¹ Nto mii besyeet ake, kukwaanee *Farisaayeek ak kaaneetikaab kiruutek Yeerusaleem ankuteebee Yeesu kule, ² “Am nee yu marube rubiikuuk ntasimuutekaab mbo kuuko? Ntee meentasiime icheek awunnyek nto amiisye?”

³ Kuwalchi Yeesu kule, “Ntee okwetyine akweek makuutekaab Yeyiin ankoorub atebuutekaab mbo kuukoong'? ⁴ Kimwooy oob Yeyiin kule, 'Iywey koon ak koomet?' Chii nyoo chube kwaan nto kaamet, kunyoolchine meet.' ⁵ Nteenee omwooye akweek kule yoo kamwoochi chii kaamet nto kwaan kule, 'Kiito ake tukul nyoo kataakoonook, kukyaasat kubo Yeyiin,' ⁶ nto yooto meebere machaktoos kooywey sikiikyii. Omoontooy akweek kuu nyiitenyi ng'alyoonteetaab Yeyiin ankoorub atebuutekwook nkit. ⁷ Oyeye keey soo kutyaa kule ochurtootiin! Kibeer woorkooyoontoonoo bo Yeyiin *Isaaya yoo kimwooye kule: ¹⁰ Nto mii yoo, kumwoochi Yeesu biiko kusiisyi keey inee nto yityo kumwoochi kule, “Okas baa ng'alyoontooni: ¹¹ Meebere kiyee iwute kuutiitaab chii nyee yeye chiichoo kumatililiit, nteenee nyee yeye kumatililiit ku kiyoo choonee kuutiinyii.”

¹² Yu keewaany Yeesu kumwooy kuu nyooto, koonookyi rubiikyii, ankumwoochi kule, “Keenket inyiing' kule kang'woonchi *Farisaayeek ng'aleechaa keemwooye?”

¹³ Kuwalchi Yeesu kule, “Makeeng'eyta keet ake tukul nyee kimachoone Baaba nyoo mii kibkoonkoy. ¹⁴ Kunyi mooyiimee keey akweek Farisaayeecha. Koryootiin bichoo. Nto yoo keentoochi cheebkoraatyaanteet ake ake, koosuuchine tukwaay ng'ween.”

¹⁵ Yooto kumwooy Betero kule, “Iboorweech ng'aleechaa bo tiliilinto.”

¹⁶ Kuwaalchi Yeesu kule, “So, akoo manoonket kura? ¹⁷ Moonket akweek kule kiy ake tukul nyoo weetee kuut kuweetii moo ankuwokucho saang'? ¹⁸ Nto ng'aleek choo kwoonee kuut kukwoonee choo met anku chooto chee yeye chiito kumatililiit. ¹⁹ Kiyee choonee met ku kaasooteyweek chee miyootech kuu chebo rumiisyeet, martaayeet, sikornateet, choorseet, mololchinooyeetaab ng'al ak ng'oomseet. ²⁰ Tukuuk chooto chee yeye chiito kumatililiit. Nteenee yoo koomiis chiito kumaneentasiim awut, mayeye yooto kumatililiit choochoo am wolee mii Yeyiin.”

²¹ Yu kang'eetee Yeesu yooto akoo rubiikyii, kuwo akoy kooreetaab kiriinkeetaab Tiiro ak Sitoon. ²² Yooto kuchoonchi cheebyoosyeet ake nyee kima cheebyuutayaa. Kiboloobol kumwooye kule, “Mokoryoonteet, *Mochokoreetaab Tawuti, ankiriireenaa! Mii kooyiime cheebnyuu tamirmiryeet nyee miyaat.”

²³ Manaawalchi Yeesu cheebyoosyaanaa ng'alyoo am baanaa. Yooto kubeechi rubiik Yeesu ankusaysaay kule, “Mwoochi, naas, kuweechi keey ntee kaboloobol kuu nyi.”

²⁴ Kuwalchi Yeesu cheebyoosyaanaa kule, “Cheebyoos, kikiiyookwoo anii baateey wolee miite biikaab *Israyeel choo kechiir choo kiikubootyo.”

²⁵ Koonookyi cheebyoosyeet Yeesu, kukutunyee taayeenyii ankumwoochi kule, “Ankiiyeetyeechoo oo, Mokoryoonteet!”

²⁶ Kuleenchi Yeesu, “Makaraam kiinem amnyoonteetaab leekook ankeemetyi ng'ookin.”

²⁷ Kuwalchi cheebyoosyaanaa kule, “Wuu nyooto sinee oo, Mokoryoonteet, ntee ame mbo ng'ookin seeserik yoo amiisye biikwaa.”

²⁸ Yu kamwooy cheebyoosyaanaa kuu nyooto, kuwalchi Yeesu kule, “Cheebyoos, kuuyu ikooseenoo keey miisin, kaakeechamuung' kuu woloo keemaktooy.” Kumwooye Yeesu kuu nyooto kusobe bakeenke cheebtaab cheebyoosyaanaa.

²⁹ Nto tee yoo kung'eetee Yeesu yooto kumur sakaramteetaab Toolileetaab Kalilaaya, kiitooch yee toroor ankoobuur ng'weny sukooneetiis. ³⁰ Kikiimutyi biiko chee chunkutootiin, chee koryootiin, chee sonkochootiin, chee kiratakiis ng'elyebik ak alak chee chaang' ankiikoochi taayeetaab Yeesu. Koosoob Yeesu bichooto tukul. ³¹ Yu kakas biiko kung'aloole choo kikiratakiis ng'elyebik, kasobcho choo kisonkochootiin, kubeesyeet choo kichunkutootiin ankukasta choo kikoryootiin, koolat ankusilto Yeyiinteetaab *Israyeel.

³² Nto miite yoo kukuur Yeesu rubiikyii ankumwoochi kule, “Ntee kaariiree bichu. Kookiibuurte keey besyoosyek somok amamii kiyee ame! Meebere maamwoochi kuba kumanaa-am kiy kuuyu imuuche koomiistoochi kemewuut keeltaab too.”

³³ Kuwal rubiikyii kule, “Nto wolee sikeenyoorta amit chee yeme biich chee tee chu am suurkweenooni ku ano?”

³⁴ Kuteebee Yeesu kule, “Oboonte mukaatiinek ata?” Kuwalchi rubiik kule, “Keeboonte tisab ak burburiinek chee ng'eri.” ³⁵ Yooto, kumwoochi biiko koobuur ng'weny nyee katet keey. ³⁶ Nto tee yoo kunam mukaatiinechaa tisab ak burburiinek, nto yu kaakubirchi Yeyiin koonkoy, kubcheyaabchey ankookoochi rubiik kubchechinoot biiko. ³⁷ Kwoomiis biiko tukul kut kubiyoong'iis. Nto yu keeruruuchoot rubiik amiik chee king'et, koonyiit kereboonik tisab. ³⁸ Nto laatitaab biiko chee kyoomiis, ki kisyeerook ang'wan kumanaakiiyiitito cheebyoosook ak leekook. ³⁹ Nto mii yoo nanyuun, koo-amiis Yeesu biiko kubeechi keey ankulaany inee mweenkeet akoo rubiikyii ankuwo akoy saang'ta ake nyee kikeekuuree Makataan.