¹ Nto yu kakeeyta besyoosyek lo, kulaang'ta Yeesu akoy tulweet ake barak, kuboontoote keey Betero, Yaakobo ak Yoowaana ng'eetaabkaametiitaab Yaakobo. ² Kumiite wolooto, kuweek eertaab Yeesu kukase rubiik, koolekecheech kuu asiista. Kileelakiitu nkicheek sirookyii kule mang'! ³ Yooto kukas rubiichoo *Muusa ak *Eliiya kwoome lokooy ak Yeesu. ⁴ Kuleenchi Betero Yeesu, “Mokoryoonteet, karaam nyee tyaa keemiite yuuteyu. Kany ateech keryoonik somok, nyeeng'uung', nyebo Muusa akoo nyebo *Eliiya.”

⁵ Kutakung'aloole Betero, kucho boolteet nyee ki lebkeey miisin ankoolaambuuch icheek ankuchoonee kuutiit booltaanaa kumwooye kule, “Lakwanyuu nyi nyee achame ankaang'erekyine. Kunyoo, okasyine kiyee mwooye.”

⁶ Yu kakas rubiichoo kuutiinaa, kumuuyo ankoobutyi ng'weny kukubuy kuut. ⁷ Kuwo Yeesu yooto ankutabtab icheek kumwoochine kule, “Moomuuye, ong'eetye.” ⁸ Nto yu keetoroor rubiichoo metewook, mamiite chii ake tukul nteenee Yeesu nkit.

⁹ Yu kimii kurekunee lekem, kookiimchi Yeesu rubiichoo kule, “Moomwoochi chii kiyee kookas, akoy yoo kaakiing'eetee *Weritaab Chii meet.”

¹⁰ Kuteebee mbo Betero Yeesu kule, “Am nee naas, sukumwooye kaaneetikaab kiruutek kule machaktoos kooyeew *Eliiya kurook, nto choonii *Kaararookiinteet?”

¹¹ Kuwalchi Yeesu kule, “Mwooye bichoo man. Intoowu *Eliiya sukukaramiit kiy ake tukul. ¹² Kaamwoowook, kiikucho Eliiya ankimeenkete bichoo, nteenee kiyeyee kiy ake tukul nyee kimache. Nto am keelto nyee wuu nyooto, makunyalil *Weritaab Chii am awunnyekaab bichooto.” ¹³ Yooto nanyuun koonket rubiichoo kule kimiite Yeesu kung'aloolee Batisaniinteet Yoowaana.

¹⁴ Yu kaakurek Yeesu ak rubiichoo, kuba akoy yoo kimii rubiik chuut alake kuboonto keey biiko chee choong'ech chee kikiikooruruuch keey. Yooto, kucho chiito ake ankukutunyee taayeetaab Yeesu ¹⁵ ankumwoochi kule, “Mokoryoonteet, riiree werinyuu nyee boonto mewuunkook. Iyiime booroo miisin kutoorchine kwaak ma nto ku beeko. ¹⁶ Kaamutyi rubiikuuk nteenee manaakoomuuch.”

¹⁷ Yooto kumwooy Yeesu kule, “Kunuurech soo, biiko alake nyee tyaa. Nto yu manookaaseenaa keey! Maabuurtook akoy ayu? Maamuytoochook akoy ayu? Omutwaa anii weeroo.” ¹⁸ Koobebeeto Yeesu tamirmiryoonoo miyaat kung'eetee weeroo. Yooto, kusob weeroo bakeenke.

¹⁹ Nto miite yoo kuboonto keey Yeesu ak rubiikyii, kuteebee rubiik kule, “So, am nee simakiimuuch acheek tamirmiryoonoo miyaat?”

²⁰ Kuwalchi Yeesu kule, “Kuuyu mookooseenoo keey karoomin. Kaamwoowook, nto oboonte kaakaaseet nyee mining' nyee tee kebuswoonteetaab *aritaaliit, nto omuuche omwoochi tulwooni kule, 'Ng'eetee yu ankiiwo yuun' kung'eete. Mamii kiy nyee ibelook. ²¹ Meemuuchaktoos tamirmiryeet nyee wuu nyooto, yoo manoosaay ankookir amiisyeet.”

²² Nto yee kimiite kubeesyete tukul am Kalilaaya, kumwoochi Yeesu rubiikyii kule, “Mii bokiiyokoochine *Weritaab Chii awunnyekaab biikaab koorooni. ²³ Makeebakachaa nto miite besyeetaab aomok kiing'eeteenaa meet.” Kiyey yooto kwoorookeniis rubiik miisin.

²⁴ Yu kayit Yeesu ak rubiikyii Kaabernaam, kukwa kaaruruukiikaab *syuuruutaaqb *Kootaab Yeyiin ankuteebee Betero kule, “Makweye kaaneetiinteeng'woong' syuuruut nyebo Kootaab Yeyiin?”

²⁵ Kuwalchi Betero kule, “Kweye.” Kuwo Betero ko, nto baanta nyooto mache kung'alaal, kumwoochi Yeesu kule, “Ikase inyiing' kule nee oo, Simooni? Ng'oo nyee kwechine baytooyikaab koorooni syuuruut? Lokokwaa nto biiko alak?”

²⁶ Kuwalchi Betero kule, “Kwechine biiko alake.” Kumwoochi Yeesu kule, “Akoo tookunoot kule makweye kiy leekook. ²⁷ Nteenee yoo simakeekustoochi bichu, iwo akoy tooliil ankiiwiirchi ntawaaniit beeko. Nto *burburyoonteet nyoo bo taayta inam, ing'aany kuutiinyii. Meenyoorte ariit beesyaanteet nyee yeme kukweytee biiko ayeenku syuuruut. Iyibchi bichoo kubo syuuruut nyeenyuu akoo nyeeng'uung'.”