¹ Kitas taay Yeesu kumwooy kule, “Okany amwoowook wolee wuu chooneetaab baytooyiisyeetaab Yeyiin nyee leel. King'eet tiibiik alake tamanu kunam taariinekwaa bokutorooch saanteet nyee makiisye. ² Kiberberech muutu kung'oomech chuut muutu. ³ Kinam choo kibererech taariinekwaa amaanamtaat keey mwaaniinek. ⁴ Nteenee kinamtaat keey choo king'oomech mwaaniinek. ⁵ Yooto wokooliiny saanteetkey. Kukas tibichoo kut koonuukiis ankuruuyo. ⁶ Nto miite kweemooy kween, keekuur kule, 'Kaakuyit saanteet! Nyoo, okwaa baa, otorooch!'

⁷ Kung'eetyo tibichoo tukul ankuyeyta taariinekwaa. ⁸ Yooto kumwoochi chu kiberberech chu king'oomech kule, 'Ntee miite kumistoos taariinekyoo acheek. Oroong'weech mwaaniinek.'

⁹ Kuketyi choo king'oomech kule, 'Acha. Nto nyuun kurarcheech acheek. Boo-al cheekwook.' ¹⁰ Kung'eetyo bokwooliis. Nto kumiite keeltaab too kubeetii, kuyitu saanteet. Yooto koowute choo kichobootiin kootaab saakweet ak saanteet ankeekere kurkeet.

¹¹ Nto tee yoo kuyit nkicheek chu kibeetii mwaanik ankoong'eetiis kule, 'Iyootweech! Iyootweech! Yootweech kurkeet!'

¹² Nteenee kuwalchi chiichoo kule, 'Maanketook anii.'” ¹³ Kiiwoong' Yeesu tyoonkoochoonoo kule, “Kunyoo, oriib keey naas, kuuyu moonkete besyeet nto ku asiiswek chee ayeewunee anii.”

¹⁴ Kitas taay Yeesu kumwooy tyoonkoocheet ake kurubta keey baytooyiisyeetaab Yeyiin kule, “Kimii chii nyee kimache kuwo ruutooy, kukuur motwoorikyii ankootoorchi chii tukuuk chee kiimuuche kuriib. ¹⁵ Kiitoorchi nyebo taay beesaanik kisyeerook konom, kootoorchi ake kisyeerook tibtem nto ake kootoorchi kisyeerook taman. Nto kaakuyityo, kuruuto. ¹⁶ Kiwokuyeyiisyee nyoo kikiitoorchine kisyeerook konom beesaanichaa areet akeenke kubasunee alak kisyeerook konom. ¹⁷ Kunyoor nkinee nyoo kikiitoorchine kisyeerook tibtem kisyeerook alak tibtem. ¹⁸ Nteenee kiwokubal nyoo kikiitoorchine kisyeerook taman ng'weeneet ankukonor beesaanikaab mokoryoonteenyii. ¹⁹ Nto kaakukeeyta besyoosyek chee chaang', kooyeewunee mokoryoontoonoo ruutooy. Kikuur ake tukul am motwoorichoo chokumwooy wolee kibeeta ng'aleekaab beesaanichaa. ²⁰ Kucho nyoo kikiikoochine kisyeerook konom ankumwooy kule, 'Mokoryoonteet, kikiitoorwoo beesaanik kisyeerook konom, kunyi kas, baa, mii kisyeerook alake konomu barak.'

²¹ Kuwalchi mokoryoonteenyii motwooriintoonoo kule, 'Kweeyey nyee karaam ankiikooseeniing' keey! Kuu yoo kweemuuch ikaaman tukuuk chee ng'eri kut kubas keey, makooniing' ibawu tukuuk chee choong'ech. Choonchi keey keetankas tukwaay!'

²² Nto tee yoo kucho nkinee nyoo kikiikoochine kisyeerook tibtem, ankumwooy kule, 'Mokoryoonteet, kiitoorwoo beesaanik kisyeerook tibtem, kunyi kas, baa, kookutasyi keey kisyeerook tibtemu.'

²³ Kuwalchi mokoryoonteet kule, 'Kweeyey nyee karaam ankiikooseeniing' keey! Kuu yookweemuuch ikaaman tukuuk chee ng'eri kut kubas keey, maakooniing' ibawu tukuuk chee choong'ech. Choonchi keey keetankas tukwaay!'

