¹ Nto yu miite Yeesu kuweechine keey kukang'eetee *Kootaab Yeyiin, koonookyi rubiikyii ankooboorchi inee wolee kikeeteekta Kootaab Yeyiin. ² Yooto kumwoochi Yeesu rubiichoo kule, “Moobeng'tee ochorokyine tukuuk chee wuu chu. Kaamwoowook, makiiturbuub tukuuchu tukul nyee mamii rwaa mbo akeenke nyee ng'etu kookemeraat keey ake.”

³ Nto yu mii Yeesu keebuuree Lekemeetaab *Museytuuniinek ak rubiikyii nkit, kuteebee rubiik kule, “Mwooweech, ayu yee yeyaktoos ng'aleechaa keemwooye? Kiy nee nyee makeekasee yee iyeewunee inyiing' ak yee yitu tabantaab kooreet?”

⁴ Kumwoochi Yeesu kule, “Oriib keey! Mookany kiiberbeeraak. ⁵ Choong'ech biiko chee makukwaanaat ankuyey keey ake tukul kule inee ku kaararookiinteet. Makoobotbootoot bichoo biiko chee chaang'. ⁶ Mookas kubare keey biiko am kooreet ankyoomu ng'al chebo booryoot, nteenee moomuye. Masimkuyitu tabantaab kooreet ankoo kayeyakiis tukuuchoo. ⁷ Makubooryo bororyeet ake ak ake, kubooryo kooreet ake ak ake. Makucho kemewuut ankutookunootee kibring'ring'nyeet komoswookik chee chaang'. ⁸ Ng'wooninto nyee kaamunee moroontoon nyoo nto yitu kooreet nyee leel. ⁹ Makeechaamtaak, keewusook, keebakachaak ankeewechook am kooroosyek tukul kuuyu oyenwoo. ¹⁰ Makoochuchuuyee keey biich chee chaang' kaakaaseet ankuchaamtaat keey ameekooriiku keey. ¹¹ Makuyey keey biiko chee chaang' kuyek *woorkooyikaab Yeyiin ankutewech biiko chee chaang'. ¹² Makuwooyiit ng'ookisto kut kubot chamateet. ¹³ Nteenee makiiraraach chiito nyoo kamuyta akoy tabanta. ¹⁴ Nto subak, makyaamtee Lokooywechu Karoomech bo Kaab Yeyiin kooreet kumukuul kukas biikaab yeemoosyek tukul, nto yitu tabanta.”

¹⁵ Kimwooy Yeesu subak kule, “Yoo kookas kiyoo meeriiku Yeyiin nyoo king'aloolee woorkooyoonteet Tannyeel kukeeyyoonyee Kootaab Yeyiin, ¹⁶ machaktoos kumwechi biiko choo miite Yuuteya lekem. (Kuyeb yiit chii nyoo sumane ng'aleechu.) ¹⁷ Nto yoo kanyoorta ng'aleechu chii kumii koonyii barak, meewut ko kule koonem kiy ake tukul nyee sukumweyto, ¹⁸ ameeyeey chii nyoo miite mbareen kaa kule wokunam sireet nyee iliiktee keey. ¹⁹ Leyye, makuwuuyiityi soo kule nee am besyoosyechooto kooruuk choo kooyootiin ak choo ireeriisye! ²⁰ Osaay Yeyiin kule mayeyakiis ng'aleechu yoo yiiwoot nto ku besyeetaab *Sabaato. ²¹ Makuwooyiit ng'woonintaab besyoosyechooto kusiir ng'woonin ake tukul nyee kiikutook kuchakee kayey Yeyiin kooreet, amakoy kutook ng'woonin ake nyee tee nyoo besyeet ake. ²² Nteenee kiikoonwaakiit Yeyiin besyoosyechooto kuuyu mii biikyii chee kiikukwey nyee nto kimanaakoonwaakiit, nto mamii chii nyee katawokusobe. ²³ Yoo kamwoowook chii ake tukul kule ong'nyi *Kaararookiinteet nto ong'nyiin, mooyenchi, ²⁴ kuuyu makukwa biiko chee makuyey keey kule kaararookik ak *woorkooyikaab Yeyiin. Makuyey bichu ng'al chebo kwong'uut sukung'eet, yoo imuuchaktoos, kutewech biikaab Kiriisto choo kweyootiin. ²⁵ Kasimasoowook, kookas? ²⁶ Kunyoo, yoo kamwoowook chiito ake kule, 'Ong'nyiin Kaararookiinteet miite suurkween, moobe wolooto, nto kumwoowook kule, 'Ong'nyi kawunyee keey kiseenke', moocham. ²⁷ Kuu yoo iwechee koong'asiis bokeekasee tinkeey, kukerkeyiitu nyooto wolee choontooy *Weritaab Chii. ²⁸ Woloo mii motoong'wek, kumii yooto muuswek.”

