¹ Nto miite yoo, kumwoochi Yeesu rubiikyii akoo biiko chee kimii yooto kule, ² “Yibe keey *Farisaayeek ak kaaneetikaab kiruutek kule icheek chee inkete koobanybaany siruutekaab *Muusa. ³ Okase sinee kiy ake tukul nyee mwoowook, nteenee moorub yeyuutekwaa kuuyu mayeye icheek kiyee ineete. ⁴ Ing'iree biich bichu tukuuk chee nyikiisech amamache icheek mbo kut kutiiny tukuuchooto. ⁵ Yeye kiy ake tukul kumache kule sukukas biiko kule kiikoonemchi keey icheek Yeyiin. Iwooyiite tukuuk chee mii siruutekaab Yeyiin ankuryookyi keey tokoch ak woleeb awun. Ikooyiite mbo maaseekaab sirookwaa kusiir chebo biiko alak sikeebere toos sooye icheek miisin! ⁶ Kicham bichoo kutebee woloo keekoonyite am sookwoonuut ak ng'echerook choo bo taay am kooriikaab saayeet. ⁷ Kicham kiisubooyoote nyebo koonyit am wolee chaang' biich ankicham keekuure am koonyit kule 'Mokoryoonteet. ⁸ Mookany kukuurook chii kule 'Mokoryoonteet kuuyu Mokoryoonteet ku akeenke baateey ankootuubche akweek tukul. ⁹ Amootoroor chii am koorooni kule 'Baaba' kuuyu oboonte Koon akeenke ankumiite kibkoonkoy. ¹⁰ Moocham kukuurook chii kule 'Kaantooyiin nyee woo' kuuyu oboonte Kaantooyiinteet nyee woo akeenke nto nyooto ku *Kaararookiinteet. ¹¹ Nyee woo miisin am akweek ku nyoo yeetyeechine chuut. ¹² Chii nyoo yibe keey barak makiichuchuuk nto nyoo yibe keey ng'weny makiitoroor.”

¹³ Kitas taay Yeesu kumwooy kule, “Omiite soo, nyee miyaat kule nee akweek kaaneetikaab kiruutek akoo *Farisaayeek, kiblembechiisyechu! ¹⁴ Okeree keey kurkeet nyee weetii kaab Yeyiin nyee moobaroochine biiko alak koowut ameebere owute akweek nkityo. ¹⁵ Omiite soo, nyee miyaat kule nee akweek kaaneetikaab kiruutek ak Farisaayeek, kiblembechiisyechu! Ombakootee tooliiloon ak roorookiis omache onyooru chiito akeenke nyee karubaak. Nto yoo koonyooru, oyey bichoo koolaambuuch ng'ookistaab Kibrokosyoonteet kusiirook.

¹⁶ Omiite soo, nyee miyaat kule nee akweek cheebkoraatiis choo oreetoote alak! Oneete kule, 'Yoo keewaalee keey chii *Kootaab Yeyiin, mamii ng'alyoo, nteenee yoo keewaalee keey *ta-aabuutaab Kootaab Yeyiin kuname muumeekyii.' ¹⁷ Cheebkoraatiisyechu, oberberech soo, nyee tyaa. Nkono nyebo koomanuut kusiir ake: ta-aabuut nto Kootaab Yeyiin nyoo itiliile ta-aabuut? ¹⁸ Omwooye mbo subak kule, “Yoo keewaalee keey chii *kaabkoros am Kootaab Yeyiin, kumamii ng'alyoo, nteenee yoo keewaalee keey kiyee tuwentooy kubo koroseek, kuname muumeekyii.' ¹⁹ Okoryootiin soo, nyee tyaa. Nkono nyebo koomanuut kusiir ake: koroseek nto kaabkoros nyoo itiliile koroseek? ²⁰ Kunyoo, yoo keewaalee keey chii kabkoros, kaakoowaalee keey nkinee kiito nyoo kakeesooytooy am kaabkoros. ²¹ Nto yoo iwoolee keey Kootaab Yeyiin, kaakoowaalee keey koyooto akoo nyoo minye ariit. ²² Nto nyoo iwoolee keey kibkoonkoy, kaakoowaalee keey ng'echereetaab baytooyiisyeet bo Yeyiin akoo nyoo ibuure ng'echeraataata.”

