¹ Bakeo Jesosy nitarihy ty Fanahy ho an'efitsy any mba hala ty devoly fanahy. ² Lafa baka nifaly hany efapolo andro nohoefapolo haly ie, le mosary. ³ Namonjy ty mpangalaky fanahy ka le nivola taminy hozao: “Lafa Anan-Janahary Iha, le volano hanjary mofo vato reto.” ⁴ Fa Jesosy namalyka le nanao taminyhozao: “Voasoratsy hozao: ‘Tsy ty mofo avao ro hiveloma ty olo fa ze safa iaby aboaky ty vavan-Janahary.’” ⁵ Bakeo ty devoly nanday azy tamy ty tanà masy any ka le nampipetsaky azy tamy ty faranambony ty egilizy eo, ⁶ sady nivola taminy hozao: “Lafa Anan-Janahary iha, le milavoa ambany any, fa voasoratsy hozao: ‘Ie hibeko anjeliny rey hiahy anao’ noho ‘hanondrotsy Anao amy ty tanan-drozy eo, ka le tsy ho heloky amy ty vato ty tombonao.’” ⁷ Jesosy nivola taminy hozao: “Le mbo voasoratsy ndraiky hozao: ‘Tsy tokony hitsapa ty Tompo Njanaharinao Iha.’”

⁸ Nandesy ty devoly hana amy ty toera abo any ndraiky Ie sady nampiboaky azy ty fanjaka iaby amy ty tany iaby noho ty hasoa rey. ⁹ Hoy ie taminy hozao: “Iaby rey ro hameako anao, lafa hohatsy ka le mandohaliky anilakobeo noho manompo ahy iha.” ¹⁰ Bakeo Jesosy nivola taminy hozao: “Miala eto iha, Satana, Fa voasoratsy hozao: ‘Iha ro hanompo ty Tompo Njanaharinao, sady ie raiky avao ro ho tomponao.’” ¹¹ Bakeo niala Azy ty devoly, sady ndreto, nisy anjely niavy ka le nanompo Azy.

¹² Sady lafa re i Jesosy fa voasambotsy Jaona, le nimpoly nana Galilia any ie. ¹³ Niala an'i Nazareta ie ka le nandeha sady nipetsaky ta Kapernaomy ao, ze amisisin-driaky ty Galilia eo, amy ty zara-tany i Zebolona noho Naftaly ao. ¹⁴ Zay ro nitsanga mba hahantanteraky ze nambara ISaia to-resaky hozao: ¹⁷ Sady tamy fotoa zay Jesosy le nanomboky nanambara safa noho nivola hozao: “Mibebaha, fa mariny ty fanjaka ty lanitsy.”

¹⁸ Laha nandeha tamy sisy ty Riaky i Galilia eny Ie, le nahita mpirahalahy roe, Simona ze nikaihy hoe Petera, sady Andrea rahalahiny, nanoraky ty haratony tamy ty riaky eny, fa mpihaza ndrozy. ¹⁹ Hoy Jesosy tamin-drozy hozao: “Andao, hanoriky Ahy, fa hanoviko mpihaza olo iha.” ²⁰ Teo noho eo avao le niala harato rey ndrozy ka le nanoriky Azy.

²¹ Sady laha mbo nilitsy Jesosy le nahita mpirahalahy ahy roe hafa, Jakoba ana i Zebedio, noho Jaona rahalahiny. Namboatsy ty haratony tan-tsambo ndrozy ao niaraky tamy i Zebedio baban-drozy. Nikaiky androzy Ie, ²² ka le teo noho eo avao le niala ty lakany nooho ty babany ndrozy ka le nanoriky Azy.

²³ Nandeha era i Galilia Jesosy, nampianatsy tamy ty synagogan-drozy ao, nanambara ty filazantsoa ty fanjaka, sady nanafaky karaza arety iaby mbamy ty rofy iany iaby tamy ty olo eo. ²⁴ Niparitaky era i Syria ty vaovao mikasiky Azy, ka le nandesy ty olo Taminy eo ze marary iaby, marary ty karaza arety noho fangirifiria, demoniaka rey, noho ze marary ty androbey noho marary ty paralysisa. Nafaha i Jesosy rozy reny. ²⁵ Olo lako mare baka Galilia any, Dekapolisy, Jerosalema, Jodia sady ty baka amy sisy i Jordana any ro nanoriky Azy.