¹ Nto am besyoonooto kung'eetee Yeesu ko ankuwokutebee sakaramteetaab Tooliileetaab Kalilaaya. ² Yu keeruruukyi keey biiko chee chaang' kulaany mweenkeet nteenee kiiyyoong'iis biiko chuut tukul sakaramteetaab tooliileet. ³ Kooneet Yeesu bichoo ng'aleek chee choong'ech am tyoonkoochoy kule, “Kiwokuyis kaabatiinteet ake nkoonuuk. ⁴ Yu katyis nkoonuuchoo, koosuuchi alake keeltaab too. Nto tee yoo kukwa tariitek ankukwey. ⁵ Koosuuchi alake kitaweet wolee ki tewerer teng'nyaanteet. Kubiityo choo areet akeenke. ⁶ Nteenee yu kalay asiista koosiis nkoonuuchoo kuuyu kimamii wolee kikwertoochine keey tiikiitek. ⁷ Koosuuchi alake wolee miite katook. Yu kabiityo katoochoo kooreewoon nkoonuuk kut kumanaayey amit. ⁸ Koosuuchi alake teng'eek chee karoomech. Kubiityo choo nyee karaam. Kiyey alake amiik chee ng'eri, kuyey alake chee kaykayech, nto alak kuyey chee choong'ech. ⁹ Nyoo yebe yiit, kukas.”

¹⁰ Nto mii letuunoo, kukwoonchi rubiik Yeesu ankuteebee kule, “Am nee siing'aloolchinee inyiing' biiko tyoonkoochoy?”

¹¹ Kuwalchi Yeesu kule, “Kookeekweyaak akweek onket kiyee iyeelaat kurubta keey baytooyiisyeetaab Yeyiin, nteenee manaakiiboorchi alak. ¹² Chiito nyoo yeyiisyee kiyee inket makeetasyi ake. Nto nyoo mayeyiisyee, makiibootee mbo nyoo kaboonto. ¹³ Amwoowunee ng'aleek tyoonkoochoy kuuyu ankoo kakasee koong', makase kiy, nto yoo kayebchi yiit, kumeenkete kiy.

¹⁴ Yityiintoos am bichu kiyoo kimwooye woorkooyoonteetaab Yeyii Isaaya kule, 'Mooyebchine yiit, amoonkete kiy. Mookasee koong', amookase kiy. ¹⁶ Nteenee oberuurootiin soo, akweek nyee tyaa chu kastooy koonyekwook ankuyebiite yiitiikwook. ¹⁷ Kaamwoowook, kiikukanyaan *woorkooyiikaab chee chaang' ak biiko chee chaang' choo churtootiin, kule nto kas kiyee omiite akweek akase nteenee maneemuuch. Kukanyaan kule kuyebchi yiit kiyee kyookas akweek nteenee maneenket kiyooto.” ¹⁸ “Kunyi okany baa abang'boong'wook tyoonkoocheeneeb kabaatiintooni kiyise nkoonu. ¹⁹ Kerkeey biiko alake ak keeltaab too. Kase ng'alyoonteet nyee rubtooy keey baytooyiisyeetaab Yeyiin ameenket kiyee mwooye lokooywechoo. Yoo kacho Kibrokosyoonteet kusare. ²⁰ Kukerkeey alake ak kitaweet. Kase ng'alyoonteet ankutorooch areet akeenke kukang'erekyi. ²¹ Nteenee machutitee icheek ng'alyoontoonoo, ibuurtooy nto nyee ma tyaa, yookakeewech ankeewus kubo ng'alyoonteet, koochuchuuy keey. ²² Kerkeey biiko alake teng'eek chee kibiitee katook. Kase ng'alyoonteet, nteenee beng'tee tukuukaab koorooni ak muchastaab baytit. Ireewoone tukuuchoo ng'alyoonteetaab Yeyiin kumayey kiy. ²³ Kerkeey biiko alake teng'eek choo karoomech. Kase ng'alyoonteet ankukiilchi. Yeyiisyee alake ng'alyoonteetaab Yeyiin kuyi keey kisich, kuyi keey am alak kukaykay, nto alak kuyi keey miisin.”

²⁴ Nto mii yoo kumwoochi Yeesu biiko tyoonkoocheet ake subak kule, “King'eet chiito ake kuchaan kebusweek chee karoomech mbareenyii. ²⁵ Nto mii kweemooy kukaruuyo biiko, kucho buunyoonteet ankuyis suuswoonteet ake nyee wuu nkoonnyoonteet wolooto bo mbareen ankuweechi keey. ²⁶ Kibiityiin nkoonuuchoo ak suuswechoo ankuyey metewook. ²⁷ Nto mii yoo, kumwoochi motwoorik chiitaab mbareet kule, 'Mokoryoonteet, kiichaan oob inyiing' kebusweek chee karoomech mbareen? So, kokwaanee ano suuswek?'

²⁸ Kuwalchi chiitaab mbareet kule, 'Buunyoonteet nyoot koyey ng'aleechaa.' Kumwoochi motwoorikyii kule, 'Ara keebe acheek bokiitutu suuswechoo?'

²⁹ Kuketyi motwoorik kule, 'Acha. Yoo koole boong'ey, omuuche ong'eyte nkoonuuk. ³⁰ Kunyi okany kubiityiin kuu nyooto akoy yoo keekesiisye. Nto yooto maamwoochi booko choo kesiisye kulekwel suuswek ankurat sikeebeel, nto yityo kooruruuch nkoonuuk ankuyib kukwa chooke.'”

