Kuurkeetaab 14
1
Kikas baytooyiinteet *Eroote kyoomtooy Yeesu.
2
Kumwoochi motwoorikyii kule, “Batisaniinteet Yoowaana nyooto nyee kookung'eetee meet! Kiyooto nyi okase kuyeyiisyee kaamukeyweechoo bo kwong'uut.”
3
Kimiite yee kichoomnyo Eroote ak Erootyaa koorkeetaab ng'eetaabkaamet nyee kikeekuuree Filibo. Kimwoochine Yoowaana Eroote kule, makaraam intii ng'eetaabkoomet kusobe.”
4
Yooto koowuruur Erootyaa Eroote kukerta Yoowaana kootaab kibratiisyek.
5
Kimache yooto Eroote kubakach Yoowaana nteenee kiiywey biiko, kuuyu kichamtooy bichoo kule *woorkooyoonteet Yoowaana.
6
Nto miite yee kikyoome saakweet nyee king'erekyine Eroote besyeet nyee kikeesichee, chokutuumee cheebtaab Erootyaa taayeetaab biiko. Yooto kung'erech Eroote kut
7
koowoolchi keey cheebooto kule ikoochine kiyee kateeb.
8
Wokuteebee cheeboo kaamet nto tee yoo chokumwoochi Eroote kule, “Amache metitaab Yoowaana keeyibuneenoo kibseesweet!”
9
Yooto kwoorooken Baytooyiinteet, nteenee kuuyu kikiikoowoolchi keey cheeboo am taayeetaab tayeekyii, kumwaayta keeyechi kiyooto kiteebe.
10
Kunyoo kibokeechwenta metitaab Yoowaana am kaabratiisyo
11
nto yityo keeyibchinee cheebkey kibseesweet. Kunam cheeboo metooto ankuyibchi kaamet.
12
Letuunoo bukumuy Yoowaan rubiikyii nto yityo bukumwoochi Yeesu.
13
Yu kabokyoomchi Yeesu ng'aleechaa, kung'eetyee wolooto kimii ankwooyyee mweenkeet kumache kuba yee kimaleekit chii. Nto kukase biiko kuu nyooto, koosaab sakaramteetaab tooliileet kwaalach Yeesu.
14
Kurekunee Yeesu mweeng' ankukas biiko chee ki chaang' miisin, kukasyi kiisayta ankoosoobchi boorwek.
15
Nto kwiimene kooreet, koonookyi rubiik ankumwoochi kule, “Ntee kaakwiimen kooreet anku suurkweennyoo woli! Mwoochi bichu simkuroot subokwaalaat amiik chee kariibee moonikwaa.”
16
Kuwal Yeesu kule, “Meerook kuba. Okoochi akweek kiyee kaam.”
17
Kuketyi rubiik Yeesu kule, “Ntee mukaatiinek muut ak *burburiinek ayeeng' baateey chee keeboonte!”
18
Kumwoochi Yeesu kule, “Okoonoo baa amiichooto.”
19
Kumwooy Yeesu kule koobuur biiko yoo bo saatyeet. Nto miite yoo kunam mukaatiinekey muut ak burburiinekey ayeeng' ankukas barak kubirchi Yeyiin koonkoy. Nto yityo kubcheyaabchey ankookoochi rubiikyi kubchechinoot biiko.
20
Kyoomiis bichoo tukul kut kubiyoong'iis. Nto bere kooruruukoot rubiik amiik chee kikiituuchaat, kunyiy kereboonik taman ak ayeeng'.
21
Biiko chee kyaam amiichu ku murenik kisyeerook muut kumanaakiiyiitito cheebyoosook ak leekook.
22
Yooto bakeenke, kookiimchi Yeesu rubiikyii kulaany mweenkeet simkoonto kutakumii inee koo-amiise biiko.
23
Nto yu kaakoo-amiis bichoo, kootooch nkityo lekemeet ake barak wokusaay. Kwiimene kooreet kutakumii inee wolooto nkityo.
24
Yooto tukul, kikiikuwo mweenkeet tooliil kween ankiimii koosooyene wusooneet.
25
Nto yu kang'eeyen kooreet, kuweesyeetee Yeesu beeko barak akoy wolee kimii rubiikyii.
26
Nto bere kukas rubiikyii kuweesyetoonunee tooliileet, kumuuyo miisin ankumwooy kule, “Chii ee, nto ayiin!” Kumwooye kuu nyooto koonchooytoos bakeenke nyee kaakubootoon.
27
Yooto kumwoochi Yeesu rubiichoo kule, “Moomuye, nto yu anii nyoo.”
28
Kukase Betero kuu nyoo, kumwooye kule, “Yoo inyiing' ii, Mokoryoonteet, imwoowoo aweesyetee beeko barak akoy woloo imiite.”
29
Kuwalchi Yeesu Betero kule, “Choo naas.” Kurekunee Betero mweeng' ankootaar beeko barak ankutakyi keey Yeesu.
30
Yu kakas wusooneet, kunyokoriit ankutoow kuling'taat. Yooto kutooree kaanchooyto kule, “Wooy, ankiisarwo we, Mokoryoonteet!”
31
Kooyokooyto Yeesu awut ankunam Betero. Nto tee yoo kumwoochi kule, “So, ntee iyabe kuu nyi? Meekooseenoo keey?”
32
Nto yu kaakulaany tukwaay mweeng', kuteeman wusooneet.
33
Kukutunkyi biiko choo kimiite mweeng' Yeesu kumwooye kule, “Kubooyiit man, inyiing' Lakwataab Yeyiin.”
34
Nto yu kaakwaay, bokooyyoonyee yee kikeekuuree keneesareet.
35
Yu keenket biikaab wolooto kule ki Yeesu nyooto, kukuurootee biiko soong'wek chee ki laatoos. Kikiimutyi Yeesu biiko tukul chee kimnyoontoos.
36
Kusoom bichooto kimnyoontoos Yeesu kule, “Ichamweech keetiiny maaseekaab kotootookaab sireeng'uung'.” Kisob chii ake tukul nyee kitiiny maaseechaa.