¹ Yu keewaany Yeesu kumwoochi rubiikyii taman ak ayeeng' ng'aleechaa, kung'eetee yooto ankuwokooneetiisyoot kwaamtaat lokooywek am kiriinkoosyeekaab wolooto. ² Yu kakas *Batisaniinteet Yoowaana nyee kirataat ng'aleek chee kimii kuyeye *Kaararookiinteet, kumwoochi rubiikyii ayeeng' kule, ³ “Obe wolee mii Yeesau ankooteebee yoo inee man Kaararookiinteet nyoo kookeebere makucho, nto takumii ake nyee keekanyoonu.”

⁴ Yu kabokeeteebee Yeesu kuu nyooto, kuwalchi rubiichoo kule, “Oyeey ankuboomwoochi Yoowaana kiyee kookas. ⁵ Kastooy ra cheebkoraatiisyek, beesyete ra choo kisonkochootiin, kookusobcho choo bo makereenik, kase ra cheemiinyiisyek ng'aleek, kookiing'eetee meet choo kikiikuba *kaabkwoombiich ankookyoomchi mbo nkicheek banoonik lokooywek chee karoomech. ⁶ Kunyi, bookiimchi Yoowaana kule iberuuroot chii ake tukul nyoo maneetuukyoo batay.”

⁷ Yu kaakubeechi keey rubiichoo kiiyooktooy Yoowaana, kumwoochi Yeesu biiko kule, “Kyoobeetii bookase nee am koor nyee suurkween? Ara ki tooywoo nyee kiimuuche koosooyen yoomat yoo kawus? ⁸ Ara ki chii nyee kikiilaach sirooy chee karooranech? Acha, keenyoorchine chee ilooche sirooy chebo barak kaab baytooyik. ⁹ Ara kyoobeetii bookase ng'oo nanyuun? Ara ki *woorkooyoonteetaab Yeyiin nyi kiboonyooru? Kubooyiit man, kyoonyooru woorkooyoonteet nyee woo kusiir woorkooyoo ake tukul. ¹⁰ Inee nyoo ng'aloolee Yeyiin am yoo kikeesir kule, 'Maayookte kiiyookiinteenyuu koonto wokuyeytoowuung' keelto.' ¹¹ Kaamwoowook, mamii chii koorooni kusiir Yoowaana, nteenee woo nyoo matookunoot nyebo laat am baytooyiisyeetaab Yeyiin kusiir inee.” ¹² Kitas taay Yeesu kumwooy kule, “Nto kuchakee yoo kitoowu Batisaniinteet Yoowaana kwoomtooy lokooywek akoy kura, kiyoot baytooyiisyeetaab Yeyiin am wusiisyeet ankusyeeme biiko chebo woorooryeet koosorto. ¹³ King'alaalee ng'aleechu *woorkooyik tukul akoo siruutekaab *Muusa akoy mbo nkinee Yoowaana. ¹⁴ Nto yoo omuuche oyenchi, inee ku *Eliiya nyoo kikeeng'aloolee kule makucho. ¹⁵ Nyoo yebe yiit kukas. ¹⁶ Kunyoo, maakerkeeyee nee biich chee wuu chu? Kerkeey leekooy chee mii wolee chaang' biich amachame ng'aleekaab chuut yoo keekuurchine kule, ¹⁷ Yoo kakeekuutwaak kureruut mootuume, keele keeriirye, otay omeeyse.' ¹⁸ Wuu nyooto wolee kiyibto biiko Yoowaana ak anii. Yooto keemwooy kule, 'Boonto *tamirmiryeet nyee miyaat.' ¹⁹ Kucho *Weritaab Chii nyee kyoomiis ankuyyee tifaayiik keele, kimooroong'nyaa, kibookityoo anku choorweetaab kaaruruukiikaab *syuuruut ak biich choo makiiriiku.' Nteenee inkete chii kiyee yibu ng'oomnan yoo karu kaaneeteyweekyuu.”

²⁰ Yooto kung'alaalee Yeesu nyee miyaat kiriinkoosyek choo meebere kiweeksee miyootyeet ankoo kikiikuyeyee inee wolooto ng'al chebo kwong'uut. ²¹ Kimwooye kule, “Wuusyo, wee, kiriinkooneeb Koorasiin ak Beetsaayta! Tyaa ng'woonin nyee kukanyoonwook akweek choo kyookas ng'al chebo nkoolat choo kyaayeye. Nto ki bikaab Tiiro nto ku chebo Sitoon chee kyaayechine ng'aleechu bo nkoolat, nto kiilooche sirookaab meeyso ankoobuuree aryaanteet kooboor kule kaakuweeksee miyootyeet. ²² Kiriinkoosyechu,! Kaamwoowook, makunyoor biikwook ng'wooninto nyee siire nyoo nyooru biikaab Tiiro akoo Sitoon besyoonoo itiilchine Yeyiin biiko ng'aleek. ²³ Biikaab Kaabernaam, obere nkakweek moobe kibkoonkoy? Achicha, obeetii kaabkwoombiich! Nto kikikeeyeyee Sotom ng'al chebo nkoolat, choo kikeeyewook akweek, nto manaakarbus. ²⁴ Kaamwoowook, onyooru akweek biikaab Kaabernaam ng'woonin nyee siire nyoo makunyoor biikaab Sotom besyoonoo itiilchine Yeyiin biiko ng'al.”

²⁵ Nto miite yoo. Kumwooy Yeesu kule, “Asiltiing' inyiing' Baaba Yeyiin, nyoo ibawu barak ak ng'weny, kuuyu kweeboorchi biiko choo yibe keey ng'weny kiyee iwunyee biiko choo isoote kule ng'oomech. ²⁶ Koonkoy, Baaba, kuuyu wuu nyooto wolee imaktooy inyiing'. ²⁷ Kikoono Baaba kiy ake tukul nyee aboonte. Baaba nkit nyee inkete wolee awuuye anii, ameebere mii subak chii nyee inkete wolee wuu Baaba, nteenee lakwanyii nkit akoo biiko choo kyaakwey aboorchi.” ²⁸ Kitas taay Yeesu kumwooy kule, “Okwaa wolee amiite anii akweek tukul choo ochoosyootiin ankoong'irook tukun saamuung'wook. ²⁹ Ayeku tala ankaayibe keey ng'weny. Kunyi orookee keey muchookiinyuu ankookany aneetaak. Yoo kooyey kuu nyooto, moomuung'iisye. ³⁰ Manyikisyine biich muchookiinyuu anku kuskus yiisyeenyuu.”