²³ Kitas taay Yeesu kumwooy kule, “Omiite soo, nyee miyaat kule nee akweek kaaneetikaab kiruutek akoo *Farisaayeek, kiblembechiisyechu! Okoochine Yeyiin akeenke am taman nyebo tukuuchoo kootooyee amiik. Nteenee kyookweeste ng'aleekaab koomanuut am makuutekaab Yeyiin. Chooto ku manta, kiisayta akoo kaakaaseet. Karaam okoochine Yeyiin ng'ooluutyeeng'woong' nteenee karaam miisin oyeye ng'aleechaa alak. ²⁴ Cheebkoraatiisyechu ireetoote biich! Oyiimee keey tukun chee minkeech ankoobakaakte tukun chebo koomanuut.

²⁵ Omiite soo, nyee miyaat kule nee akweek kaaneetikaab kiruutek akoo Farisaayeek! Kiblembechiisyechu! Okerkeeye terekooy chee kiiwuune woleeb saang' nto woliin bo ariit kutuuryootiin. ²⁶ Okoryootiin Farisaayeek! Owuunekurook terekyeet ariit nto kaakuyityo makutililiit woleeb saang'.

²⁷ Omiite soo, nyee miyaat akweek kaaneetikaab kiruutek ak Farisaayeek, kiblembechiisyechu! Okerkeeye mbeeroos chee kikeemas kuleelakiitu woleeb barak nto woliin bo ariit kunyiyaat koyikaab muuswek ak kiy ake tukul nyee ma tiliil. ²⁸ Okerkeeye akweek mbeeroosyechoo kuuyu oboorunee woleeb saang' kule ochurtootiin nteenee am ariit, kyoowung'ta keey ng'ooki ankooyeku kiblembechiis miisin.”

²⁹ Kitas taay Yeesu kumwooy kule, “Omiite soo, nyee miyaat akweek kaaneetikaab kiruutek ak Farisaayeek, kiblembechiisyechu! Oteekyine *woorkooyikaab keny tukuuk chee kiisootee ankookaroorane mbeeroosyekaab biiko choo churtootiin, ³⁰ soomwooye kule, 'Nto kikeemiite kooreet am besyoosyekaab mbo kuuko, nto kimakeewastooy korotiikaab woorkooyichu kuu woloo kiyeytooy biikyoo chebo keny.' ³¹ Nto kuuyu okuure bichu kule mbo kuuko, ochamchiintoosii nkityo kule okerkeeye mbo kuukoong'. ³² Kunyi, otas taay naas, oyeye ng'ookistaab mbo kuukoong'! ³³ Ng'oomng'ookichu! Omuuche kule nee ochilil makiiruusteenaak maataab kibchuulyo? ³⁴ Amiite ayookwook woorkooyik, biiko chee boonto kiirnateet ak kaaneetik. Mookwertoochi alak murtooywoosyek obakach, nto alak moobir am kooriikwook bo saayeet ankookwetaatee kiriinkoosyek. ³⁵ Kunyi makiing'woonchook kubo biiko tukul choo kikeebakach buch, koonaamee Abel akoy Sekaryaa Araab Berekyaa nyoo kyoobakakyine kweenuutaab Kootaab Yeyiin akoo *kaabkoros. ³⁶ Kaamwoowook, biiko chee wuu chuutechu chee nyooru ng'wooninto tukul.”

³⁷ Kibolchi Yeesu Yeerusaleem kumwoochine kule, “Wooy, wee, Yeerusaleem, we, Yeerusaleem! Irume woorkooyik ankiiwiiree rwoontook biiko choo iyooku Yeyiin kule kuyisuung'! Kyaasyeem kunyil areet chee chaang' kule ayisu biikuuk kuu woloo yisuntooy nkookya kinyiinyiiyeenik koowut kebebaakyii, nteenee maneekoonoo kut ayey kuu nyooto. ³⁸ Kunyi makuyoochiin Kootaab Yeyiin. ³⁹ Kaamwoowook kuchakee raat kuwo taay matabookasoo subak, akoy omwaay kule, 'Iberuuroot nyoo choonii am kaayneetaab Yeyiin.'”