Kuurkeetaab 27
1
Nto yu kamwook asiista, kootiil mbo kibkoros chee wooyech tukul ak booyikaab Yuutayeek kule keebakach Yeesu.
2
Yooto, keerat Yeesu ankeekwerchi *Bilaato nyoo kaayyoong'iinteetaab Rooma.
3
Nto yu kakas Yuuta nyoo kichoomtooy Yeesu kule kaakiiruusta Yeesu, kuriirunee ng'weny. Kiketyi feetaanichaa ki sosom mbo kibkoros choo wooyech ak booyik.
4
Kimwoochi kule, “Kwaayey ng'ooki achaamte chii nyee beere keey.” Yooto kuketyi bichoo kule, “Kukwaaneeniing'!”
5
Yooto nanyuun kuwiirchi Yuuta feetaanichaa *Kootaab Yeyiin ankuwokookeet keey.
6
Yu kanyoor mbo kibkoros chee wooyech feetaanichaa kumwooy kule, “Salootiin beesaanichu koroti, kunyi meerook kiikoochi lenkuutaab Kootaab Yeyiin.”
7
Kung'alaal bichoo nto mii yoo, kootiil kule bokyaalee mbar nyee sikeemuchine biich chee sobooy. Kikeekuuree mbaraanaa Mbaraab Kibtereen.
8
Kiyooto nyee kiyey keekuure wolooto akoy kura kule, “Mbaraab Koroto.”
9
Kuyityiin yooto ak kiyee kimwooye *woorkooyoonteet Cheeramnyaa kule kikeenam betekik sosom chebo feeteet choo kyooltee inee *Israyeeliik
10
ankwaalee mbaraab kibtereen kuu woloo kimwooytoowoo Yeyiin.”
11
Nto kumii Yeesu taayeetaab *Bilaato, kuteebee baytooyiintoono kule, “Inyiing' baytooyiinteetaab Yuutayeek?” Kuketyi Yeesu kule, “Wuu nyooto sinee.”
12
Nto yu keeteeyee keey mbo kibkoros chee wooyech ak booyikaab Yuutayeek kurubta keey Yeesu, kusiisyi keey.
13
Kuteebee Bilaato kule, “Meekase wolee tee ng'aleek chee mwooye bichu kule! Kiiyey?”
14
Manaaket Yeesu ng'alyoo mbo kisich. Kubotyi tonkoy baytooyiintoonoo.
15
Kiityooktooy baytooyiinteet am kenyiit ake tukul kibratyaanteet akeenke nyoo kaakutool biiko. Kikeeyeye kuu nyooto yoo kyoome *Saakweetaab Keeytaayeet.
16
Kimii am besyoonooto chiito ake nyee kikiikuchiis miisin kut kikiikeerat. Kikeekuuree chiichoo Baraaba.
17
Kunyoo, kuteebee Bilaato biiko chee kikiiruruukyi keey yooto kule, “Ng'oo nyee omache akweek atyooktoowook, Baraaba nto Yeesu nyoo keebere *Kaararookiinteet?”
18
Kimwooye baytooyiintoonoo kuu nyooto koonkete kule kiituuyiityi icheek Yeesu moo.
19
Kutakumiite Bilaato keebuuree ng'echereenyii bo baytooyiisyeet, kooyookyi koorkeenyii ng'alyoo kule, “Kweeyiimaa kiirwootik kuyyeech kubo chiichoo. Kunyi, meeyeyee kiy kuuyu beere keey.”
20
Kutee yooto tukul, kitas taay mbo kibkoros chee wooyech ak booyikaab Yuutayeek koowuruur bichoo kumwaayta kiityaakta Baraaba ankeebakach Yeesu.
21
Kuteeb subak baytooyiintoonoo kule, “Nkono am bichu ayeeng' nyee omache akweek atyooktoowook anii?” Kule, “Baraaba.”
22
Kuteeb subak Bilaato kule, “Ayeyee nee Yeesu nyoo keebere *Kaararookiinteet?” Kooruumchi bichoo tukul kule, “Keebakach!”
23
Kumwooy baytooyiintoonoo kule, “Rokos nee nyee koyey chiichi?” Kuboloobol bichoo kumwooye kule, “Keebakach! Keebakach!”
