek am koorooni chee amuuche anyoochi biiko kaat.” Yooto kumwoochi chiichoo ki sonkochoot kule, “Yyoony ankiinam tiirbeeng'uung' ankiiweechi keey kaa.” ⁷ Kung'eet chiichooto kisonkochoot bakeenke ankuweechi keey kaa. ⁸ Yu kakas biiko chee kimii yooto ng'aleechaa, kumuuyo ankusilto Yeyiin nyi kiikoochine chii kaamukey chee wuu choo. ⁹ Yu katas taay Yeesu ak baannyii, kukas chiiti ake nyee kikeekuuree Mataayo kumii keebuur keryo kooruruuche syuuruut. Yooto, kumwoochine Yeesu chiichoo kule, “Rubwaa.” Kung'eete bakeenke ankurube Yeesu.

¹⁰ Nto yu miite Yeesu kwoomiisye am kaab Mataayo, kukwa kaaruruukiikaab syuuruut chee chaang' akoo biiko alak chee kimakiiriiku bokwoomiis ak Yeesu kuboonto keey rubiikyii. ¹¹ Nto yu kakas *Farisaayeek kuu nyoo, kuteebee rubiikaab Yeesu kule, “Ntee amiisye kaaneetiinteeng'woong' ak kaaruruukiikaab syuuruut akoo biich chee makiiriiku?”

¹² Kuketyi Yeesu kule, “Cheeng'oote biiko choo imnyoontoos kaanyooyiinteet. Macheeng'oote choo sobchootiin. ¹³ Ibooru nee ng'aleechu kikeesir: 'Akaykooye chamateet kusiir koroseek.' Kyaachoonchine anii biiko choo choolwookenootiin, ameebere choo isoote kule churtootiin.”

¹⁴ Kimii yee kikwa rubiikaab Yoowaana ankuteebee Yeesu kule, “Am nee yu keekire acheek ak *Farisaayeek amiisyeet amakire rubiikuuk?”

¹⁵ Kuketyi Yeesu kule, “Meerukuute keey chooroonuutekaab saanteetaab leekwa am saakweetaab kooyeey yoo boonto keey saanteetaab leekwa. Makuyit besyeet nyee makiinemunee saantaanaa wolee mii chooroonuutekyii, kunyii yooto yee makoorukuut keey chooroonuutekyii.” ¹⁶ Kitas taay Yeesu kumwooy kule, 'Makeetile ankeet nyee takuleel ankeekinee sireet nyee yoos. Yoo kakeeyey kuu nyooto kusirinyaktoos ankaanaa ankung'eti yooto kubarayiit koong'ta miisin. ¹⁷ Makeeroonkyine mbo kibkeetiis choo katakeeyeye woonkit nyee yoos. Yoo kakeeyey kuu nyooto, kootole woonkit kuwasta keey kibkeetiisyek. Nteenee keeroonkyine kikeetiisyek choo katakeeyeye woonkit nyee leel, nto yooto kumoome kiy tukuuchoo tukwaay.”

¹⁸ Kutakung'aloole Yeesu, kucho kaantooyiinteet ake ankukutunyee taayeenyii ankumwooy kule, “Kaakume cheebnyuu! Ichoo cheetiinyee awung'uung' sukusob.” ¹⁹ Yooto, kuweeto keey chiichoo kuboonto keey rubiikyii.

²⁰ Kirubaat let Yeesu cheebyoosyeet ake nyee kikiikunam boorto ake nyee kisaye korotiik am kenyiisyek taman ak ayeeng'. Yu kaakuriikyi Yeesu, kutiiny *maaseekaab kotootyeetaab sireetaab Yeesu. ²¹ Kiisootoonu cheebyoosyaanaa kule, “Yoo kaatiiny buch sireenyii asobe.”

²² Yooto kuweech keey Yeesu kukas cheebyoosyeetkey ankumwoochi kule, “Chee, kimkim! Kaakiisoobiing' kuuyu ikooseenoo keey.” Kisob cheebyoosyaanaa bakeenke. ²³ Nto yu keewut Yeesu kootaab kaantooyiintoonoo kunyoor biiko chee chaang' chee kimeeyse. Kikuute alake kureeruunek, koonchoostoos chuut. ²⁴ Kumwoochi bichoo kule, “Obe saang'. Manaame cheebi nteenee karuchi keey.” Kurooriichi bichoo Yeesu. ²⁵ Nto yu kaakuba bichoo saang', kuwo Yeesu kiseenkeetaab lakwanaa, kunam awut ankoong'eet kooyyo. ²⁶ Kiyestee ng'aleechaa yeemoonoo tukul.

²⁷ Nto yu kang'eetee Yeesu yooto, kurub let cheebkoraatiisyek alake ayeenku. Kikuurchinoote bichoo barak kumwooye kule, “Iriireeneech oo, Mochokoreetaab Tawuti.”

²⁸ Nto yu kawokoowut Yeesu ko, kuba nkicheek cheebkoraatiisyechaa ko. Yooto kuteebee Yeesu icheek kule, “Ara oyenchine kule amuuche anii asoobook?” Kuwalchi kule, “Kiiyenchine oo, Mokoryoonteet.”

²⁹ Kutabtab Yeesu koonyekwaa ankumwoochi kule, “Kuu yoo kookooseenoo keey, kuyeyakay kuu nyooto.” ³⁰ Kukas cheebkoraatiisyechaa. Yooto nanyuun, kookaloonchi Yeesu bichoo kule, “Maboomwoochi chii ake tukul ng'aleechu.” ³¹ Ankoo kuwuu nyooto, kibokumwaaytaat bichoo ng'aleechaa kiyeye Yeesu kuyem kooroonooto kumukuul.

³² Nto yu miite kubeechine keey mbo Yeesu, kiimutyi Yeesu chiito ake nyee kiboonto tamirmiryeet nyee miyaat. Kikiyey tamirmiryoonoo chiichoo kukwiilakay ng'elyeb nyee meemuuche kung'alaal. ³³ Nto yu kakiibebeeto tamirmiryoonoo miyaat kung'eetee chiichoo, kootyaak ng'elyebta kung'alaal chiichooto. Kiilat bichoo kimiite yooto kumwooye kule, “Yye! Manaakeekas besyeet ake ng'alyoo nyee tee nyi am *Israyeel.”

³⁴ Nteenee kumwooy *Farisaayeek kule, “Yyooch! Yeyiisyee chiichi baytooyiinteetaab tamirmirook chee miyootech sukoobebeeto tamirmirook chuut.”

³⁵ Kiweesyeetee Yeesu kiriinkoosyek ak soong'wek tukul. Kiineetiisyootee kooriikaab saayeet kwoomtoote lokooywek chee karoomech kurubta keey ak baytooyiisyeetaab Yeyiin ankoosooboote biiko chee kiboonto boorwoonik chee makerkeey ak tankuusyo ake tukul. ³⁶ Nto yu kakas Yeesu biiko chee chaang', kukasyi kiisayta kuuyu kikiisomsoome ankunyaliltoos kuu keechiir chee kabotyi akiinto. ³⁷ Yooto, kumwoochi rubiikyii kule, “Woo kesiisyeet, nteenee ng'eri kesiik. ³⁸ Kunyoo, osoom kutas Chiitaab yiisyeet kesiik alak.”