Kuurkeetaab 26
1
Yu keewoong' Yeesu kumwooy ng'aleechu tukul, kumwoochi rubiikyii kule,
2
“Kuu yoo onkete kaakung'et besyoosyek ayeenku kyaam *Saakweetaab Keeytaayeet, nto yooto makiiyokooytoo anii, *Weritaab Chii bokeekwertoochoo murtooywoonteet.”
3
Kiiruruukyi keey mbo *kibkoros chee wooyech akoo booyikaab Yuutayeek kaytaab *kibkoros nyee woo nyee kikeekuuree Kayaafa.
4
Yooto kuchob wolee makunamta Yeesu subokeebakach.
5
Kimwooy kule, “Mookany keenam chiichi kyoome saakweetaab Keeytaayeet, kuuyu imuuche biiko kuyey woorooryeet.”
6
Nto yu miite Yeesu Beetannyaa am kaab Simooni chiichoo kikiikuname makereenik,
7
kucho koorkeet ake nyee kiboontoonu mwaay nyee kiboong'u nyee anyiiny nyebo beesaan chee chaang' miisin. Nto kumiite Yeesu kamuree keey yee kyoomiisyee, chokuraang'tee koorkoonoo metinyii mwaayaa.
8
Bere kukas rubiikaab Yeesu kuu nyoo, kung'woonchi ankumwooy kule, “Ntee sukunyarta koorkooni mwaay ku nyi?
9
Katakyooltee mwaayi beesaan chee chaang' ankiikoochi banoonik.”
10
Kiinket Yeesu kiyee kimii kumwooye icheek. Yooto, kumwoochi rubiikyii kule, “Omachee nee akweek koorkooni? Ntee kaakuyewoo anii ng'alyoo nyee karaam.
11
Kookas, oboonte keey akweek banoonik akookoy, nteenee meebere oboonte keey anii akookoy.
12
Yoo karoong'tee koorkoonoo mwaayi met, kamiite kuyeytoo subokii subokeemuya.
13
Kaamwoowook, makeewuutyee koorkooni am kiyee kaakuyey yoo kyoomtooy lokooywek chee karoomech am kooreet tukul.”
14
Nto miite yoo kung'eet Yuuta Iskaryoot nyoo ki akeenke am rubiikaab Yeesu taman ak ayeeng' ankuwo wolee kimiite mbo kibkoros chee wooyech.
15
Kiwokuteebee bichoo kule, “Kiy nee nyee okoonoo yoo kaachobwook keelto onam chiichi?” Keechamchi *feetaanik sosom.
16
Nto kuchakee yooto kuwo taay kucheeng' Yuuta barooyinto nyee kachaamtee Yeesu.
17
Nto yee ki besyeetaab taayta nyebo Saakweetaab mukaatiin chee makuutunootiin, koonookyi rubiik yee kimii Yeesu ankuteebee kule, “Ano wolee imache keeyeyte sikyaamee *Saakweetaab Keeytaayeet?”
18
Kuwalchi Yeesu kule, “Boocheeng'aate chii am kiriing' ankoomwoochi kule, 'Kamwooy Kaaneetiinteet kule: 'Kaakuyit besyoosyekyuu. Kunyi, amiite ak rubiikyuu, chaa-amee Saakweetaab Keeytaayeet koong'uung'.'”
19
Bokuyeyta rubiichoo saakwaanaa kuu woloo kamwooytoochine Yeesu.
20
Nto mii kuratoorate kooreet, koobuur ng'weny Yeesu akoo rubiikyii taman ak ayeeng' kwoomiis.
21
Kumii kwoomiisye, kumwooy Yeesu kule, “! Kaamwoowook, mii akeenke am akweek nyee makuchaamtaa.”
22
Kung'woonchi rubiichoo ankutoow ake tukul kuteeb kule, “Ara anii oo, Mokoryoonteet?”
23
Kuwal Yeesu kule, “Nyoo kiilabloobtooy tukwaay mukaatiit terekyeet akeenke nyee makuchaamtaa.”
24
Makume *Weritaab Chii kuu yoo siraat. Nteenee makung'woonchi soo kule nee chiito nyoo makuchaamtaa! Kaykay nto kimakeesich chiichoo.”
25
Kumwooy Yuuta kule, “Anii mbono oob oo, Mokoryoonteet?” Kuwalchi Yeesu kule, “Ee, inyiing'.”
26
Nto mii yoo, kunam Yeesu mukaatiit ankubirchi Yeyiin koonkoy ankubetes nto yityo kookoochine rubiikyii kumwoochine kule, “Boornyuu nyi, o-am.”