24
Yu kakas Bilaato kule kameetakoomuuche bichoo ankiimuuche koong'etng'eet woorooryeet, kuram beeko ankoowuunee awunnyek am taayeetaab bichoo kumwooye kule, “Kukwaaneenaak korotiikaab chiichi, abeere keey anii.”
25
Yooto, kuwal bichoo tukul kule, “Kany kwaameech acheek korotiikaab chiichi ak lokokyoo!”
26
Yooto kootyooktoochi Bilaato bichoo Baraaba ankookoochi kiityoolseet Yeesu nto tee yoo kooyokoochi bokeekwertoochi murtooywoonteet.
27
Kukweryoot biikaab lukeet Yeesu kaytaab baytooyiinteet *Bilaato nto tee yoo, kooruruukyi keey lukeetaab booryeet tukul Yeesu.
28
Kubuutee Yeesu sirook ankoolookyi sireet nyee arraa,
29
kutaay kuutweetaab katook ankookemeerchi met kuyey wuu nyee baytooyiin. Kikiikoochi kunamee kirokto awunyii nyebo taay ankubokukutunyee bichoo taayeenyii kuyey keey wuu nyee kakoonyit Yeesu kumwooye kule, “Kimikim! Baytooyiinteetaab Yuutayeek!”
30
Kung'utyi ankoosorunee kirokoo kimii awut ankookoryoonyee met.
31
Yu kakiintosuur, kiireekunee siraanaa arraa ankiilookyi sirookyii choo kobo kwaak nto tee yoo, keebeeta subokeekwertoochi murtooywoonteet.
32
Kumii keebeetooy, keetuuyee chiito ake nyee kibo Kureen nyee kikeekuuree Simooni. Keekerchine nyoo koong' bakeenke kukalab murtooywoonteetaab Yeesu.
33
Nto yu kakeeyit yee kikeekuuree Kolkoota (kaayneet nyee ibooru kule 'Rokyeetaab Met')
34
Kiikoochi Yeesu *tifaayiik chee kikiikeetasee saakityeek alak kule kuyye. Nto bere kuchamcham, kutay kuyye.
35
Nto yu kaakukwertoochi bichoo Yeesu murtooywoonteet, kubar *sekeryeet sukoonketee kule ng'oo nyee makuyib sireet nkono.
36
Nto kaakuyityo, kutebee bichoo yooto kuriib Yeesu.
37
Kikiikeesirchi kiito ake ng'aleek chee kiyey sikiitiilchi Yeesu meet chee kimwooye kule: Yeesu nyi nyoo baytooyiinteetaab Yuutayeek. Kikeekwertoochi kiyooto yoo bo metitaab Yeesu barak am murtooywoonteet.
38
Kikeekwertoochi nkicheek kibng'ookisiis ayeeng' murtooywoosyekwaa. Kikiiyyoong'to ake kutaban awutaab Yeesu nyebo taay ankiiyyoong'to ake komostaab kaataam.
39
Kiinchuruure biiko chee kimure yooto Yeesu ankukwertooy metewook
40
kumwooye kule, “Ntee kweebere meeturbuub *Kootaab Yeyiin ankiiteechee besyoosyek somok? Iraraach keey, naas. Yoo inyiing' Lakwataab Yeyiin, irekunee murtooywoontoonoo!”
41
Kiinchuruur Yeesu nkicheek mbo kibkoros chee wooyech, kaaneetikaab kiruutek akoo booyik.
42
Kimwooy kule, “Kiisoobe chiichi biiko alak, ntoo meesoob keey naas. Ma inee baytooyiinteetaab *Israyeel? Yoo keemuuch kurekunee murtooywoontooni, makiiyenchi.
43
Kweekoosee keey oob chiichi Yeyiin ankumwooye kule, 'Ayeku Lakwataab Yeyiin?' Kany kusor naas Yeyiin yoo chame.”
44
Kiinchuruur nkicheek kibng'ookisiisyechoo kikeekwertoochine murtooywoonteet ak inee.
45
Kicho meenaneet beet nyee kiker kooreet tukul, kung'eetee asiiswek lo akoy asiiswek sokool.
