¹ Kitas taay Yeesu kumwoochi biikyii tyoonkoocheet ake subak kule, ² “Wolee wuu baytooyiisteetaab Yeyiin kumii kule: Kimii baytooyiinteet ake nyee kiyeytoochi werinyii saakweetaab kooyeeyto. ³ Nto tee yoo, kooyookto motwoorikyii bokukuuroot tayeek chee kimachaktoos kukwa saaweet. Nteenee kutay tayeechoo kukwa. ⁴ Kooyookto subak motwoorikyii alak kule, 'Boomwoochinoote tayeechooto kule kaayeeny yeeyiin ak wunook chee lumlumech. Okwoonchi keey kyaam saakweenyoo kuuyu kaachob anii kiy ake tukul.' ⁵ Nteenee kitay bichoo ng'aleechaa ankubeechi keey. Kiwokuyeyiis ake am mbareenyii nto ake kuwo mung'aareenyii. ⁶ Kunam choo king'etu motwoorikaab chiichoo, koonyaliilseet ankubakach alak. ⁷ Yooto, kunyeer baytooyiintoonoo ankooyookto biikyii bo lukeet bokwaaranta rumiichoo ankubeel kiriinkeeng'waa. ⁸ Nto tee yoo kumwoochi motwoorikyii, 'Kaakuchobakay saakweetaab kooyeey nteenee kooyeey. Nteenee kameetakunyoolunoot kukwa biiko choo kwaakuure. ⁹ Kunyoo, obe woloo bo sacharaan boomwoochi chii ake tukul nyee koonyooru kucho saakwaani.' ¹⁰ Kubeetaat motwoorichoo bokooruruuch biiko tukul chee kiimuuch kunyoor nyee matiny kule ng'oo ng'oo. Kiwool keey tayeek kut kunyiy kootaab saakwa. ¹¹ Nteenee yu kawokucho baytooyiinteet chokukas tayeek, kukas chiito ake nyee kimaleelach sirook chebo saakweetaab kooyeeyto choo kikiikiikoochi. ¹² Kuteebee boonteetaab saakwa chiichoo kule, 'Nto ii, tilyeenyuu, keechoo inyiing' kule nee ko ama sirookaab saakweetaab kooyeeyto?' Kusiis chiichoo am ng'alyoo. ¹³ Nto tee yoo kumwoochi baytooyiinteet motwoorikyi kule, 'Orat chiichi awunnyek akoo kereenkook ankoowiirchi saang' woliin bo meenaneet wokung'woonchi soboon ankuriirunee ng'weny.'” ¹⁴ Kiiwoong' Yeesu tyoonkoochoonoo kumwooye kule, “Chaang' biiko chee kuurootiin nteenee churtooy chee ng'eri.”

¹⁵ Kikwaany keey moonik *Farisaayeek nto yooto, bokung'alaalee kiyee makutechee Yeesu sukunam. ¹⁶ Yooto, kooyookto bichoo biikwaa ak chebo *Eroote kubeechi Yeesu. Kuyite kumwoochine Yeesu kule, “Kaaneetiinteet, kiinkete kule ibooye manta ankiineete biiko am keelto nyebo man koonket kiyee mache Yeyiin. Maweechiing' chii ankoo ku inee ku ng'oo. ¹⁷ Kunyi ii, mwooweech, baa, kaasooteyweekuuk, ara karaam keekwechine baytooyiinteetaab Rooma *syuuruut nto miyaat?”

¹⁸ Nto kuuyu kiinkete Yeesu ruurumuung'waa, kumwoochi kule, “Oyeku soo, kiblembechiis nyee tyaa! Kabootekyoo nee? ¹⁹ Obooru baa, akweek beesyaantaanaata keekweytee syuuruut.” Kiiboorchi beesyaanteetkey. ²⁰ Kuteebee bichoo kule, “Bo ng'oo meti ak kaaynaani mii beesyaantaani?”

²¹ Kuwal biikeey kule, “Bo baytooyiinteetaab Rooma.” Yooto nanyuun, kumwoochi Yeesu bichoo kule, “Machaktoos okoochi baytooyiintoonoo kiinyii, nto Yeyiin, okoochi nyee nyeenyii.” ²² Yu kakas bichoo ng'aleechaa, koolat, nto tee yoo kubeechi keey.