27
Kunam terekyeet nyee kimiite *tifaayiik ankubirchi Yeyiin koonkoy ankookoochi rubiikyii kumwooye kule, “Oyyee akweek tukul.
28
Korotiikyuu chu chebo *kiirootyeet nyee leel chee makiitaata sikeenyoochi kaat biiko chee chaang' kubo ng'ookiswookik.
29
Kaamwoowook, mawaayyee subak tifaatyiichu akoy besyoonoo ayyee ak akweek tifaayiik chee leelach am kaab Baaba.”
30
Nto tee yoo, kutyeen kookoostooy Yeyiin, ankung'eetyo kutakyi keey Lekemeetaab Museytuuniinek.
31
Kumiite keeltaab too, kumwoochi Yeesu rubiikyii kule, “Omiite akweek tukul boomweyeenoo kweemowuuniitenyi, kuu yoo mwooye siruutek kule, 'Maabakach akiinteet kusereet keechiirek.'
32
Nto yoo kaang'eetee meet, maantooy Kalilaaya.”
33
Kuwalchi Betero kule, “Ankoo kamweyeeniing' chuut tukul makoy abakaaktiing' amii.”
34
Kuketyi Yeesu Betero kule, “Kaamwoowuung', am kweemowuuni, kutoombo kooturkuuche kirkoonkiit, meetuuch keey inyiing' areet somok kule meenketoo.”
35
Kuwal Betero kule, “Makoy atuuch keey kule maanketiing'. Yoo kabo meet keebeku tukwaay.” Kooruumchi nkicheek rubiik chuut tukul kuu nyooto.
36
Yu kayit Yeesu akoo rubiikyii yee keekuuree Ketesemaane, kumwoochi kule, “Okanyaa yuuteyu awe amii yuun waasaay.”
37
Kuweeto keey Betero akoo werichoo ayeeng' bo Sebetaayo. Kyaam ng'uusng'uus Yeesu kut kulooklooken.
38
Nto tee yoo, kumwoochi mbo Betero kule, “Kaamuy anii kut wuu nyee maameey. Kunyi, ong'etunee yuuteyu ankookasu.”
39
Yooto koonaakta taay kisich ankukutuny ankuyim kutiiny tokochta ng'weny kusaay kule, “Baaba, yoo imuuchaktoos, inemtoowoo nyalili. Nteenee kuyeyakay kuu woloo imaktooy, meebere woloo amaktooy anii.”
40
Nto yu keeyeey woloo kimii rubiikyii somoku kunyoor kuruuytoos. Kumwoochi Betero kule, “Kamoomuuche keekasu tukul mbo asiista akeenke?
41
Machaktoos okasu ankoosooye simoo-asyi keey tyemiisyeet. Obere nto oyey, amamii nkuruuk.”
42
Yooto kooyeey subak ankusaay kule, “Leyye, Baaba, yoo meemuuchaktoos kiinemtoowoo nyalili, kuyeyakay kuu woloo imaktooy.”
43
Yu keeyeew Yeesu nyebo ayeeng', kunyoor mbo Betero karuuyo subak, kuuyu kiboonto rwoonik chee nyikiisech.
44
Kubakaakta rubiichoo ankuwokusaay nyebo somok kumwooye kuu yoo kabo taay.
45
Nto tee yoo kooyeey woloo kimiite rubiik ankumwoochi kule, “Ankoo toobeng'tee rwoonik? Okas, kaakuyit besyoosywek kiiyokoochi *Weritaab Chii awunnyekaab kibng'ookisiis!
46
Ong'nyiin choomtooyiinteet kaakucho.”
47
Kutakumii Yeesu kung'aloole, kuyitu Yuuta nyoo ki akeenke am rubiikaab Yeesu taman ak ayeeng'. Kiboontoonu keey biiko chee chaang' chee kitinye chookiinek akoo syaariinek chee kiiyooku mbo kibkoros chee wooyech akoo booyik.
48
Kikiisimkumwoochine Yuuta bichoo kule, “Nyoo okase atorooche oname, nyooto.”
49
Kutakyine keey Yuuta Yeesu bakeenke ankutorooche kumwooye kule, “Aase, Mokoryoonteet.”
50
Kuketyi Yeesu kule, “Kacheetoroochoo man oo, murooni?” Kuteryekyine bichoo Yeesu bakeenke.
51
Kukase rubiinteet ake nyee kibo Yeesu kuu nyoo, kung'usu chookiit nto bere kuyeb motwooriinteetaab *kibkoros nyee woo, kuchwenta yiitit koosuuyto.