46
Yu kayit asiiswek sokool, kooncho Yeesu kule, “Yeyiinteenyuu, Yeyiinteenyuu, ntee 'keebakaaktaa anii!” (Kimwooye yooto am kuutiinyii kule, “Eli, eli, lema sabaktani?”)
47
Yu kakas biikaab lukeet chee kimii yooto, kule, “Miite kukuure *Eliiya.”
48
Yooto kulabatee akeenke am icheek kiroonkuryeet ankooluumta *tifaayiik chee kitaytay ankurutyi kiroonkuryoonoo keetit nto yityo kooyokoochi kuutiitaab Yeesu.
49
Kimwooye alake kule, “Okany keekas yoo makucho Eliiya chokooraraach!”
50
Kiincho Yeesu ankung'et.
51
Yooto bakeenke, kukereerunee keey ayeeng' kuchakee barak akoy ng'weny ankeet nyee ki rikimim nyoo kikiiyeelee Kitookiitaab *Kootaab Yeyiin. Kiitimtiimakoy kooreet ankooteesiis rwoontook.
52
Kiiteesiis kochonkoosyek kuyootakiis ankung'eetyo biiko chee chaang' choo kikiikubek anki churtootiin.
53
King'eetyee bichoo kochonkoosyek, nto yu kaakiing'eetee Yeesu, meet kuba Yeerusaleem ankooboorchi keey biiko chee chaang'.
54
Yu kakas nyee woo nyebo lukeet ak biikyii choo kiriibe Yeesu kibring'ring'nyoonoo akoo ng'aleek tukul chee kiyeeyakiis, kumuuyo ankumwooy kule, “Kubooyiit man, akoo Lakwataab Yeyiin chiichi!”
55
Kikiiyyoong'iis cheebyoosook alake chee chaang' yee loo kutoobene kiyee kiyeyaktoos. Cheebyoosoochooto choo kiboontoote keey Yeesu kuchakee Kalilaaya kuyeetyeechinoote.
56
Alak am chooto ku Maaryaa nyebo Maktaala, Maaryaa kaametiitaab Yaakobo ak Yooseef akoo kaametiitaab werichoo kibo Sebetaayo.
57
Nto yu keemen kooreet, kucho chiito ake nyee ki rubiinteetaab Yeesu ankiboonto baytit nyee woo. Kibo *kiriinkeet ake nyee kikeekuuree Arimataaya nto kaayneenyii ku Yooseef.
58
Kiwo chiichoo wolee kimii Bilaato ankusoom kiikoochi boortaab Yeesu. Kuchamchi Bilaato kiikoochi.
59
Kimwaayta Yooseef kiireekunee boortaab Yeesu murtooywoonteet ankeeratee ankeet nyee tiliil.
60
Nto tee yoo, wokookoochi kochoonkeenyii nyee kitakoowore ankimanaakeemuchi chii. Yooto kuwunukyi rwaanteet nyee woo kuker kurkeetaab kochonkaanaa ankuweechi keey.
61
Kikiibuuree Maaryaa nyebo Maktaala akoo Maaryaa nyiin ake yooto kukas kochonkaanaa.
62
Nto yu kayyeekunee, yee ki besyeetaab *Sabaato, kubeechi mbo kibkoros akoo *Farisaayeek *Bilaato ankumwoochi kule,
63
“Mokoryoonteet, kimwooye ng'wiintoonoo bo chii yooto kitakusoboot kule, 'maang'eetee meet yoo kaakukeeyta besyoosyek somoku,'
64
kunyi mwaayte keeriib kochoonkaanaa akoy besyoonoo bo somok. Nto buch, imuuche rubiikyii bokuchoor muusto nto tee yoo kumwoochi biiko kule kookiing'eetee meet. Makumiyatiit yooto ng'wiiynaneet nyiitenyi bo let kusiir nyoo kibo taay.”
65
Kuwalchi Bilaato kule, “Obeete riibiik alak booriib kochonkaanaa kuriibakoy kuu woloo omuuktooy.”
66
Kuba bichoo ankubokootiiny kurkeetaab kochonkaanaa karoomin kumoolchi rwaantaanaa yooto ankookoochi ribiichoo kuriib.