¹ Nto yu kariikta Yeesu ak rubiikyii saang'ta ake nyee kikeekuuree Beetfaaka am Lekemeetaab *Museytuuniinek, ² kumwoochi rubiikyii ayeeng' kule, “Obe akoy saang'iin. Maboonyooru sikiryo nyee siirwaak nyee boonto keey kaamet. Otyaach tukwaay ankookwerwoo. ³ Nto yoo kateebeenaak chii ng'alyoo, oleenchi mache Mokoryoonteet ankumakuket areet akeenke.”

⁴ Kiityiich ng'aleechu kiyoo kimwooye *woorkooyoonteet ake kule, ⁶ Yooto nanyuun kuba rubiichoo ayeenku ankubokuyey kuu yoo kimwooytoochine Yeesu. ⁷ Kibokaatyaach ankukwer siirwaakaanaa bo sikiryo ak kaamet. Yu kayit, kwaalyaktee sikiroochoo tukwaay sirookwaa chee kiiliiktee keey, nto tee yoo kutebee Yeesu nyoo ki siirwaak. ⁸ Yooto kooyiitoochinoot biiko chee chaang' sirookwaa keeltaab too, nto alak kubutoot sokeekaab soosik kookoochinoot keelooto kooboor koonyit. ⁹ Kityeenchinoote barak biiko chee kimii taay ak chee kimii let kumwooye kule, “Kutororiit *Mochokoreetaab Tawuti! Iberuuroot nyi choonii am kaayneetaab Yeyiin! Kutororiit Yeyiin am kibkoonkoy!”

¹⁰ Kuyitu Yeerusaleem, koowaywooytoos biiko tukul ankuteebe kule, “So, ng'oo nyi?”

¹¹ Kuwal bichoo kikwoontooy keey Yeesu kule, “Woorkooyoonteet Yeesu nyi, nyoo bo Naasareet am Kalilaaya.”

¹² Nto tee yoo, koowut Yeesu biiwuutaab *Kootaab Yeyiin. Kimii yooto biiko chee kiwalang'tooy beesaanik ak alak chee kyooltooy cheetuukeenikaab koroseek ak cheemung'aariisyek alak. Kuwunukto Yeesu meesoosyekaab bichoo kiwalang'tooy beesaanik kootyeelakiis. Kiityeel mbo nkicheek ng'echerookaab choo kyooltooy cheebtuuteenik ankukwet bichoo tukul kuba saang'. ¹³ Kimwoochine Yeesu bichoo kule, “Mwooye siruutek kule, 'Bo koonyuu saayeet,' nteenee kyooweech akweek kuyek kebennyoo nyebo sasiik.'

¹⁴ Yooto kiimutyi Yeesu cheebkoraatiisyek ak chee kichunkutootiin. Koosoob Yeesu bichoo. ¹⁵ Kinyeer mbo *kibkoros chee wooyech ak kaaneetikaab kiruutek miisin yu kakas ng'aleek chebo kwong'uut chee kiyey Yeesu ak wolee kityeentooy leekook am biiwuutaab *Kootaab Yeyiin kookoostooy Yeyiin kule, “Kiikaasta *Mochokoreetaab Tawuti!”

¹⁶ Yooto, kumwoochi bichoo Yeesu kule, “Imiite ikase kiyee mwooye lokochu ee?” Kuleenchi Yeesu, “Ee, akase. Manoosuman akweek yeet ake am siruutek yoo mwooye kule, 'Kiiyey inyiing' Yeyiin kookaastiing' leekooy ak cheererook?'”

¹⁷ Kung'eetee Yeesu Yeerusaleem ankuwokurwoowunee *kiriinkeetaab Beetannyaa.

¹⁸ Nto yu kayyeekunee kumiite Yeesu kooyeeye Yeerusaleem, kwaam kemey. ¹⁹ Kukas keetit ake nyee keekuuree *mutiiniit nyee kimii keelto komos, kuwo yooto. Kimanaayey ketoo lokoyeek nteenee kitinye sokeek chee kituumtuumech kityo. Kuchub Yeesu keetooto kule, “Mataweeyey lokoyeek yet ake!” Kumwooye kuu nyooto kuyoome keetoo bakeenke.

²⁰ Kukase rubiik ng'aleechu kumuuyo ankuteebee keey kule, “So, keeyaam nee mutiiniini areet akeenke?”

²¹ Kumwoochi Yeesu rubiichoo kule, “! Kaamwoowook, yoo okoosee keey Yeyiin am mooyeet akeenke, omuuche oyey kiyee kaayechi anii mutiiniini, ameebere nyooto soo, baateey, nteenee omuuche mbo omwoochi lekemeet kule, 'Ng'eet ankuweewiirchi keey araaray,' kuyeye lekemaanaa kuu nyooto. ²² Yoo okooseenoo keey, onyooru kiy ake tukul nyoo osooye.”

²³ Nto yu keeyeew Yeesu biiwuutaab *Kootaab Yeyiin, kutoow kooneetiis. Yooto kukwa mbo *kibkoros che wooyech ak booyik ankuteebee kule, “Kaamukey nee chee iyeyee inyiing' ng'aleechu? Anku ng'oo nyee kooniing' kaamukeyweechooto?”