52
Kumwoochi Yeesu rubiintoonoo kule, “Ketyi chookiing'uung' kiraaru, kuuyu iwoong'tooy chookiit chii nyoo kicham ng'ooki.
53
Moonkete kule amuuche anii akuur Baaba kuyeetyeechoo areet akeenke ankoomuuche kooyookwoo lukoosyek taman ak ayeeng' chebo malayikaanik?
54
Kayityiin ng'aleechu ak siruutekaab Yeyiin.”
55
Kuweekyi keey Yeesu bichoo ankumwoochi kule, “Obere antoochine anii lukeet nyee mache kuweech kooreet sookwaante chookiinek ak syaariinek boonamaa? Ntee kwaaboonte keey anii akweek kwaak am biiwuutaab *Kootaab Yeyiin aneetiisyee. Kwaamaak nee simoonamaa yooto?
56
Nteenee ityiiche ng'aleechu tukul siruutekaab *woorkooyik.” Kimweyee rubiik Yeesu!
57
Nto mii yoo kukweryoot bichoo Yeesu kaab Kayaafa, kibkoros nyoo woo. Kikiikooruruukyi keey wolooto kaaneetikaab kiruutek akoo booyik.
58
Kiinaamaat Betero Yeesu akoy kiyenkuutaab kaytaab chiichoo bo koros ankoobuur ak riibiikaab kayaata sukukas kiyee makuyeyakay.
59
Kimach *kookweetaab Yuutayeek tukul kooyyoonkyine mbo *kibkoros chee wooyech, kule kunyoor ng'alyoo nyee miyaat nyee name Yeesu sikiitiilchi meet.
60
Nteenee manaanyoor ng'alyoo ankoo kisyeem biich chee chaang' kumololchi Yeesu ng'al. Nto yityo koonem keey biiko alake ayeenku
61
ankumwooy kule, “Kimwooye chiichi kule imuuche kooturbuub Kootaab Yeyiin ankuteechee besyoosyek somok.”
62
Kooyyo *kibkoros nyee woo ankuteebee Yeesu kule, “Itinye wolee ituuktooy keey am ng'aleechu mwooye bichu?”
63
Kusiisyi keey Yeesu. Kumwoochi subak kibkoros nyee woo Yeesu kule, “Ateebeeniing' am taayeetaab Yeyiin kule ii, 'Inyiing' man *Kaararookiinteet, Lakwataab Yeyiin?'”
64
Kuwal Yeesu kule, “Ee, wuu nyooto, keemwaay. Nteenee amwoowook akweek tukul kule: Mookas *Weritaab Chii koobuurunee awutaab taay nyebo nyoo bo Kaamukey ankookas kuchoonee boolik.”
65
Kikwaany keey moo chiichoo woo bo koros kut kubaach sirookyii ankumwooy kule, “! Kookas, kaakookerkeeyee keey chiichi Yeyiin! Nee ake nyee takeemwooweech kurubta keey ak chiichi? Kookas oob wolee kaakoontosuurto Yeyiin?
66
Obere nee akweek?” Keeleenchi, “Misyine meet.”
67
King'utyine alake koonyek ankootuluuche, kusyeeche alake
68
sukumwoochine kule, “Kaararookiintooni, ng'oo nyoo kabiring'?”
69
Yooto kumiite Betero yoo kibo biiy, kucho cheebto ake nyee ki motwooriin ankumwoochi kule, “Kweeboonte keey nkinyiing' Yeesu nyebo Kalilaaya.”
70
Nteenee kutuuch keey Betero am taayeetaab biiko tukul kule, “Maankete kiyee imiite imwooye.”
71
Nto tee yoo koonookyi Betero yebo oreet nyee weetii kayaata. Bere kukas cheebto ake, kumwoochi biiko kule, “Kiboontoote keey chiichi Betero nyebo Naasareet.”
72
Kutuuch keey subak Betero kut kuchubchine keey kule, “Maankete anii chiichi!”
73
Nto nyee ma tyaa koonookyi Betero biiko chee kikiiyyoonyee yooto ankumwoochi kule, “Kubooyiit man, inyiing' ake. Kerkeey ng'elyebng'uung nyebo chiichi.”
74
Kuchubchi keey Betero kule, “Maankete anii chiichi!” Kubekunee ng'aleechaa kuutiinyii, kooturkuuche kirkoonkiit bakeenke.
75
Yooto nanyuun koosoot Betero yoo kimwooye Yeesu kule, “Kutoombo kooturkuuche kirkoonkiit, meetuuch keey inyiing' areet somok kule meenketoo.” Yooto kuwo saang' ankuwokuriir nyee ng'waa miisin.