²³ Nteenee kukwoonchi subak Yeesu *Satukaayeek alake besyoonooto. Kiiyenchine bichoo kule yoo kaakume chiito, kukaakume kutukul nyee meebere wokung'eetee meet besyeet ake. ²⁴ Yooto, kuteebee bichooto Yeesu kule, “Kaaneetiinteet, m, wooye kiruutekaab Yeyiin choo kikoonu *Muusa kule yoo kame chiito kumanaasikyiin leekwa akoo koorkeenyii, koontooye ng'eetaabkaametiitaab choochooto koorkoonoo, sukusikyi nyiin leekook chee sikeekuurtee. ²⁵ Kunyoo ii, ntee kimii chiito ake keny nyee kiboonto werikyii tisab. Nto yu kawokuwooyit weriit kibooreetyeet, kukeesyo. Nto mii yoo, kumeechi keey nyee manaasikyi koorkoonoo leekwa. ²⁶ Koontiiyiis weeriit nyee kirubu nyooto kimee. Kiibuurchiin nkinee akoo koorkoonoo ankume amanaasikyiin ak koorkoonoo leekwa. Koontiiyiis weeriit nyee kibo somok. Koobuurto keey nyoo nkinee koorkoonoo, nto mii yoo, kume nkinee nyee manaanyoor leekwa. Kiyeyakay kuu nyooto kut kubek werichoo tukul ama leekooy. ²⁷ Nto mii letuunoo, kume nkinee koorkoonoo. ²⁸ Kunyoo, keemache imwooweech: Makubooyiit ng'oo koorkoonoo kooyyiin kang'eetyee bichoo tukul meet, kuuyu kubooyiit man, kiikoomut bichoo tukul koorkoonoo?”

²⁹ Kuwalchi Yeesu kule, “Okustootiin kuuyu moonkete akweek kiyee ibooru siruutekaab Yeyiin ak wolee wuu kaamukeyweekyii. ³⁰ Yoo kaakung'eetee biiko meet, meebere takoomute keey subak. Ibuure kuu malayikaanikaab Yeyiin. ³¹ Nteenee kurubta keey ng'eeteetaab meet nyebo biiko choo kiikubek ii, mwoowook nee Yeyiin ³² yoo mwooye kule, 'Anii Yeyiinteetaab *Abraam, Isaka akoo Yaakobo?' Yoo kakeemwa kule bo Yeyiin anum, koobooru yooto kule takusoboot chiichooto ankoo kiikume keny.” ³³ Yu kakas bichoo ng'aleechaa, koolat wolee kiineetitooy Yeesu.

³⁴ Nto yu kakas *Farisaayeek kule kaakoomuukta Yeesu *Satukaayeek, kooruruuch keey. ³⁵ Nto tee yoo, kutyem kaaneetiinteet ake nyebo kiruutek Yeesu, kuteebee kule, ³⁶ “Nto ii, kaaneetiinteet, kiruutyeet nkono nyee woo am kiruutekaab *Muusa?”

³⁷ Kuwalchi Yeesu kule, 'Icham Yeyiinteeng'uung' am mooyeeng'uung' tukul, soboonng'uung' tukul, ak.'Kaasooteyweekuuk tukul.' ³⁸ Kiruutyeet nyiitenyi nyebo koomanuut anku woo am tukul. ³⁹ Nto nyebo ayeeng' kooroobere nyiin mwooye kule, 'Icham laatyeeng'uung' kuu woloo ichamtooy keey. ⁴⁰ Iyume kiruutechuutechu ayeenku kiruutekaab Muusa tukul akoo siruutekaab *woorkooyik.”

⁴¹ Kumiite *Farisaayeek kukeeruuch keey, kuteebee Yeesu kule, ⁴² “Osoote nee akweek kurubta keey *Kaararookiinteet nyoo okanyoonu? Choonee kootaab ng'oo?” Kuwal bichoo kule, “Kootaab *Tawuti.”

⁴³ Kuketyi Yeesu kule, “Am nee, naas, sukumwoochi Tamirmiryeetaab Yeyiin Tawuti kukuur Kaararookiinteet kule Mokoryoonteet? Kimwooy oob Tawuti kule, ⁴⁵ Kunyi, yoo kuure Tawuti Kaararookiinteet kule 'Mokoryoonteenyuu' koomuuchaktoos kule nee kuchoonee Kaararookiinteet kootaab Tawuti?” ⁴⁶ Manaaket chii ake tukul ng'alyoo amanaatakukany bichoo kuteebee Yeesu teebuut ake tukul kung'eetee yooto kuwo taay.