³¹ Kumwooy Yeesu tyoonkoocheet ake kurubta keey ak baytooyiisyeetaab Yeyiin kule, “Kichaan chiito ake mbareenyii kebuswoonteet ake nyee kikeekuuree *aritaaliit. ³² Ankoo kuk kebuswoo nyee mining' am kebus alak tukul chee keechoone, biite kuwooyiit kusiir keetiik chuut ankuyeye sokonaak chee teekyine tariitek kooriikwaa.” ³³ Kimwooy subak Yeesu kule, “Kerkeey baytooyiisyeetaab Yeyiin tukun choo yoo kakeetankwarta bus kuchututee busyeek tukul kukuut.”

³⁴ Kiyeyiisyootee Yeesu tyoonkoochoy yoo king'aloolchinoote biiko. ³⁵ Kiyityiin yooto kiyoo kimwooye *woorkooyoonteet ake kule, “Amiite waamwoowunee ng'aleek tyoonkoochoy, abooru ng'al chee kiiyeelootiin kung'eetee kakeeyey kooreet.”

³⁶ Yooto, kubakaakta Yeesu bichoo ki chaang' ankuwo ko. Nto tee yoo koonookyi rubiikyii ankuteebee inee kule, “Mwooweech, ibooru nee tyoonkoochoonoo bo suuswoonteet?”

³⁷ Kuwalchi Yeesu kule, “Chiichoo kichoone kebuusweechoo karoomech ku *Weritaab Chii. ³⁸ Mbareet ku kooreet, nto nkoonuuk ku biikaab baytooyiisyeetaab Yeyiin. Nto suuswoonteet ku biikaab Kibrokosyoonteet. ³⁹ Nto nyee kichoone suuswoontoonoo ku *Keniinteet. Kiyee makeekes ku biiko chee makiitiilchi ng'aleek am besyeetaab tabanta. Nto kesiik ku malayikaanik. ⁴⁰ Kuu yoo keetile suuswoontoonoo miite mbareen ankeebeelee maata, kuwuuyiitu nyooto am tabantaab kooreet. ⁴¹ Makooyook *Weritaab Chii malayikaanikyii chokoonemto am Baytooyiisyeenyii biiko tukul choo tewechoote biiko alak ak kibng'ookisiis alak tukul. ⁴² Makutoorchi bichoo maata nyee irikitiite, wolee mabokung'woonchi ankuriirunee ng'weny. ⁴³ Makooluuw choo churtootiin kuu asiista am kaab kwaan. Nyoo yebe yiit kukas.”

⁴⁴ Kitas taay Yeesu kumwooy kule, “Kerkeey baytooyiisyeetaab Yeyiin yoo kakeewunyee tukun chebo koomanuut mbareen nto tee yoo kunyoor chiito ake ankooyeen subak. Weetii chiichoo am ng'erekweek ankuwokwaalta tukuukyii tukul chee boonto ankwaal mbaraanaata.” ⁴⁵ Kimwooy Yeesu subak kule, “Kerkeey baytooyiisyeetaab Yeyiin ak yoo cheeng'e chiito ake sanayeek chee karooranech, ⁴⁶ nto yoo kanyoor sanayaanteet akeenke nyebo koomanuut wokwaalta kiy ake tukul nyee boonto ankwaal sanayaantaanaata.”

⁴⁷ Kimwooy subak Yeesu kule, “Kerkeey baytooyiisyeetaab Yeyiin yoo keeluumta biiko alake neetiit tooliileet ariit ankunam *burburiinek chee chaang' chee makerkeey. ⁴⁸ Yoo kaakunyiy burburiinek neetiit, koochuut tekiik kucho sakaramteet. Nto yityo koobuur ng'weny ankulekwel burburiinek choo karoomech ankookoochi kereb ankumeto choo miyootech. ⁴⁹ Wuu nyooto am besyeetaab tabantaab koorooni! Makukwa malayikaanik ankulekwelunee biiko choo miyootech wolee mii choo churtootiin. ⁵⁰ Makeetoorchi biiko choo miyootech wolee bo maat nyee irikitiite wolee makung'woonchi soboon ankuriirunee ng'weny.”

⁵¹ Yu keewoong' Yeesu kumwooy ng'aleechaa, kuteebee rubiikyii kule, “Okase ng'aleechuutechu?” Kuket rubiikey kule, “Ee, keekase.”

⁵² Yooto nanyuun kumwoochi icheek kule, “Kunyoo, kaaneetiin ake tukul nyee kiikiineet kurubta keey baytooyiisyeetaab Yeyiin, kukerkeey chii nyee inemu am chookeenyii tukuuk chee leelach ak chee yoosech.” ⁵³ Yu keewaany Yeesu kooneetiisyee tyoonkoochoochoo, kung'eetee yooto.

⁵⁴ Nto letuunoo kuyit Naasareet woloo kineree. Yooto kooneetiis am *Kootaab saayeet. Yu kakas biiko wolee kiineetitooy, koolat ankuteebee keey kule, “Wolee kinyoortooy chiichii ng'oomnatooni ak kaamukeyweechu bo kwong'uut ku ano? ⁵⁵ So! Mabo nee weeriitenyi kaatoong'iintoonoo? Ma kaamet nyoo keekuuree Maaryaa anku ng'eetaabkaamet oob Yaakobo, Yooseef, Simooni akoo Yuuta? ⁵⁶ Keeboonte keey oob mbo cheebkaamet tukul? Kunyi ii, konyoorta ano chiichi ng'aleechu tukul?” ⁵⁷ Kitay bichoo Yeesu. Nto tee yoo kumwoochi Yeesu bichooto kule, “Makeekoonyite *woorkooyoo am saang'nyii nto koong'waa, nteenee koonyite biikaab saang'ta ake.” ⁵⁸ Manaayeyee wolooto Yeesu ng'aleek chee chaang' chebo kwong'uut kuuyu kimeekoosee keey biiko inee.