¹ Nto mii besyeet ake yee ki *Sabaato, kumur Yeesu akoo rubiikyii mbareet ake nyee kibo nkoonuuk. Kyoomootiin rubiikyii kemey yooto, kutoow kuswech metewookaab nkoonuuk ankwaam. ² Nto bere kukas *Farisaayeek kuu nyoo, kumwoochi Yeesu kule, “Kas, ntee miite rubiikuuk kwiiryee kiruutyeet nyoo machamu keekesiis yee besyeetaab Sabaato.”

³ Kukeyti Yeesu kule, “Manoosuman akweek, kiyee kiyey baytooyiinteet Tawuti yoo kyoome kemewuut akoo lukeenyii? ⁴ Kiwo *Kootaab Yeyiin ankiikoochi mukaatiinek choo kikeechamchine mbo *kibkoros nkit kwaam. Kyaam Tawuti mukaatiinechaa ankookoochi nkicheek biikaab lukeenyii kwaam. ⁵ Nto mbo subak ii, manoosuman akweek am siruutekaab *Muusa kule iryee kiruutek mbo kibkoros yoo yeyiisyee Kootaab Yeyiin am besyeetaab *Sabaato amakeeyibe kule kaleel? ⁶ Kaamwoowook, miite yu chii nyee woo kubiir kootaab Yeyiin. ⁷ Nto onkete kiyee kiibooru Yeyiin yoo kimwooye am siruutek kule, 'Akaykooye chamateet kusiir koroseek,' nto kamootiilchine ng'al  biich chee maboonto leelis. ⁸ Bawu *Weritaab Chii besyeetaab Sabaato.”

⁹ Kutas taay Yeesu akoo rubiikyii akoy kooto ake nyebo saayeet. ¹⁰ Kimiite koyooto chiito ake nyee kisonkochoot awut. Yooto kuteebee *Farisaayeek chee kimii koyooto Yeesu kule, “Ara chamweech kiruutek kiisoobso yee besyeetaab *Sabaato?” Kiteebe bichoo kuu nyooto kuteche Yeesu subokooyyoong'te kook.

¹¹ Yooto kumwoochi Yeesu bichoo kule, “Yoo boonto chii am akweek keechiiryeenyii ankoosuuchi keechiiryoonoo ng'ween yee besyeetaab Sabaato, ichuutu oob bakeenke am ng'ween? ¹² Bo koomanuut chii miisin kusiir keechiir. Kunyoo, chamweech kiruutek keeyey kiy nyee karaam besyeetaab Sabaato.” ¹³ Yu keewaany Yeesu kumwooy ng'aleechaa, kumwoochi chiichoo kisonkochoot awut kule, “Chuul awut.” Yu kachuul, kukaramiit kuu nyiin ake. ¹⁴ Kukase Farisaayeechaa kuu nyooto, kuchuytooy saang' ankubokuyechine Yeesu ruurumuut koowaang'ta.

¹⁵ Nto yu keenket Yeesu ng'aleek chee kimii bichoo kuchobe, kung'eetee yooto. Kirub biiko chee chaang' Yeesu ankoosooboot boorwoonik chee kiboonto biiko wolee woo. ¹⁶ Nto yooto kookaloonchi Yeesu bichooto, kumamwoochi chii kiy kurubta keey ak inee. ¹⁷ Kiyiityiin yooto ak yoo kimwooye Yeyiin kubununee woorkooyoonteet *Isaaya kule, ²² Nto mii yoo kiimutyi Yeesu chiito ake nyee kiboonto tamirmirook chee miyootech ankukoraat ameemuuche kung'alaal. ²³ Yu kakas biiko tukul chee kimii yooto kiyee kiyeyakay, kumuuyo miisin ankumwooy kule, “Ara Kaararookiinteet chiichi nyoo kokeekanyoonu?”

²⁴ Nteenee yu kakas *Farisaayeek ng'aleechaa, kumwooy kule, “Mawuu nyoo, ntee yeyiisyee chiichi *Beelsebuul nyoo baytooyiinteetaab tamirmiroochooto yoo ibebeetooy tamirmiroochu miyootech.”

