¹ Yu kakeeyta besyoosyek chee chaang', kutook chiito ake nyee kikeekuuree Batisaniinteet Yoowaana nyee kyoomtootee lokooywek suurkweeneetaab Yuuteeya. ² Kimwooye kule, “Oweeksee miyootyeet kuuyu kaakuriik baytooyiisyeetaab Yeyiin!” ³ Inee nyoo king'aloolee *woorkooyoonteetaab Yeyiin *Isaaya yoo kimwooye kule, 'Ochob keey, ankoochuulchi Mokoryoonteet keelto.'”

⁴ Kiilooche Yoowaana sireet nyee kikiikwoorunee sabureekaab *tembes. Kimootee keey anweetaab suwe ankwoomoote taalamik akoo kimnyeteet. ⁵ Yooto kung'eetyee biiko Yeerusalemm ak Yuuteeya kumukuul ak biiteetaab Yoortaan kutee yee tee ankubeechi Yoowaana. ⁶ Kimwaayta bichoo ng'ookiswookikwaa ankubatisanee Yoowaana ayneetaab Yoortaan. ⁷ Nto bere kukas Yoowaana kakwa *Farisaayeek chee chaang' akoo *Satukaayeek kule keebatisan, kumwoochi bichoo kule, “Oyeku ng'oomng'ook kuu eereenooy! Obere moochililee ng'wooninto nyoo makucho ee? ⁸ Makwook nanyuun oyeye ng'al chee karoomech sootooku kule kooweeksee miyootyeet, ⁹ amookwerte keey omwooye kule, 'Ntee keebooye Abraam.' Amwoowook man kule imuuche Yeyiin kuyey rwoontoochu kuyek lokokaab *Abraam. ¹⁰ Itorooroot ayweet nyee mache keeyebee keetiit. Kunyi keet ake tukul nyoo kamayey lokoyeek chee karoomech kiiluulto ankeetoorchi ma. ¹¹ Abatisaneenook anii beeko kooboor kule kooweeksee miyootyeet, nteenee miite kuchoonii chiito nyee woo kubiira anii. Maayeme mbo areekyi kweyoonik. Machokubatisaneenaak Tamirmityeetaab Yeyiin ak maata. ¹² Miite chokuseestooy mororyeek ankubeelee mororyeechoo maataab kibchuulyo nto yityo, kukonoree nkoonuuk chooke.”

¹³ Nto mii yoo kung'eetee Yeesu Kalilaaya ankuwokubatisan Yoowaana am ayneetaab Yoortaan. ¹⁴ Nteenee kumach kutay Yoowaana. Kimwooy kule, “Ntee ichoonii wolee amiite anku inyiing' nyee kateerook ibatisanaa?” ¹⁵ Kukeyti Yeesu kule, “Yey inyiing' kuu nyooto raat kuuyu wuu nyooto wolee maktooy Yeyiin.” Kucham Yoowaana kubatisan Yeesu. ¹⁶ Nto yu kaakeebatisan Yeesu, kuloong'unee beeko ariit. Keeyootyi woliin bo barak ankukas Tamirmiryeetaab Yeyiin nyee wuu cheebtuuke kureku ankuchokoobutyi inee. ¹⁷ Yooto keekuur am barak kule, “Lakwanyuu nyi nyee achame ankaang'erekyine.”