²⁴ Nto mii yoo, kucho nyoo kikiikoochine kisyeerook taman, ankumwoochi mokoryoonteet kule, 'Mokoryoonteet, kwaankete kule iyeku chii nyee koroom nyee kiicham ikese kiyee kimeechoone ankiiruruuchee wolee maneeyis kebus. ²⁵ Kwaanyokoriitu, kunyoo kiwaabalchi beesaanikuuk ng'ween akonor. Neennyi, onkyu beesaanikuuk.'

²⁶ Kuwalchi mokoryoonteet kule, 'Imiyaat ankiiburen! Ankoo kiinkete inyiing' kule akese anii amiik wolee manaachaan ankaaruruuchee wolee manaayis ee? ²⁷ Karaam, nto kiikonoree lenkuunek woloo basu keey, nto kachaanyooru kookutasyi keey. ²⁸ Onemunee nyi beesaanichaa ankookoochi chiito nyoo kaboonto beesaanik kisyeerook bokol. ²⁹ Chiito nyoo kayetyiisyee kiyee kakiikoochi, makeetasyi. Nto nyoo kamayeyiisyee kiinemunee mbo nyooto kakiikoochine. ³⁰ Nto motwooriintooni keweyiin, owiirchi saang' woliin bo meenaneet wokung'woonchi soboon ankuriirunee ng'weny.'”

³¹ Kitas taay Yeesu kumwooy kule, “Yoo choonii *Weritaab Chii am wooyinnyii kuu baytooyiin kuboontoonu keey malayikaanik tukul, makoobuuree ng'echereenyii bo nbaytooyiisyeet. ³² Makiiruruukyi biiko tukul taayeenyii. Yooto, makoobeesyo biiko kuu yoo ibeestoos akiinteet keechiirek akoo ng'oroorik. ³³ Makutebunee keechiirek awutaab taay kutebunee ng'oroorik awutaab kaataam. ³⁴ Makumwoochi yooto choo miite awutaab taay kule, 'Okwaa choo kiikooberuurook Baaba. Onam barooyinng'woong' am kaab Yeyiin nyoo kisimkeechobkwook kuchakee kakeeyey kooreet. ³⁵ Ki yoo kaama kemey, obayoo, nto yoo kaama melel, okoonoo bey chee kaayyee nto yoo kaaruutoochook, otoochoo. ³⁶ Ki yoo maatinye sira, oloochoo, nto yoo kaamnyaan, orwoomoo, nto yoo kikeeratoo, bookasaa.'

³⁷ Yooto makuketyi choo churtootiin kule, 'Ayu yee kyoomiing' inyiing' kemey ankeebayiing' acheek oo, Mokoryoonteet, ku ayu yee kyoomiing' melel ankeekooniing' bey chee keeyyee? ³⁸ Ki ayu yee kiiruutoocheech ankeetaachiing' acheek, ku ayu yee kimeetinye sira ankiilaachiing'? ³⁹ Ayu yee kiimnyoone inyiing' ku ayu yee kiirataat ankubokiirwaamiing' acheek?'

⁴⁰ Makuket yooto kule, 'Kaamwoowook kiyee kyooyechi ake tukul am mbo ng'eetaabiya choo kuskus, kyooyewoo anii.' ⁴¹ Nto tee yoo kumwoochi choo miite awutaab kaataam kule, 'Ong'eetyee yu chu oruustooyootiin bookarbusyi wolee bo maataab kibchuulyo nyoo kikeeyeytoochi Kibrokosyoonteet akoo tamirmirookyii bo rokos. ⁴² Kyaama kemey, amoobayaa, kwaama melel, amookoonoo bey. ⁴³ Aruutoochook, amootaachaa. Awe ama sira, amanoolaachaa, amnyaan, amaboorwaamaa ankeerata amabookasaa.'

⁴⁴ Makumwoochi yooto nkicheek bichooto kule, 'Ayu yee kyaaming' kemey, melel, nto iruutoocheech, nto yee kimeetinye sira, nto yee kiimnyoone, nto kiirataat, amakeeyeetyeechiing' oo, Mokoryoonteet?'

⁴⁵ Nto yooto makuket kule, 'Kaamwoowook, yoo manooyechi kiy biikyuu choo kukskus, meebere kyooyewoo anii kiy.' ⁴⁶ Yooto nanyuun makiimut bichooto wolee wokung'woonchine soboon akookoy ankiimut choo churtootiin kuba wolee bo *soboontaab kibchuulyo.”