¹ Kikuur Yeesu rubiikyii taman ak ayeeng' ankookoochi kaamukeyweek koobebeetooy tamirmirook chee miyootech ankoosoobe biiko choo boonto boorwoon alak tukul. ² Lebkeeyichooto ku chu: Simooni (nyoo kaayneenyii ake ku Betero), ng'eetaabkaamet Antereeya, Yaakobo araab Sebetaayo kuboonto keey ng'eetaabkaamet Yoowaana. ³ Filibo akoo Baatolomaayo, Toomaas akoo Mataayo kaaruruukiintoonoo kibo *syuuruut, Yaakobo araab Alfaayo akoo Taataayo, ⁴ Simooni Kananaayo akoo Yuuta Iskaryoo nyoo kichokuchoomtooy Yeesu.

⁵ Yooto, kumwoochi kule, “Moobe wolee miite biiko choo ma Yuutayeek amoowut kiriinkeet ake tukul nyebo biikaab *Samaaryaa, ⁶ nteenee obe wolee miite biikaab Israyeel choo kiikubootyo kuu keechiir. ⁷ O-amtoote kule, 'Kaakuyit baytooyiisyeetaab Yeyiin.' ⁸ Osooboote choo imnyoontoos, ong'eetootee meet choo kiikubek, osoobe choo boonto *makereenik ankoobebeetoote tamirmirook chee miyootech. Kakeekoonook kaamukeyweechu buch, kunyi okooytooy nkakweek buch. ⁹ Manamaat chii *ta-aabuut mbo kisich, *feetaanik nto ku beesaan alak tukul am mbisinyeenyii. ¹⁰ Manam mbo lool nto ku sira nyee iliiktee keey, kweyoon nto mbo kirok, kuuyu yeme chii nyoo kaakubirto nkuruukyii keekwechi kiy. ¹¹ Yoo koowut kiriing' nto ku saang'ta ake tukul, ocheeng' kaytaab chii nyee siken ankoobuur kayaata akoy yoo obeechine keey. ¹² Yoo koowut kaab chii, osoomchi beruur. ¹³ Nto yoo nyoolchine kiiberuur, kunyoor kaalyeet. Nto yoo manyoolchine kiiberuur, kutebi. ¹⁴ Yo kamataachaak chii nto kumakas ng'aleekwook, olelekyi teertit am kereenkookwook yoo ong'eetyee kayaata nto kiriinkoonooto kooboorchi kule takoobuurtooy ng'ookisng'waa. ¹⁵ Leyye,! Kaamwoowook, makiing'woonchi bichoo bo kiriinkoonooto miisin kusiir ng'wooninto nyee nyooru biikaab Komoora ak Sotom besyoonoo itiilchine Yeyiin ng'aleek biiko am kooreet.”

¹⁶ Kitas tooy Yeesu kumwooy kule, “Ayooktook anii booyeyiisyoote okerkeeye keechiir chee miite suuyiik kween. Kunyoo okasu ankooyibe keey ng'weny. ¹⁷ Oriib keey kuuyu makooyyoong'teenook biiko kook ankubirook am woloo bo kooriikwaa bo saayeet. ¹⁸ Makiimutaak taayeetaab baytooyik kubo anii. Okany kuye nyooto barooyinto nyee koomwoochinee bichooto akoo choo ma Yuutayeek kiyee oyenchine. ¹⁹ Mookany kooyiimaak metewoy kiyee omwooye nto wolee omwooytooy kiyooto. Makiiboorwook yooto kiyee omwooye ²⁰ kuuyu meebere akweek chee moong'aloole, nteenee Tamirmiryeetaab Baaba nyee makung'aloole kubunteenook. ²¹ Makuchaamta chii ng'eetaabkaamet keebakach, kuchaamta chii lakwanyii akuweekyi keey leekook sikiikwaa kuye keebakach. ²² Makuwechook biiko kubo anii. Nteenee chiito nyoo kamuyta ankookaaseenaa keey akoy tabanta, makiiraraach. ²³ Yoo kakeewuseenook *kiriinkeet ake, omwechi ake! Kaamwoowook moomuutu kiriinkoosyekaab Israyeel tukul kumanaayitu *Weritaab Chii.”

