¹ Nto miite besyeet ake, kukwoonchi *Farisaayeek akoo *Satukaayeek kumache kutyem. Kimwoochi kuyechi icheek kiy nyebo kwong'uut sukoonketee kule boonto inee kaamukeyweek chee kwoonee kibkoonkoy. ² Nteenee kuwalchi Yeesu kule, “Yoo imene, omwooye akweek kule, 'Makumuses tuun kooreet, kuuyu arraa woliin bo barak.' ³ Nto yoo bo korroon, omwooye kule, 'Yiiwoot ra, kuuyu kaarraniit woliin bo barak ankutuuluunkenoot.' Onkete akweek kiyee ibooru woliin bo barak yoo kaarraniit amoonkete kiyee ibooru ng'aleek chu okase kuyeyaktoos. ⁴ Biich chee miyootech choo kiikutewechakiis chee teebe keeyechi kiy nyebo kwong'uut. Ng'aleek baateey chebo kwong'uut chee makiiboorchi ku choo kibo Yoona.” Yooto kubakaakta Yeesu bichooto ankuweetee mweenkeet ak rubiikyii.

⁵ Nto yu kayit toolileet biitooniin, koosoot rubiik kule kikiikuwuutyee mukaatiinek. ⁶ Kumwoochi Yeesu kule, “Oriibee keey kiyee bayeenook Farisaayeek ak *Satukaayeek.”

⁷ Kung'alaalee rubiichoo ng'aleechaa ankumwooy kule, “Kamwooy kuu nyooto kuuyu manaakeenamaanu mukaatiinek.”

⁸ Nto yu keenket Yeesu kiyee kung'aloolee rubiikyii, kuteebee kule, “Mookooseenoo keey karoomin? Am nee yu omiite omwooye kule manoonamaanu mukaatiinek? ⁹ Manoonket kiy akoy kura? Moosoote mukaatiinechaa ki muut choo kyoome biiko kisyeerook muutu ak kaatuukanik choo kyooruruuche kunyiy kereboonichoo? ¹⁰ Nto mbo naas mukaatiinechaa ko tisab choo kyoome biiko kisyeerook ang'wanu ak kaatuukanik choo kyooruruuche kunyiy kereboonichoo? ¹¹ Am nee simoonket kule kamaang'aloolwook kurubta keey amiik?! Kaamwoowook, oriibee keey kiyee bayeenook Farisaayeechaa ak Satukaayeechaa!” ¹² Yooto nanyuun, koonket rubiichoo kule meebere kimwoochine icheek Yeesu kuriibee keey amiik nteenee kimwoochine kuriibee keey kaaneetuutekaab Farisaayeek ak chebo *Satukaayeek.

¹³ Yu kawokuyit Yeesu akoo rubiikyii roorookeetaab *kiriinkeetaab Kayisareeya Filiibi, kuteebee rubiikyii kule, “Mwooye biiko kule *Weritaab Chii ku ng'oo?”

¹⁴ Kuwalchi rubiik kule, “Mwooye alake kule inyiing' Batisaniinteet Yoowaana, kubere alake *Eliiya, nto alak kumwooye kule Cheremnyaa nto ku ake am *woorkooyikaab Yeyiin nyee kaakung'eetee *kaabkwoombiich.”

¹⁵ Kuleenchi Yeesu, “Nto akweek, obere anii ku ng'oo?”

¹⁶ Kumwooy Simooni Betero kule, “Inyiing' *Kaararookiinteet, Lakwataab Yeyiin.”

¹⁷ Yooto kumwooy Yeesu kule, “Simooni araab Yoona, iberuuroot. Ma chii nyee kang'oong'uung' ng'aleechu, nteenee Baaba anii nyoo miite kibkoonkoy. ¹⁸ Kunyi, maakuuriing' kule Betero anku maateekyi kitawaani kaniuseet nyee meebele Buunyoonteet. ¹⁹ Maakooniing' kaamukeyweek chebo Baytooyiisyeetaab Yeyiin. Kiy ake tukul nyee ikere am koorooni, makeeker am kibkoonkoy. Nto nyee iyoote am koorooni, makeeyaat am kibkoonkoy.” ²⁰ Yu keewaany Yeesu kumwooy kuu nyooto, kookiimchi rubiikyii masimkumwaaytaat kule inee Kaararookiinteet.

²¹ Kuchakee yooto kuwo taay kutoow Yeesu kumwoochine rubiikyii kule akoy kuwo inee Yeerusaleem ankubuntee nyaliluutek chee chaang' am awunnyekaab booyik, mbo *kibkoros chee wooyech ak kaaneetikaab kiruutek. Kimwooy mbo subak kule akoy keebakach inee nto miite besyeetaab somok kiing'eetee meet.

²² Yooto kuweeto Betero Yeesu komos ankumwoochi kule, “Acha oo, Mokoryoonteet! Meerook kuyeyakiis ng'ala chee wuu choo am wolee imiite!”

²³ Yooto kootuukyi Betero batay ankumwoochi kule, “Sateenaa keey we, Syeetaani! Meeyeku kaanakuut am wolee amiite. Isoote kuu wolee isootitooy biiko, ameebere kuu woloo maktooy Yeyiin.” ²⁴ Nto tee yoo kumwoochi Yeesu rubiikyii kule “Chii ake tukul nyoo mache kurub ng'aleekyuu, kuyetee keey tukuukaab koorooni ankukalab murtooywoonteenyii, ankuruba, amanyokoriit meet. Yoo kaakucham kuyey kuu nyooto, kuruba. ²⁵ Nyoo kayeetyi keey soboontaab koorooni, makooboot soboonnyii bo kibchuulyo. Nto nyoo keekooyto soboonnyii am koorooni kubo anii, makunyoor *soboontaab kibchuulyo. ²⁶ Karoomnyo nee nyee nyooru chii yoo keetukuulchi keey tukuukaab koorooni ankooboot soboonnyii bo kibchuulyo? Nto kiy nee nyee imuuche chii kuwalee soboonooto? ²⁷ Amiite anii, *Weritaab Chii waachoonii am lebkeeyyeetaab Baaba ak malayikaanikyii, ankuchaayechi chii ake tukul kurubta keey kiyee kiikuyey. ²⁸ Kaamwoowook, mii biiko alake yu chee mabeku kumanaakas Weritaab Chii kuyitu baytooyiisyeenyii.”