²⁵ Kuuyu kiinkete Yeesu kiyee kiisoote bichoo, kumwooy kule, “Yoo kaakubar keey lukeetaab booryeet nyebo kooreet ake, kuburyete kooroonoo. Nto yoo kaakukwiil keey nkinee mbo kiriing' nto ku kayta ake, kuburyete. ²⁶ Kunyi, yoo akoo miite Kibrokosyoonteet kubooryee keey nkit ii, kooyyoonye man baytooyiisyeenyii? ²⁷ Nto yoo ayeyiisyee anii *Beelsebuul abebeetee tamirmirook chee miyootech, kuyeyiisyee ng'oo rubiikwook yoo ibebeetooy tamirmirook chee miyootech? Oteebee, baa, akweek kumwooy chebo man. ²⁸ Nteenee yoo ayeyiisyee anii Tamirmiryeetaab Yeyiin abebeetooy tamirmirook chee miyootech koobooru kule kookuyityook baytooyiisyeetaab Yeyiin. ²⁹ Nto subak ii, imuuchaktoos kule nee kutur chiito ake kaytaab mureneet ake nyee tinye nkuruuk ankoonem tukuukaab chiichooto? Yoo kamarat chiitaab kayta, mature kooto.” ³⁰ Kutas taay Yeesu kumwoochi biiko kule, “Chii ake tukul nyoo mamii komosnyuu, ku nyooto nyee miite kubaloo. Nto chii ake tukul nyoo mayeetyeechoo kiiruruukiisye, ku nyooto nyee isereete.” ³¹ Kitas taay Yeesu kumwooy kule, “Kaamwoowook, keenyoochine chiito kaat am ng'ooki ake tukul ak kochong'nat ake tukul, nteenee makeenyoochine kaat nyoo intosuure Tamirmiryeetaab Yeyiin. ³² Chii ake tukul nyoo kang'alaalee *Weritaab Chii nyee miyaat, keenyoochine kaat, nteenee chii ake tukul nyoo koobuch Tamirmiryeetaab Yeyiin, ku makeenyoochine nyoo kaat ra nto mbo am besyoosyek choo kwoonii.” ³³ Kimwooy Yeesu subak kule, “Yoo karaam keetit ku karoomech nkicheek lokoyeekyii nto yoo miyaat keetit ku miyootech nkicheek lokoyeekyii. Kunyi kiinketee karoomnyeetaab keetit lokoyeekyii. ³⁴ Oyeku soo ng'oomng'ook nyee tyaa! Choolwookichu, omuuche akweek omwaay ng'alyoo nyee karaam besyo? Kiyee choonee kuutiitaab chii ku nyee mii metinyii. ³⁵ Yoo karaam metitaab chii kuyeye tukuuk chee karoomech, nto yoo miyaat metit kuyeye tukuuk chee miyootech. ³⁶ Kaamwoowook, makukwaanee chii kubo ng'alyoo nyee mayemaat nyee kiikumwooy, yoo kiitiilchine biiko ng'aleek. ³⁷ Kunyi, makubeer ng'aleekuuk yoo ibeere keey nto yeme kiiruustiing'.”

³⁸ Yooto kumwoochi *Farisaayeek alake akoo kaaneetikaab kiruutek Yeesu kule, “Kaaneetiinteet, keemache iyeweech kiy nyebo kwong'uut nyee ibooruneeneech kule iboonte kaamukeyweek chee kwoonee kibkoonkoy.”

³⁹ Kuwalchi Yeesu bichoo kule, “Kibrokosiis ak choo chuunnyee Yeyiin chee teebe kiiboorchi kiy nyebo kwong'uut. Ng'al baateey chebo kwong'uut chee makiiboorchi kuu choo kibo woorkooyoonteet Yoona. ⁴⁰ Kuu yoo kibeennyee Yoona mooyeetaab tyoony bo araaray besyoosyek somok, makubeenii nkinee *Weritaab Chii ng'weny besyoosyek somok. ⁴¹ Makooyyoong'iis biikaab Ninaawi besyoonoo kiitiilchine biiko ng'aleek ankooruusta biiko chee wuu chuutechu, kuuyu kiweek icheek yoo kyoomchine Yoona lokooywek. Nteenee mii yu ra nyee woo kusiir Yoona. ⁴² Makooyyo cheebyoosya nyee kibaytooy kooreetaab Sooy besyoonoo kiitiilchine biiko ng'aleek. Makooruusta biiko chee wuu chuutechu, kuuyu kichoonee inee looyiin chokuyebchine yiit ng'aleekaab kiirnan choo kimwoowu Solomoon. Nteenee mii yu ra nyee woo kubiir Solomoon.” ⁴³ Kitas taay Yeesu kumwooy kule, “Yoo kakiibebeeto *tamirmiryeet nyee miyaat kuchuwunee chiito, makoombakaatee suurkweeneet nyee kilay asiis kucheeng'e wolee keemuunyee. Nto yoo kamanyoor wolee kaminy, ⁴⁴ kumwooye kule, Kaykay ayeey woloo kyaaminye.' Yoo keeyeew, kunyooru wolooto kumasaat ankuyeytaat nyee karaam. ⁴⁵ Yooto, kooyeeye ankuwokuchoontooy keey tamirmirook alak tisab chee miyootech kusiir inee ankoowut tukul chiichooto. Kunyi, miyatiitu chiichoo kusiir yoo kibo taay. Kunyoo makuwuuyiit nyooto am wolee miite biiko choo kiikuchuunnyee Yeyiin.”

⁴⁶ Nto yu takumiite Yeesu kung'aloolchine biiko chee chaang', chokooyyoonyee kaamet akoo mbo ng'eetaabkaamet saang' kumache kung'aloolchi. ⁴⁷ Kumwoochi chiito ake Yeesu kule, “Mii koomet saang' akoo mbo ng'eetaabkoomet kumache kung'alooluung'.”

⁴⁸ Kuwal Yeesu kule, “Ng'oo nyee moomo anii anku ng'oo nyee mbo ng'eetaabiya?” ⁴⁹ Yooto koong'welyeel rubiikyii ankumwooy kule, “Bichu keeboonte keey chee mbo ng'eetaabiya anku mbo moomo. ⁵⁰ Chii ake tukul nyoo yeye ng'aleek choo mache Baaba am kibkoonkoy, nyee ng'eetaabiya anii, cheebiya anii anku moomo anii.”