¹ Kimwooy subak Yeesu kule, “Oriib keey. Mayey chii ng'alyoo nyee karaam am taayeetaab biiko kumache kule sukutook. Yoo kayey kuu nyooto, manyooru kiy am wolee mii kwaan nyoo miite kibkoonkoy. ² Yoo keetooret banan, meerook ing'asaatee keey kuu woloo yeytooy kiblembechiisyek am kooriikaab saayeet ak woloo bo keeltaab too, kule sukookaasta biiko. Kaamwoowook, manyooru kiy am wolee mii Yeyiin. ³ Nteenee yoo iyeetyeechine chiito ake, kumamachaktoos ikany kukas mbo choorweeng'uung'. ⁴ Yooto, makutuweniing' Koon nyoo kase kiy ake tukul nyebo wung'aan.”

⁵ Kitas taay Yeesu kumwooy kule, “Yoo osooye, marub chii atebuutekaab kiblembechiisyek. Kicham kiblembechiis kusooye nyee katoonoon am kooriikaab saayeet ak woloo chaang' biich, sukung'eet kutook. Kaamwoowook, kisimkunyoor bichoo kiyee kimache. ⁶ Nteenee, ikertooy keey inyiing' ko ankiisaay Koon nyoo makeekase. Nto yooto makutuweniing' Koon nyoo kase kiy ake tukul nyee wunyaat.” ⁷ Kitas taay Yeesu kumwooy kule, “Yoo osooye, mooboloobole kuu biich choo meenkete Yeyiin kuuyu isoote choo kule yoo kamwooy ng'al chee chaang', keekasyine. ⁸ Wuu nyooto kuuyu simkoonkete Koon kiyee mooboonte kutoombo mbo kut osaay.

⁹ Kunyoo machaktoos osooye kule: Baaba Yeyiin nyoo imiite kibkoonkoy, kutororiit kaayneeng'uung'. ¹⁴ Yoo onyoochine kaat biiko alak choo choolwookenchook, kunyoowook kaat nkinee Koon nyoo mii kibkoonkoy. ¹⁵ Nto yoo mooyeye kuu nyooto kumanyoowook kaat Koon.

¹⁶ Kimwooy Yeesu subak kule, “Yoo *kire chii amiisyeet, kumamachaktoos kusang'utiitu kuu woloo yeytooy kiblembechiisyechaa mache kule sukukas biiko! Kaamwoowook, kiikunyoor bichoo kuyem kiyee kimache. ¹⁷ Nteenee yoo okire amiisyeet, kumachaktoos obare buuteekwook, owuunw koonyekwook ankooyiil otililiitu ¹⁸ simeenketook chii kule okire amiisyeet. Nteenee Koon nkityo nyoo makeekase nyee inkete. Nto yooto, makutuweniing'.”

¹⁹ Kiitas Yeesu kumwoochi biiko kule, “Mootukuulchi keey baytitaab koorooni kuuyu nyeeree kuutyek, tuurtoos ankeechoore. ²⁰ Nteenee okonorchi keey baytit am kaab Yeyiin wolo mamiite kiy nyee nyeeree amamii chooriin. ²¹ Tiiyee chii met woloo mii baytiinyii. ²² Koong'uung' nyee ikoochine boorng'uung' lebkeeyyeet. Yoo kastooy koong'uung' nyee karaam, iboonte lebkeeyyeet. ²³ Nto yoo makastooy nyee karaam, imiite meenan nyee ma mining'. Kunyi, yoo kamis lebkeeyyeet nyoo keeboonte, imiite meenaneet kutukul! ²⁴ Mamii chii nyee imuuche koomelchiin kirokoon ayeeng'. Yoo kasyeem, kulaye ake. Kunyoo, manoomtoos yiisyeetaab Yeyiin ak muchastaab beesaan.” ²⁵ Kitas taay Yeesu kumwoochi bichoo kule, “Kunyoo,! Kaamwoowook, mookany kwaamaak met kule o-ame nee, oyyee nee nto kule olooche nee. Woo oob soboontaab chii kusiir amit nto ku sirooy? ²⁶ Mache okasee tariitek choo meenkete kule keechoonse kule nee ankeekesiisye kule nee amatinye mbo chookeen, nteenee baye Koon nyoo miite kibkoonkoy. Chamook akweek oob Yeyiin kusiir tariitechoo? ²⁷ Yoo keeyiimee keey chii ng'al chebo koorooni ii, ara imuuche yooto kutasyi besyoosyek chee minyee kooreet? ²⁸ Am nee sooyiimee keey ng'aleekaab sirooy? Okas baa, wolee wuu taabta ake tukul am wuuyeet! Machiiryoote sukukaraaraniit. ²⁹ Kaamwoowook, ankoo kiboonto Solomoon baytit nyee tyaa, kimaboonto sirooy chee karooranech kuu toobtoochu. ³⁰ Nto akweek chuu mookooseenoo keey kuyem ii, yoo imuuche Yeyiin kookaraaran toobtooy choo leeltoos nto nyee ma tyaa kurarach ii, kucham nee wolee makoolaaktaak nkakweek? ³¹ Kunyoo mooyiimee keey kule 'Makyaam nee? Nto kule, 'Keeyyee nee?' Nto mbo kule, 'Kiilooche nee?' ³² Biiko choo meenkete Yeyiin chee imoymooye tukuuchoo tukul, nteenee inkete Koon nyoo miite kibkoonkoy kule misyook akweek onyooru tukuuchoo tukul. ³³ Kuchamta chii kurook baytooyiisyeetaab Yeyiin akoo churtaayeet. Yooto, makurooroot tukuuk chuut alake. ³⁴ Kunyoo, mooyiimee keey ng'aleekaab tuun kuuyu boonto besyeetaab tuun ng'aleekyii chee makubooryee.”