Kuurkeetaab 19
1
Yu keewaany Yeesu kumwooy ng'aleechaa, kung'eetee Kalilaaya ankutakyi keey yeemeetaab Yuuteeya. Kisyebunee biiteetaab koong'asiis nyebo ayneetaab Yoortaan.
2
Kurub am wolooto biiko chee chaang' ankoosoob choo kimnyoontoos.
3
Nto tee yoo, kukwoonchi Farisaayeek alake Yeesu kumache kutyem, ankuteebee kule, “Chamweech kiruutek kukwet chii koorkeenyii kubo ng'alyoo ake tukul?”
4
Kuwalchi Yeesu kule, “Manoosuman akweek siruutek yoo mwooye kule, yu kitoowu Yeyiin kuyeye kooreet, 'Kiyey muren ak koorko,'
5
ankumwooy kule, 'Kiyooto nyee yeye muren kung'eetee kootaab kwaan ak kaamet ankoomut koorkeenyii ankunoomnyo tukwaay kuyek kiy akeenke.'
6
Meebere taku biich ayeeng', nteenee kaakuyek kiy akeenke. Kunyoo, meebeesyo chii kiyee kiikoonoomnyo Yeyiin.”
7
Kuteeb subak Farisaayeechaa kule, “Am nee sukumwooy *Muusa kule, kusirchine saanteet koorkeet barweet nyee baree kooyeeyto nto kwete kookeet?”
8
Kuketyi Yeesu kule, “Kichamwook akweek *Muusa okwete kooruukwook kuuyu wuuyech mukuuleywekwook. Nteenee kimawuu nyoo yu kibo taay.
9
Kaamwoowook, chii nyoo kwete koorkeenyii am ng'aleek chee maname keey ak martaayeet, ankule keemut koorkeet ake, kukaakumarta chiichoo.”
10
Yooto kumwoochi rubiik Yeesu kule, “Yoo akoo wuu chu ng'aleek am wolee miite mureno ak koorkeenyii kukaykay kumeemutiis chii.”
11
Kuwalchi Yeesu rubiikyii kule, “Meemuuche chii ake tukul kucham ng'aleechu, nteenee choo kiikung'oonkyi Yeyiin.
12
Choong'ech ng'aleek chee yeye biiko kumakeesyo. Miite alake chee kikeesiche kumeemuuche kusich, kukilate alak biiko nto alak, kitay keesyeet kubo baytooyiisyeetaab Yeyiin. Nyoo imuuche kucham, kucham.”
13
Nto miite yoo, kiimutyi Yeesu leekook kule kutiinyee awunnyek kooberuur. Nteenee kiiburyoong'to rubiikaab Yeesu bichoo.
14
Kumwoochi Yeesu kule, “Mooraany, nteenee obaroochi lokochu minkeech kukwa wolee amiite, kuuyu biiko chee wuu chuutechu chee iwute baytooyiisyeetaab Yeyiin.”
15
Yooto, kooberuur lokochoo, nto yityo kuweechi keey.
16
Nto miite besyeet ake kucho chiito ake ankuteebee Yeesu kule, “Kaaneetiinteet, nee nyee karaam nyee machaktoos ayey saanyooru *soboontaab kibchuulyo?”
17
Kuwalchi Yeesu kule, “Am nee yu keeteebeenaa kurubta keey kiy nyee karaam? Yeyiin baateey nyee karaam. Nto yoo imache siiminy nyee karaam, iriib kiruutekaab Yeyiin.”
18
Kuteebee chiichoo Yeesu kule, “Imwooye kiruutek nkocho?” Kuleenchi Yeesu, “Meebakach chii, meemarte, meechoorse, meeratyi chii ng'wiiynan,
19
iywey koon ak koomet ankiicham laatyeeng'uung' kuu woloo ichamtooy keey.”
20
Kumwooy chiichoo kule, “Ntee arube kiruutechu tukul. Ara nee nyee taakustaat?”
21
Kuwalchi Yeesu kule, “Yoo imache siichurte, wee-alte kiy ake tukul nyee iboonte ankiikoochi banoonik kiyee keenyooru. Yoo keeyey kuu nyooto, irubwaa. Meenyooru baytit nyebo man am kaab Yeyiin.”
22
Yu kakas chiichoo kuu nyoo, kusimikta nyee kang'woonchi, kuuyu ki woo baytit nyee kiboonto.
23
Nto tee yoo kumwoochi Yeesu rubiikyii kule, “Wuuy soo kule nee kucham chiito nyee boonto baytit baytooyiisyeetaab Yeyiin.
24
Kaamwoowook, nyumnyum koowut *tembes koong'taab sintaaniit kusiir koowut chii nyee boonto baytit kaab Yeyiin.”
25
Yu kakas rubiik ng'aleechaa, kumuuyo miisin ankumwooy kule, “Ara ng'oo naas, nyee imuuche kiiraraach?”
26
Yooto koorootoot Yeesu rubiichoo ankumwooy kule, “Meemuuchaktoos ng'aleechu am wolee mii chiito, nteenee imuuchaktoos kiy ake tukul am wolee mii Yeyiin.”
27
Yooto, kumwooy Betero kule, “Keenyoru nee acheek chu kookeebakaate kiy ake tukul ankeerubiing'?”
28
Kumwoochi Yeesu kule, “! Kaamwoowook, yoo baytooyiisye *Weritaab Chii ak Yeyiin am kooreet nyoo leel, 'moobaytooyiisye akweek rubiikyuu taman ak ayeeng'. Mootiilchine ng'aleek arootunweek taman ak ayeeng' chebo Israyeel.
29
Nto chii ake tukul nyee kaakubakaakta koorin nto mbo ng'eetaabkaamet nto mbo cheebkaamet nto kwaan nto kaamet nto leekook nto ku mbareenik kubo anii, makunyoor tukuuchoo kunyil bokol nto miisin, makunyoor *soboontaab kibchuulyo.
30
Nteenee biiko choo yibe keey barak am koorooni makubooyiit let am kaab Yeyiin, nto nyoo yibe keey ng'weny am koorooni makubooyit taayta am kaab Yeyiin.”