²⁴ Kitas taay Yeesu kumwooy kule, “Ma woo rubiinteet kusiir kaaneetiinteenyii ama woo motwooriinto kusiir mokoryoonteenyii. ²⁵ MNyoolchine keeyechi rubiinteet kiyee keeyechine kaantooyiinteenyii, anku akoy keeyechi motwooriin kiyee keeyechine mokoryoonteenyii. Yoo keekuureenoo anii *Beelsebuul ankaayeku chiitaab kayta ii, kucham nee biiko choo miite kanyuu? ²⁶ Moomuyee choo wusook. Makeeng'aany kiy ake tukul nyee iyeenoot anku makiiboor kiy ake tukul nyee wunyaat. ²⁷ Obaroostooy ng'aleechu a-amwook kumakase chii keekas karoomin. Nto kiyee keechoomwook, okuurte kukas biiko tukul. ²⁸ Moomuyee choo bakache boorto ameemuuche kubakach tamirmiryeet. Nteenee omuyee nyoo imuuche koo-karbuusee boorto ak tamirmiryeet maataab kibchuulyo. ²⁹ Kyooltee oob kootiitiiyeenik ayeeng' beesaan chee mabo laat? Ankoo kuwuu nyooto, meesuuwu mbo akeenke yoo manaacham Baaba Yeyiin. ³⁰ Ntee inkete mbo Yeyiin wolee tee buuteek am metitaab chiito. ³¹ Kunyoo, moomuuye, kuuyu chamook akweek Yeyiin miisin kusiir kootiitiiyeen chee chaang'. ³² Chii nyoo kachamta am taayeetaab biiko kule chamoo, machaamte nkanii chiichooto am taayeetaab Baaba. ³³ Nto nyoo katayeenaa taayeetaab biiko, maatayee nkanii taayeetaab Baaba.”

³⁴ Kitas taay Yeesu kumwoochi rubiikyii kule, “Moosoot kule kyaachoontooy anii taloosyeet kooreet, nteenee kyaayibu ng'ot, ³⁵ kuuyu kichaawuulye biiko. Tooytoos weero akoo kwaan, kutooyo cheebto ak kaamet ankutooyo koorkeetaab weeriit akoo cheebyoosyeetaab biikooy. ³⁶ Makuweche keey biich chee tilyoonuut. ³⁷ Chii nyoo chame kwaan nto kaamet kusiir wolee chamtoo anii, mayeme nyoo kuyek rubiinteenyuu. Nto nyoo chame werinyii nto ku cheebnyii kusiir wolee chamtoo anii, mayeme nkinee kuyek rubiinteenyuu. ³⁸ Chii nyoo kamakalab murtooywoonteenyii ankuruba, kumayeme kuyek rubiinteenyuu. ³⁹ Nyoo kayeetyi keey soboontaab koorooni, makooboot soboonnyii bo kibchuulyo. Nto nyoo keekooyto soboonnyii am koorooni kubo anii, makunyoor *soboontaab kibchuulyo.

⁴⁰ Chiito nyoo kataachaak kaakutaacha nkanii, nto nyoo kataacha anii kaakutaach Yeyiin nyoo kiiyookwoo. ⁴¹ Chii nyoo tooche *woorkooyoonteetaab Yeyiin kuuyu woorkooyoo, kunyooru kiyee keetuwenee woorkooyoonteet. Nto chii nyoo torooche chiito nyoo churtaat kuuyu churtaat kunyooru kiyee keetuwenee chiichooto churtaat. ⁴² Kaamwoowook, chii nyoo karamchi mbo bey rubiinteenyuu ankoo kumatookunoot rubiintoonoo, makeetuwen chiichoo.”