¹ Kitas taay Yeesu kumwooy kule, “Masiming'alaalee chii nyee miyaat. ² Yoo keeng'alaalee chiito ake nyee miyaat, ku makeeng'alaaleeniing' nkinyiing' kuu nyooto. Nto kiyoo keeyechi chiito ake, keeyewuung' nkinyiing' kuu nyooto. ³ Am nee siikase inyiing' sikitityaa nyee miite koong'taab ng'eetaabkoomet ameekas musukyeet nyee miite koong'ta nyeeng'uung'? ⁴ Imuuche kule nee imwoochi ng'eetaabkoomet kule, 'Kany anemuung' sikitityaa am koong'ta,' nto kutee yooto tukul kumiite musukyeet koong'uung' nkityo? ⁵ Kiblembechaantaani! Machaktoos inemu kurook musukyeet nyoo miite koong'uung' nkityo siikaste karoomin siinemchi ng'eetaabkoomet sikitityaanteet am koong'nyii. ⁶ Meekoochi ng'ook kiy nyee churtaat kuuyu weekyiing' keey ankusankataniing', nto iwiirchi sanayeekuuk toorooy kuuyu itartoore.”

⁷ Kitas taay Yeesu kumwooy kule, “Yoo keesoom, keekooniing', yoo keecheeng'se inyooru, nto yoo keeng'eetiisye, keeyootuung'. ⁸ Chiito nyoo soomse, kiikoochine. Nyoo cheeng'se kunyooru, nto nyoo ing'eetiisye, keeyootyine. ⁹ Ara miite chiito am akweek nyee yoo kasoom lakwanyii mukaatiit kookoochine rwaanteet? ¹⁰ Nto yoo kamach *burburyoonteet, kookoochi eereeneet? ¹¹ Kunyi, yoo chame biiko buch kookoochi lokokwaa tukuuk chee karoomech ii, keemwa nee nanyuun Yeyiin am kibkoonkoy? Makoonem keey nyoo miisin kukoon tukuuk chee karoomech yoo koosoom!” ¹² Kitas taay Yeesu kumwooy kule, “Oyechine biiko alak kuu woloo katoomache akweek keeyeytoowook. Iyume ng'aleechuutechu kiruutekaab *Muusa akoo kaaneeteyweekaab *woorkooyikaab Yeyiin.”

¹³ Kitas taay Yeesu kumwooy kule, “Obeetee oreet nyoo mariich. Mii keelto nyee baraay nyee tinye oreet nyee baraay. Choong'ech biiko chee beetee keelooto weetii arbub. ¹⁴ Nteenee mii keelto nyee keweel nyee tinye oreet nyee mariich. Ng'erinech biiko chee beetee keelooto takyine keey *soboontaab kibchuulyo.”

¹⁵ Kitas taay Yeesu kumwooy kule, “Oriibee keey *woorkooyichoo mabo man choo iyeeloonunee ruunkuun sumboot nteenee am moonikwaa ku miyootech kuu suuyiik. ¹⁶ Onketee bichoo ng'aleek chee yeye. Mayeye cheebkateet mbuuniik amayeye siikooweet lamayeek. ¹⁷ Makyiintoos keet ake tukul nyoo karaam kuyeye lokoyeek chee karoomech nto keetiit nyoo miyaat kuyeye lokoyeek chee miyootech. ¹⁸ Meemuuche keetit nyee karaam kuyey lokoyeek chee miyootech ameebere imuuche keetit nyee miyaat kuyey lokoyeek chee karoomech. ¹⁹ Nto keet ake tukul nyoo kamachaktoos kuyey lokoyeek chee karoomech ameebere kayeey, kiiluulto ankeetoorchi ma. ²⁰ Kunyoo, onketee bichoo ng'aleek choo yeye.” ²¹ Kutas taay Yeesu kumwoochi rubiikyii kule, “Meewute kaab Yeyiin biiko tukul choo mwooye kule, 'Mokoryoonteet, Mokoryoonteet.' Nteenee chee iwute baateey ku choo yeye kiyoo makyine Baaba am kibkoonkoy. ²² Choong'ech biiko chee makumwoowoo am besyeetaab tabanta kule, 'Mokoryoonteet, Mokoryoonteet, ntee kikyoomtee lokooywek kaayneeng'uung', kiibebeetee tamirmirook chee miyootech ankeeyeye tukuuk chee mateechu chebo kwong'uut!' ²³ Yooto maamwoochaani bichoo kule, Kibng'ookisiisyechu, maanketook anii! Ong'eetyee yu.'”

²⁴ Kutas taay Yeesu kumwooy kule, “Chii ake tukul nyoo kakas ng'aleekyuu ankurub kukerkeey chii nyee ng'oom nyee kiteekyi koonyii kitaweet. ²⁵ Yoo karooben roobta kooyiin aynoosyek kutwoor keey beeko ankoosoonkiiy wusooneet koyooto, maluule koyoo, kuuyu kikeeteekyi yebo kitaweet. ²⁶ Nto chii ake tukul nyoo kakas ng'aleekyuu amarub, kukerkeey chii nyee berber nyee kiteekyi koonyii yebo ng'aayneet. ²⁷ Yoo karooben roobta, kooyiin aynoosyek kutwaarta ng'aayneet ankoosoonkiiy wusooneet kootkey, kuluule koot!”

²⁸ Yu keewaany Yeesu kumwooy ng'aleechaa, koolat biiko ²⁹ kuuyu kimeeneetiisye kuu kaaneetikaab kiruutek, nteenee kiineetiisye am kaamukeyweek.