²⁹ Kitas taay Yeesu kumwooy kule, “Yoo beku nyaliluutechoo bo besyoosyechooto, Makumis asiista, ameetakooluuwu araaweet. Makootimtiimakoy woliin bo barak ankoosuuw kookeelik.' ³⁰ Yooto maabooru keey *Weritaab Chii am barak. Makuriiryo biikaab koorooni tukul yoo kakasa achoonee boolik barak am kaamuukeyweek ak lebkeeyyeetaab Yeyiin. ³¹ Yoo keekuute koontiit kuchechi barak, maayookte malayikaanikyuu kuba komosta ake tukul nyebo kooreet bokooruruukoot biiko choo kweyootiin.”

³² Kumwooy subak Yeesu kule, “Yoo inkatu keetoo keekuuree *mutiiniit, koobooru kule kaakuriik kumuses. ³³ Am keelto nyee wuu nyooto, yoo okase kuyeyaktoos tukuuchoo tukul, onket kule kaakuriik besyeet nyoo ayeewunee. ³⁴ Kaamwoowook, mabootoos biikyuu choo kyaakwey ankoo kayeeyakiis tukuuchoo tukul. ³⁵ Makubot barak ak ng'weny, nteenee mabote ng'alyoonteenyuu. ³⁶ Mamii chii nyee inkete besyeet nyee ayeewunee. Meenkete malayikaanik amaankete mbo nkanii, nteenee Baaba nkit nyee inkete. ³⁷ Kerkeyiitu yoo kaariik ayeewu anii *Weritaab Chii ak besyoosyechoo kibo Noowa. ³⁸ Kutoombo kuchoonii yooto taambiliilyeet, kyoomiisye biiko kuyyeesye, koomutiisye ankiimute chuut akoy besyoonoo kiiwute Noowa mweeng'. ³⁹ Kimeenket bichoo kiyee kimii wokuyeyaktoos akoy yoo kichoonii taambiliilyeet ankubakach bichoo tukul. Makukerkeyiit nyooto besyoonoo choonii Weritaab Chii. ⁴⁰ Yoo mii murenik ayeenku mbareen, makeeyib akeenke keebakaakta ake. ⁴¹ Nto yoo mii kooru ayeenku kung'ooysee rwaanteet, makeeyib akeenke keebakaate ake. ⁴² Kunyi, oriib keey kuuyu moonkete besyeet nyee choonee Mokoryoonteeng'woong'. ⁴³ Orootoote ng'alyoontooni: Nto inkete chiitaab kayta asiiswek chee choonee chooriinteet, nto riibse makeebut kanyii. ⁴⁴ Kunyoo machaktoos ochobootiin nkakweek, kuuyu makucho *Weritaab Chii am asiiswek chee moomoonkyine.

⁴⁵ Ara ng'oo nanyuun nyee motwooriin nyee kiikoosee keey anku ng'oom? Nyee kiikoosee keey ku nyoo itoorchine mokoryoonteet biikaab kanyii kubaye nyee mamii wuuyiin. ⁴⁶ Iberuuroot chiichoo yoo kanyoor mokoryoonteenyii kuyeye yiisyoonoo nyee karaam! ⁴⁷ Kaamwoowook, makookoochi mokoryoontoonoo motwooriintoonoo kooyyoonkyi tukuukyii tukul chee boonto. ⁴⁸ Nteenee yoo miyaat motwooriintoonoo, makumwooy kule, 'Loo yee choonii mokoryoonteenyuu.' ⁴⁹ Yooto makubirseet motwoorik chuut ankung'asyanchi keey kwoomiis ankuyyeesyo akoo kibookitiis. ⁵⁰ Nto yoo kacho mokoryoonteenyii am besyeet nyee meemoonkyine motwooriintoonoo, ⁵¹ machokoong'woonchi motwooriintoonoo ankutoorchi wolee mii kiblembechiisyek chuut, wokuriirunee ng'weny.”