¹ Nto mii besyeet ake, kuteebee rubiik Yeesu kule, “Ng'oo nyee woo am baytooyiisyeetaab Yeyiin?”

² Kukuur Yeesu leekwa nyee mining' kooyyoong'to keey rubiik ³ ankule, “! Kaamwoowook, yoo kamooweekse obuur kuu woloo wuunto leekooy chee minkeech, makoy koowut chii am akweek baytooyiisyeetaab Yeyiin. ⁴ Kunyi, nyoo yibe keey ng'weny kuu leekwa, ku woo nyooto miisin am baytooyiisteetaab Yeyiin. ⁵ Nto nyoo torooche chii nyee wuu lakwani am kaayneenyuu, kukaakutoroochaa anii. ⁶ Chii nyoo kaken ake nyee takukuskus am kaayeneet, kumisyine keeratyi rwaa nyee woo kaat ankeetoorchi araaray kuling'ta.

⁷ Tyaa soo ng'wooninto nyee makunyoor biiko choo kentooy biich. Mii biiko chee makuken biiko alak kutaya, nteenee makung'woonchi soo kule nee chiichoo kane ake. ⁸ Yoo keesakyiing' awung'uung' nto kereenkeeng'uung' itaya, itilte! Kaykay inyooru *soboontaab kibchuulyo iboonte awut akeenke nto ku kereeng' akeenke kusiir iboonte awunnyek tukwaay nto ku kereenkook tukwaay ankeetoorchiing' wolee bo maataab kibchuulyo. ⁹ Yoo keesakyiing' koong'uung' itaya, ilootu! Kaykay inyooru *soboontaab kichuulyo iyuu kimekoong'nyaa kusiir iboonte koonyek tukwaay ankeetoorchiing' wolee bo maataab kibchuulyo.” ¹⁰ Kitas taay Yeesu kumwoochi rubiikyii kule, “Oriibe keey! Moomoontooy ake tukul am chu takung'arng'ar. ¹¹ Kubooyiit man, tinye icheek malayikaanikwaa chee boonto keey Baaba am kibkoonkoy akookoy. ¹² Yoo boonto chii keechiirekyii bokol ankubot akeenke ii, kuyeye kule nee? Bakookyine oob chuut tamanwookiik sokool ak sokool ankuwokucheeng'aat nyoo kabote? ¹³ Kubooyiit man, ng'ereche miisin kubo nyooto akeenke kusiir chuut alak. ¹⁴ Am keelto nyee wuu nyooto, machame koon nyoo mii kibkoonkoy kubot mbo akeenke am bichoo takung'arng'ar.”

¹⁵ Kitas taay Yeesu kumwooy kule, “Yoo kachoolwookenchiing' ng'eetaabkoomet iweeto komos ankuweeboorchi leeluutyeenyii. Nto yoo kakasuung', 'kukeeyisu inee. ¹⁶ Nteenee yoo kamakasuung', iweete keey chiito ake nto ku biich ayeeng'. Sukumiite biiko ayeenku nto somoku chee chamchiintoos kule wuu nyooto sikiitiil ng'alyoo. ¹⁷ Nto yoo kamakasyi bichoo, omwoochi booyikaab kanisa ng'aleek tukul. Nto yoo kamakasyi booyichoo, oyib inee kuu woloo keeyibtooy choo nyoo chii nyoo meenkete Yeyiin nto ku kaaruruukiinteetaab *syuuruut.” ¹⁸ Kitas taay Yeesu kumwooy kule, “Kiy ake tukul nyee okere am koorooni, makeeker am kibkoonkoy. Nto kiyee oyoote am koorooni, makeeyaat am kibkoonkoy. ¹⁹ Amwoowook subak kule, yoo kakasyiin biiko ayeenku am koorooni yoo sooye kumache kiito ake, kuyechine Baaba am kibkoonkoy kuu wolee kamaktooy. ²⁰ Yoo katuuyo biiko ayeenku nto ku somok kuyeyiisyee kaayneenyuu, aboonte keey ak icheek.”

²¹ Nto miite yoo kuteebee Betero Yeesu kule, “Mokoryoonteet, machaktoos anyoochi kaat ng'eetaabiya areet ata yoo kachoolwookenchoo? Ara, akoy areet tisab?”

²² Kuketyi Yeesu kule, “Meenyoochine kaat areet tisab baateey, nteenee kunyil tamanwookik tisab ak tisab.” ²³ Yooto kumwooy Yeesu kule. “Wuu nyi baytooyiisyeetaab Yeyiin: Kimwoochi baytooyiinteet wootwookikyii kukwa bokeeng'alaalee wolee kiwuu yiisyoonuutekwaa. ²⁴ Kiboonto wootwookiinteet mnyee kibo taay besento nyee woo miisin. ²⁵ Nto kuuyu kiwo besenoo nyee kimeemuuche kuyaakta, kumwooy mokoryoonteet kule kyaalta wootwookiintoonoo ak kanyii kunam wolee mii cheebyoosyeenyii, lokokyi ak kiy ake tukul nyee kiboonto keeyaaktee besenooto. ²⁶ Kukutunyee wootwookiintoonoo taayeetaab mokoryoonteenyii ankuriiree keey kule, 'Leyye, mokoryoonteet, teekoonoo soo barooyinto saayokuung' besenng'uung' tukul.' ²⁷ Kuriiree mokoryoontoonoo chiichoo ankoomiisyi besenooto kootyaaktaayakay. ²⁸ Nto yu chuytooy wootwookiintoonoo saang' kutuuyee wootwookiinteet nyiin ake. Kiboonto nyoo besentaab nyiitenyi nyee mabo laat. Yooto kuteryekyine nyiin kumache kookeet ankubere, 'Yookwoo besennyuu!'

²⁹ Kukutuny nyiin ankusaaysaay mureetkeey kule, 'Murooni, teekoonoo barooyinto ee, we, saayookuung' besenng'uung'.” ³⁰ Nteenee kitayiis chiichoo ankukwer nyiin akoy kook wokurat akoy besyeet nyee kayaaktee! ³¹ Nto yu kakas wootwookik chuut alake kiyee kayeyakay, kunereekiis miisin ankubokumwoochi mokoryoonteeng'waa kiyee kiyeyakay.

³² Yu kakas mokoryoonteet ng'aleechaa, kukuur wootwookiintoonoo ankumwoochi kule, 'Iyeku sikoran. Yu kweeriiree keey inyiing' amiisuung' anii besenoo kweeboonte tukul. ³³ So, kwaaming' nee simeeriiree nkinyiing' wootwookiinteet nyiin ake?' ³⁴ Kinyeer mokoryoontoonoo ankunam chiichoo kukerta ko kung'woonchi akoy kuyaakta besentaab biich tukul. ³⁵ Kunyi, makuyewook Baaba nyoo mii kibkoonkoy kuu nyooto yoo moonyoochine keey kaat.”