¹ Yu keerir kooreet kukookukeeyta besyeetaab *Sabaato, kuwo Maaryaa nyebo Maktaala akoo Maaryaa nyiin ake bokoorwaam kochonkaanaa. ² Yooto, kooring'riing' kooreet miisin kuuyu kikiikurekunee *malayikeetaab Yeyiin barak, kiwo akoy kochonkaanaa ankuwunukto rwaanteet ankoobuuree barak. ³ Kiilekecheeche malayikaanaa kuu yoo keewech kooreet anki leelach sirookyii kuu kweyaanteet. ⁴ Yooto kumuuyo riibiichoo kimii yooto ankubootoon kut wuu nyee makubek. ⁵ Kumwoochi malayikeet cheebyoosoochoo kule, “Moomuuye, ankete anii kule ocheeng'e akweek Yeesu kokeekwertoochine murtooywoonteet. ⁶ Mamiite ytu nteenee kaakung'eetee meet kuu yoo kimwooye. Okwaa bookas woloo komiite ⁷ ankoobe areet akeenke boomwoochi rubiikyii kule, 'Kaakung'eetee Yeesu meet ankumakoonto Kalilaaya wolee boonyoorchine.' Kookas oob?”

⁸ Yooto kung'eetyo cheebyoosoochoo areet akeenke ankulabat bokumwoochi rubiikaab Yeesu ng'aleechaa. Kitinye bootoonik chee katasta keey ng'erekweek chee chaang'. ⁹ Kumii takulabate, kutuuyee Yeesu. Kootaakwees icheek Yeesu nto yityo kukutuny kukoob kereenkookaab Yeesu nyee kakutunkyi. ¹⁰ Nto tee yoo, kumwoochi Yeesu kule, “Moomuuye.” Boomwoochi mbo ng'eetaabiya kuba Kalilaaya bokeenyoorye wolooto.”

¹¹ Kumiite cheebyoosoochoo kubeetii, kikiikung'eetyo riibiik alake ankuba kiriing' bokumwoochi mbo kibkoros chee wooyech kiy ake tukul nyee kaakuyeyakay. ¹² Nto yu kaakutuuyo mbo kibkoros chee wooyech akoo booyik kuchob ng'aleek. Kiikoochi riibiichoo beesaanik chee chaang' ¹³ ankumwoochi kule, “Omwaay kule, 'Kokwa rubiikaab Yeesu kweemooy ankuchoor muustaab Yeesu kukakeeruuye!' ¹⁴ Nto yoo kayityi ng'aleechu baytooyiinteet, makeemwoochi acheek karoomin ameebere makunamaak akweek ng'ala.” ¹⁵ Kunam riibiichoo beesaanichaa ankuyey kuu woloo kakeemwoochine. Kikyaamtaatee ng'aleechaa kimwooye riibiichoo wolee miite Yuutayeek akoy kura.

¹⁶ Kiba rubiichoo ki taman ak akeenke lekem am Kalilaaya woloo kimwoochine Yeesu kule kuba. ¹⁷ Nto yu kakas rubiichoo yeesu, kukutunkyi. Nteenee manaacham alake kule ki Yeesu nyooto. ¹⁸ Yooto kumwoochi Yeesu rubiichoo kule, “Kookeekoono anii kaamukeyweek tukul chee miite kibkoonkoy ak chee miite ng'weny. ¹⁹ Kunyoo obeetaate bororyoosyek tukul ankooyey biiko kuyek rubiikyuu. Obatisane am kaayneetaab Baaba, nyebo Leekweet akoo nyebo Tamirmiryeetaab Yeyiin. ²⁰ Oneete bichooto kooywey kiy ake tukul nyee kaamwoowook. Nto kubooyiit man, aboote keey akweek akoy tabantaab kooreet.”