Kuurkeetaab 8
1
Yu karekunee Yeesu lekem barak, kurub biiko chee chaang'.
2
Yooto kucho chiito ake nyee kiboonto makereen ankukutunyee taayeetaab Yeesu ankumwooy kule, “Mokoryoonteet, yoo ichame, isooboo saatililiitu kuuytu ankete kule imuuche.”
3
Yooto nanyuun kuchuul Yeesu awunyii kutiiny chiicho ankumwooy kule, “Achame, kunyi tililiitu!” Kusob chiichoo areet akeenke.
4
Nto mii ypoo kumwoochi Yeesu chiichoo kule, “Meetebii kut imwoochi chii ng'aleechu, nteenee weeboorchi keey kibkoros ankiikoochi tukuuk chee kabeelee koroseek kurub kuu yoo kimwooye *Muusa sukooboor yooto kule keetililiitu.”
5
Yu kayit Yeesu Kaabernaam, kucho chiito ake nyee ki kaantooyiinteetaab lukeetaab booryeet nyebo Rooma ankumwoochi Yeesu kule,
6
“Mokoryoonteet, miite motwooriinteenyuu kaa kusubsube am kitiintiri.”
7
Kumwoochi Yeesu chiichoo kule, “Imache achoo anii kang'uung' chaasoob?”
8
Kuwalchi kaantooyiintoonoo Yeesu kule, “Mokoryoonteet, ankete anii kule mayemaktoos iwut inyiing' koong'waanii. Amiite anii ng'wenyuutaab kaamukeyweek ankaabaytooy biikaab lukeet. Yoo kaamwoochi chii nyee mii ng'wenyuunyuu kule, 'We' kuweetii, nto yoo kaamwoochi ake kule, 'Choo' kuchoonii.
9
Kuuyu ayeku chii nyee mii ng'wenytuutaab kaamukeyweek ankaaboonte nkanii lukeetaab booryeet, yoo kaamwoochi motwooriinteenyuu kule, 'Yey kiy' kuyeye. Kunyoo, imwaay baateey ng'alyoo, yooto makusob motwooriinteeng'waanii.”
10
Yu kakas Yeesu ng'aleekaab chiichoo, koolat ankumwoochi bichoo kiruboote inee kule, “! Kaamwoowook, kubooyiit man manaakas yeet ake *Israyeeliin nyee ikooseenoo keey kuu chiichi.
11
Kaaleenchook makukwaanee biiko chee chaang' koong'asiis ak tinkeey ankubokwoomchiin akoo *Abraam, Isaka akoo Yaakobo am kaab Yeyiin.
12
Nteenee makeetoorchi meenan biiko choo bere nyeeng'waa Yeyiin bokuriirunee ng'weny.”
13
Yu keewaany Yeesu kumwooy kuu nyooto, kumwoochi kaantooyiintoonoo kibo lukeet kule, “Iyeey kaa. Kaakuyeyakay kuu woloo keemaktooy kuuyu keekooseenoo keey.” Nto yooto bakeenke kusob motwooriinteetaab kaantooyiintoonoo.
14
Nto yu kawo Yeesu kaytaab Betero, kukas cheebyoosyeetaab biikooy nyebo Betero kukaru ankumnyoone.
15
Yu katiiny Yeesu awutaab cheebyoosyaanaa, kusob ankubayiis.
16
Nto miite besyoonooto kosoleny kukararakta asiista, kiimutyi Yeesu biiko chee chaang' chee kiboonto tamirmirppk chee miyootech. Kyaankung'alaal Yeesu, kung'eetyee tamirmiroochoo biiko. Kiisoob mbo biiko tukul chee kiimnyoontoos.
17
Kuyityiin yooto akoo yoo kimwooye *woorkooyiinteetaab Yeyiin *Isaaya kule, “Kikalabweech nyaliluutekyoo ankoomuuktooweech tankuusyeenyoo.”
18
Nto mii besyeet ake, yu keeruukyi keey biiko Yeesu, kumwoochi rubiikyii kule, “Okany kyaay toolileet keebe biitooniin.”
19
Nteenee kucho kaaneetiinteet ake nyebo kiruutek ankumwoochi Yeesu kule, “Kaaneetiinteet, arubiing' anii ankoo keewe ano.”
20
Kuketyi Yeesu kule, “Boonto kimokoyiinek ng'weenoonik chee minye, kuboonto tariitek kooriikwaa, nteenee maboonto *Weritaab Chii wolee imuunyee.”
21
Kumwoochi subak chiito ake Yeesu kule, “Mokoryoonteet, kany kut amuy baaba, nto arubiing'.”
22
Nteenee kuketyi Yeesu chiichoo kule, “Ikany kumuy keey muuswek, ankiirubwaa.”
23
Yooto nanyuun, kulaany Yeesu mweenkeet ak rubiikyii ankuba.
24
Kumii tooliil kween, kucho wusooneet ankoosoonkiiy mweenkeet. Yooto tukul kumii Yeesu karuchi keey.
25
Koong'eet rubiik Yeesu kule, “Mokoryoonteet, ntee kakeebeku, sarweech!”
26
Kumwoochi Yeesu kule, “Ntee koomuuye nyee tee nyi? Ankoo mookooseenoo keey kuyem?” Kung'eet ankooburyoong'to wusooneet ankoo beeko. Yooto, kuteeman wusooneet ak beeko.
27
Koolat rubiichoo ankuteebee keey kule, “Chii nee chiito nyi kasyine mbo wusooneet ak bey?”
28
Nto yu kawokuyit Yeesu biiteet nyiin ake nyebo tooliileet am roorookeetaab Kataara, kuchuwunee biiko alake ayeenku kochonkoosyek chee keemuchine biiko ankutakyi keey Yeesu. Kiboonto bichoo tamirmirook chee miyootech ankikorkorech miisin nyee kimamii chii nyee kiimuuche kumur yooto.
29
Kubolchi tamirmiroochoo miyootech Yeesu kule, “Imacheeneech nee oo, Lakwataab Yeyiin?” Keechoo cheenyaliileech acheek kutoombo kuyitu besyeet nyoo kiikeekwey?”
30
Kileekitee yooto akwootiitaab toorook chee kyookeete.
31
Kusoom tamirmiroochoo miyootech Yeesu kule, “Yoo keekweteech, ikooneech bokiiwut tooroochuut.”
32
Kumwoochi Yeesu kule, “Obe.” Kuchuwu tamirmiroochoo miyootech bakeenke ankubokoowute tooroochoo. Koowute kuu nyooto, kootuultee keey tooroochoo tukul lekem kusoor tooliil ankobokutoorchi keey ariit ankubek!
33
Kukase biiko chee kyookooy tooroochoo ng'aleechaa, kumweye akoy kiriing' ankwoomchine biiko ng'aleekaab toorook ak chebo bichoo kiboonto tamirmirook chee miyootech.
34
Kukase biikaab kiriinkoonoo ng'aleechaa, kung'eetoos tukul bokukas Yeesu. Kunyooru, kusaaysaay kule kung'eetee saang'waa.