¹ Tamy andro zay ronandeha nanambara tan'efitsy i Jodia any i Jaona mpanao Batisa manao hozao: ² “Mibebaha, fa mariny ty fanjaka ty lanitsy.” ³ Fa ie ro azy nivolan'Isaia to-resaky iny, manao hozao: “Misy feo raiky mikaiky mare an'efitsy any hozao: ‘Amboaro ty lalany Tompo, ahitio ty lalany.’”

⁴ Sady Jaona nisalotsy volon-drameva noho nanao santira remby ro nanoviny fihinana. ⁵ Sady Jerosalema, Jodia iaby, noho ty faritsy iaby miodidy ty renirano i Jordana ro namonjy azy. ⁶ Nanoviny batisa tamy ty renirano i Jordana eny ndrozy, lafa nieky ty fahotany.

⁷ Fa laha nahita Fariseo noho Sadoseo lako namonjy azy rey mba hanovy batisa ie, le hoy ie tamin-drozy hozao: “-Tariha nenara atsiky poizy, ia ro nampiemby anareo hiala ty heloky ze ho avy? ⁸ Manofasa voa mitovy ty fibebaha. ⁹ Sady ka misaina ty hovola am-po hozao: ‘Mana an'i Abrahama ho babany zahay.’ Fa volaniko aminareo fa Njanahary ro mahavita mampitsanga anaky ho an'i Abrahama ndra ro baka amy vato reto aza. ¹⁰ Sady fa nipetsaky am-pototsy ty hazo eo ty famaky. Ka hazo iaby ze tsy mamoa voa soa rey ro ho tapahy sady hatoraky anay afo any.

¹¹ Manao batisa nareo amy ty rano ho amy ty fibebaha zaho. Fa mahery noho zaho ie ze avy afarako, sady zaho ro tsy maeva vatany ndra le ty handay ty kapany aza. Hanao noho ty afo Ie. ¹² Fa an-tanany eny ty fikororohanany mba hanalioba ty fampirima sady hamory ty variny an-tsompitsa any. Fa ie handoro akotsy amy ty afo ze tsy mety maty.”

¹³ Bakeo Jesosy baka Galilia any ka le tamy ty renirano i Jordana eo mba ho anovy i Jaona batisa. ¹⁴ Nefa i Jaona ro niezaky nanaka azy, manao hozao: “Zaho ro mila anovinao batisa, nefa iha ndraiky va ro mamonjy ahy?” ¹⁵ Jesosy namaly sady nivola taminy hozao: “Enkeo zay amy zao, fa zao ro mety amintsika hahantanteraky ty fahamarina iaby.” Bakeo Jaona nanenky azy.

¹⁶ Lafa vita batisa Ie, le niboaky ty direkita Jesosy, sady ingo, nivoha taminy ty lanitsy. Hitany ty Fanahin-Janahary nijotso mahahaky ty pizon sady nana anabony eo. ¹⁷ Sady ingo, nisy feo baka an-danitsy any nanao hozao: “Toy ro Anako malalako. Zay enkeko bibiky.”