Kuurkeetaab 4
1
Nto miite yoo, kooreetoot Tamirmiryeetaab Yeyiin Yeesu akoy wolee suurkween suwokutyem *Keniinteet.
2
Nto yu kawokubeenii Yeesu wolooto besyoosyek artam nyee kimoome kiy ake tukul, kwaam kemewuut.
3
Kuchoonchi Keniinteet ankumwoochi kule, “Yoo inyiing' Lakwataab Yeyiin ii, iweech baa, rwoontoochu kuyek amiik.”
4
Nteenee kuwalchi Yeesu kule, 'Masobee chii amit baateey nteenee sobee ng'alyoo ake tukul nyee choonee wolee mii Yeyiin.'”
5
Nto tee yoo, kuweeto Keniintoonoo Yeesu akoy Yeerusaleem ankookoochi kooyyoonyee yebo kotootyeet am barakuutaab *Kootaab Yeyiin.
6
Yooto kumwoochi kule, “Yoo inyiing' man Lakwataab Yeyiin ii, iraantee yuuteyu akoy ng'weny, kuuyu mwooye siruutek kule, 'Makooyook Yeyiin malayikaanikyii bokutaaching' simeebutyi rwaa kutuying'.'”
7
Kuketyi Yeesu kule, “Ntee mwooye subak siruutek kule, 'Meetyem Yeyiinteeng'uung'.'”
8
Kuweeto subak Keniintoonoo Yeesu lekemeet ake barak ankooboorchi baytit nyee mii kooroosyek tukul.
9
Kimwoochi kule, “Maakooniing' baytiiniin tukul yoo keekutung'woo.”
10
Kuketyi Yeesu kule, “Buunyoontooni, ng'eetee yu. Mwooye siruutek kule, 'Yeyiin nkit nyee machaktoos kiiyweye anku inee nkit nyee keekutunkyine.'”
11
Kubakaakta Keniintoonoo Yeesu. Nto yityo kukwa malayikaanik ankubokuyeetyeechi.
12
Nto yu kawokukas Yeesu kule kookeekerta Yoowaana ko, kung'eetee Yuuteeya ankooyeey Kalilaaya.
13
Nteenee yee kataminye Naasareet, wokuminy Kaabernaam kuleekitee tooliileet roorookoonoo kibo kibo Sabuloon ak Naftaali.
14
Kiyityiin yooto akoo yoo kimwooye woorkooyoonteet *Isaaya kule,
15
“Kookukas bichoo minye meenan lebkeeyyeet nyee woo am roorookeetaab Sabuloon ak nyebo Naftaali woloo leekitee Toolileetaab Kalilaaya woloo miite biich chee sobooy.
16
Kookuchoonchi lebkeeyyeet bichoo minye koor nyee kitub meenaneetaab meet.”
17
Kyaamtaat Yeesu lokooywek kuchakee yooto kumwooyoote kule, “Oweeksee miyootyeet kuuyu kaakuriik baytooyiisyeetaab Yeyiin.”
18
Nto mii besyeet ake, yee kimiite Yeesu kuweesyeetee sakaramteetaab Tooliileetaab Kalilaaya, kukas biiko alak ayeeng' chee kituubcho. Kiwiirchine bichoo neetiinekwaa tooliil kuname *burburiinek. Kikeekuuree ake Simooni nyoo kibokeekuur letuunoo kule Betero nto nyiin ake ku Antereeya.
19
Kukuur Yeesu bichoo kule, “Orubaa anii! Maaneetaak wolee oyisuntooy biiko.”
20
Kubakooktooy bichoo neetiinekwaa bakeenke ankurube Yeesu.
21
Yu keenaata Yeesu taay kisich, kukas subak biiko alak ayeeng' chee kituubcho kutinye keey kwaan am mweeng'. Kikeekuuree ake Yaakobo keele nyiin ake Yoowaana nto kwaan ku Sebetaayo. Kimiite bichoo kuyeytooy neetiinekwaa. Yooto kukuur Yeesu murechooto ayeeng' choo kituubcho.
22
Kubakookyine icheek kwaan mweeng' ankurube Yeesu.
23
Yooto nanyuun, kuweesyetootee Yeesu Kalilaaya tukul kooneetiisyootee kooriikaab saayeet bo Yuutayeek. Kyoomtoote lokooywek chee karoomech chebo baytooyiisyeetaab Yeyiin ankoosooboote biiko chee kiboonto boorwoonik ak tankuusyo ake tukul.
24
Kikyaamtaat ng'aleechaa bo kwong'uut choo kiyeye Yeesu akoy yeemeetaab Siirya kutee yee tee. Yooto kiimutyi inee biiko tukul chee kiimnyoontoos kunam wolee mii chee kitinye tamirmirook chee miyootech, chee kitinye mewuunkook chee kichunkutootiin. Kiisoob Yeesu bichoo tukul.
25
King'eetyee biiko chee matee chu Kalilaaya, Teekabooli, Yeerusaleemu, Yuuteeya akoo biiteetaab Yoortaan ankoosoob Yeesu.