²⁴ Kuwalchi Yeesu bichoo kule, “Maateebeenaak nkanii teebuutyeet akeenke. Yoo koowalwoo, maamwoowook chiichee kikoonoo kaamukeyweek ayey ng'aleechu. ²⁵ Ateebe kule ii, kikwoonee ano kaamukeyweek choo kibatisaniisyee Yoowaana? Ara kikwoonee wolee mii Yeyiin nto wolee mii biich?” Kuleenchi keey bichoo nkityooniin, “Yoo kakeemwaay kule kikwoonee kaamukeyweekyii wolee miite Yeyiin kuteebeeneech kule, 'Ntee simooyenchi?' ²⁶ Nteenee keenyokoorech keemwaay kule kikwoonee wolee mii biiko, kuuyu chamchiintoos biiko tukul kule ki *woorkoyoonteetaab Yeyiin Yoowaana.” ²⁷ Yooto kuwalchi bichoo Yeesu kule, “Makiinkete.” Kumwoochi Yeesu bichoo kule, “Maamwoowook nkanii chiichee kikoonoo kaamukeyweek ayey ng'aleechu.” ²⁸ Kumwoochi Yeesu bichoo kule, “Mii yu ng'alyoo. Kimii yeet ake chiito ake nyee kiboonto werikyii ayeeng'. Nto tee yoo, kumwoochi kwaan weeriit nyee woo kule, 'Wenyoo, iwe ra mbareetaab *musabiibuunek weeyeyiisye.'

²⁹ Kuleenchi weeroo kwaan, 'Maamache.' Nto nyee ma tyaa, kuweech kaasooteyweekyii ankuwo.

³⁰ Kuweechi boontoonoo weeriit nyee mining' ankumwoochi nkinee kuu yoo kamwoochine nyiin. Kumwooy nyoo kule, 'Aweetii oo, aboonyuu,' amawo. ³¹ Nkono am werichoo nyee kiyey kiyee kimache kwaan?” Yu kateeb Yeesu kuu nyooto, kuwalchi bichoo kule, “Nyoo ki woo.” Kumwoochi Yeesu bichoo kule, “! Kaamwoowook, imuuchaktoos kuba Kaab Yeyiin kaaruruukiikaab *syuuruut akoo cheemureniisyek toomiite akweek. ³² Amwooye kuu nyooto kuuyu kichokooboorwook Batisaniinteet Yoowaana keelto nyebo churtaayeet ankootay akweek oyenchi, nteenee kiiyenchi kaaruruukiikaab syuuruut akoo cheemureniisyek. Ankoo mbo yu kabookas keeyenchi bichoo, manooweeksee ng'ookiswookikwook ankooyenchi.”

³³ Kumwoochi subak Yeesu bichoo kule, “Oyebchi yiit subak tyoonkoochooni: King'eet chiito ake kuchaan *musabiibuunek mbareenyii ankuker. Nto yityo kubal ng'weeneet nyee sukurootyine muumeekaab lokoyeekaaqb keetoo yoo kakiireem. Kiteech mbo keryeet nyee sukuriibee chiito mbaraanaa. Nto tee yoo, kumwoochi biiko alak bokiriichi mbaraanaa si yoo kaakururyo musabiibuunechaa kubchechiin. Nto kaakuyityo, kuruuto chiitaab mbareet. ³⁴ Yu kabokururyo lokoyeechaa, kooyookto chiitaab mbareet motwoorikyii bokiyibchi inee kereeryaanteet nyeenyii nyebo musabiibuunek. ³⁵ Yu kayit, kunam bichoo kiriibe mbaraanaa motwooriinteet akeenke ankubirseet. Kibakach ake nto nyiin ake, kuwiiraatee rwoontook. ³⁶ Kooyookto subak chiichoo motwoorik alak chee keeytee choo kibo taay. Nteenee kibokeeyechi nkicheek ng'aleek chee wuu choo kikeeyechine chuut. ³⁷ Nto nyebo let kutukul kooyookto chiichoo werinyii kuwo mbaraanaa kubere toos mokooywey bichooto.

³⁸ Nteenee kukase bichoo weritaab chiichoo, kukuure keey bakeenke kule, 'Murechu ong'nyi lakwataab chiichiito! Okany keebakach sikeeyibchi keey mbaraani.' ³⁹ Kunam bichoo weeroo ankukweryoot kuwo tuuyta saang' ankubakach! ⁴⁰ Kunyoo, yoo choonii chiitaab mbareet ii, chokuyeyee nee bichooto kiriibe mbareenyii?”

⁴¹ Kuwal biiko kule, “Bakache kibng'ookisiiyechoo ankookoochi mbaraanaa biiko alak chee imuuche kuriibchi sukookoochine inee kereeryaanteet nyeenyii.”

⁴² Yooto kumwoochi Yeesu bichoo kule, “Kyoosumman oob am siruutekaab Yeyiin yoo mwooye kule, 'Rwaanteet nyoo kitaye biiko kuteekta nyee kookuyek tiyeywoonteetaab kooto, Koonu Yeyiin tiyeywoontooni ankubo kwong'uut soo nyee tyaa yoo keekase!' ⁴³ Kunyoo amwoowook kule makiinemuneenook baytooyiisyeetaab Yeyiin ankiikoochi biiko choo makuyey ng'aleek choo chame Yeyiin. ⁴⁴ Chii ake tukul nyee karyaach rwaantaanaa, makutirtir. Nto nyoo keesuuchi rwaantaanaata, kuruurume.” ⁴⁵ Nto yu kakas mbo kibkoros chee wooyech akoo *Farisaayeek tyoonkoochoonoo, koonket kule king'aloolee Yeesu icheek. ⁴⁶ Yooto kucheeng' keelto nyee kanamee Yeesu, nteenee kinyokorritu chee ki chaang' am yooto kuuyu kiiyenchiintoos bichooto kule *woorkooyoonteetaab Yeyiin Yeesu.