¹ Kitas taay Yeesu kumwooy tyoonkoocheet ake kule, “Wuu nyi baytooyiisyeetaab Yeyiin. Kimii chiito ake nyee kiboonto mbareenyii nyebo *musabiibuunek. Kimusta chiichoo besyeet ake korroon wokucheeng' biiko chee kayechi yiisyeet am mbaraanaa. ² Yooto kukasyiin chiichoo ak biikaab yiisyeet kule makukwechi bichooto beesaanik chee kikeeyeyiisyee am besyeet akeenke. Yooto nanyuun kukwer bichoo mbareen. ³ Nto yee ki asiiswek somok chebo korroon, kuwo chiichoo wolee kikiiruruukyi keey biiko kumache yiisyeet. ⁴ Kumwoochi chiichoo bichoo kule, “Obe nkakweek booyeyiisye mbareeng'waanii, saakwewook kiyee yemaat.' ⁵ Kuba bichoo. Kiiyeey chiichoo yooto asiiswek chee kimache kuyite lo ak yee kimii asiiswek sokool wokukwer biiko alak. ⁶ Chokuwo subak yee kimache kumii asiista taman ak akeenke. Kunyoor subak biiko alak chee kimii keeyyoong'iis. Kuteebee choo kule, 'Am nee sooyyoonyee akweek yu kwiimen?'

⁷ Yooto kuwal bichoo kule, 'Keemiite yu kuuyu mamii chii nyee kaakusireech keeyechi yiisyeet.' Kumwoochi chiichoo bichoo kule, 'Okwaa nkakweek booyeyiisye am mbareeng'waanii.' ⁸ Nto yu kararakta asiista, kumwoochi chiichoo kibo mbareenyii chiinyii nyee kiiyyoonkyine yiisyeet kule, 'Kuur biikaab yiisyeet tukul ankiikwechi beesaanikwaa choo kayeyiisyee. Itoowunee choo kakeesire let ankiitas taay akoy choo kakeesire taay.'

⁹ Yooto nanyuun, kukwa biikaab yiisyeet choo kikeesire asiistaab taman ak akeenke ankeekwechi beesaanik chee kikeeyeyiisyee besyeet akeenke. ¹⁰ Nto yu kakwa choo kikeenyooyee keesire, kubere toos makeekwechi chee chaang' kusiir chuut, nteenee kikeekwechi icheek tukul beesaanik chee kikeeyeyiisyee besyeet akeenke. ¹¹ Kutoow akeenke kuwookuutyee chiitaab mbareet ¹² kumwoochine kule, 'So, ntee kayeyiis bichu katakeesire asiista akeenke buch, ankii-ayeecheeneech acheek chu kakyaamee keey yiisyeet ankeeyootu asiistaab beet?'

¹³ Kuwalchi chiitaab mbareet chiichooto kule, 'Leyye, tilyaani, nee nyee miyaat? Kakeekasyine oob kule makeekwewuung' beesaanik chebo besyeet akeenke? ¹⁴ Weechi keey! Kaacham akwechi chiito nyoo kachoonii let beesaanik chee tee cheekuuk. ¹⁵ Akoo maaboonte anii kaamukeyweek ayeyee beesaanikyuu kiyee kiyee amache ayeyee? Nto katuuyiitiing' keey moo kubo mooyeenyuu nyee leel oo?'” ¹⁶ Yooto kooteryeech Yeesu kule, “Nteenee biiko choo yibe keey ng'weny makubooyiit taayta, nto choo yibe keey barak makubooyiit let.”

¹⁷ Nto yu kimiite Yeesu kootooche Yeerusaleem kuweeto rubiikyii taman ak ayeeng' komos ankumwoochi kule, ¹⁸ “! Kookas, kemiite keebeetii akoy Yeerusaleem. Mabokiiyokoochi *Weritaab Chii mbo kibkoros chee wooyech akoo kaaneetikaab kiruutek. Makooruustaa keebakachaa ¹⁹ ankiiyokoochi biikaab Rooma. Makiintosuurto ankeebirseet keelalchi ankeekwertoochi *murtooywoonteet. Nto miite besyeetaab somok makiing'eetee meet.”

²⁰ Nto miite yoo, kuchoonto cheebyoosyeetaab Sebetaayo werikyii ankukutunyee taayeetaab Yeesu kumache kusoomso.

²¹ Kuteebee Yeesu kule, “Imache nee?” Kuwal cheebyoosyaanaa kule, “Chamwoo koobuuruneeniing' werinyuu ake awutaab taay koobuurunee ake awutaab kaataam am Baytooyiisyeeng'uung' nyoo choonii.”

²² Kumwoochi Yeesu kule, “Moonkete kiyee osoome. Omuuche akweek ocham obuntee nyaliluutek chee maanyooru anii?” Kuwalchi bichoo Yeesu kule, “Kiimuuche.”

²³ Kumwoochi Yeesu kule, “Moonyaliilche sinee kuu anii, ankoo kuwuu nyooto, maaboonte kaamukeyweek akoonook atebto nyebo awutaab taay nto ku nyebo kaataam. Baaba Yeyiin nyee yeytoochine barooyinwechoo.” ²⁴ Yu kakas rubiik chuut alake tamanu ng'aleechaa, kunyeerchi murechooto ayeeng'. ²⁵ Yooto kukuur Yeesu rubiichooto tukul ankumwoochi kule, “Onkete kule baytooyik chee mii koorooni kumache kooboorchi biiko alak kule icheek chee baytootiisye ankuboonto kaamukeyweek kubiir chuut. ²⁶ Nteenee mookany kuwuuyiit nyooto am wolee omiite akweek. Kunyoo yoo mache chii am akweek kuyek nyee woo, kumachaktoos kuyeetyeechine chuut. ²⁷ Nto nyoo mache kubaytooyiis, kumachaktoos kuyechine chuut yiisyeet. ²⁸ Kyaachoonii *Weritaab Chii sichaayechi biiko yiisyeet, ameebere kyaachoonii subokeeyewoo. Kichaakooyte soboonnyuu sukusobcho biiko chaang'.”

²⁹ Nto yu kang'eetee Yeesu Yeeriko akoo rubiikyii, kurub let biiko chee chaang'. ³⁰ Kimii biiko ayeenku chee kikoryootiin keebuuree keelto komos. Yu keenket kule ki Yeesu nyi kimii kukeeytooy, kukuurchi barak kule, “*Mochokoreetaab Tawuti, iriireeneech, ankiiriireeneech!” ³¹ Kooburyoong'to biiko kule, “Osiisye!” Nteenee kukuurchi barak bichoo miisin kule, “Mochokoreetaab Tawuti, ankiiriireeneech!”

³² Kooyyo Yeesu ankuteebee cheebkoraatiisyechaa kule, “Omache ayewook nee?”

³³ Kuwalchi kuel, “Mokoryoonteet, keemache keekaste.” ³⁴ Kukasyi Yeesu bichoo kiisayta ankutiiny koonyekwaa. Kukasta bichoo areet akeenke ankurub Yeesu.