¹ Sady lafa avy ty maray, le nitetiky hanohotsy an'i Jesosy mba hamono Androzy ty bey ty mpisoro noho ty olo-bey iaby. ² Ndrozy namehy Azy, nitariky Azy tambaliky any, sady nanome Azy tamy i Pilato governora.

³ Sady Jodasy, azy namitaky Azy iny, lafa nahita fa voheloky Jesosy, le nibebaky ie sady nampimpoly volafoty telopolo rey tamy ty bey ty mpisoro noho olo-bey rey,

⁴ sady nivola hozao: “Nanota zaho tamy ty namitahako lio tsy manan-tsiny.” Fa ndrozy nivola hozao: “Ahoanay ino? Anao zay.” ⁵ Le natorany tan-degilizy ao volafoty rey, sady niala, noho niboaky sady namonjy ty vatany Ie.

⁶ Bey ty mpisoro rey nangalaky volafoty rey sady nivola hozao: “Tsy ara-dalà ty mampipetsaky toy amy ty fanajarian-jala, safe toy ro vilin-dio.” ⁷ Niara-niresaky olo ndrozy sady nivily ty baibo ty mpanao valany tanimanga ze handevena vahiny rey tamy kala rey. ⁸ Sady zay ro fikqny nikaiha baibo zay hozao: “Baibo ty Lio” zisiky androany.

⁹ Sady le tanteraky ze voavola tamy ty olo to-resaky jeremia, manao hozao: “Nangalaky tyvolafoty telopolo ndrozy, vily nanampea ty olo lakon'Israely rey Azy, ¹⁰ sady ndrozy nanome zay ho ahy ty baibo ty mpanao valany tanimanga, manahaky ty nitoraha ty Tompo ahy.”

¹¹ Sady Jesosy nitsanga taloha ty governora eo, sady ty governora nanontany Azy hoe, “Iha va ro mpanjaka Jiosy rey?” Jesosy namaly azy hozao: “Voavolanao.”

¹² Fa lafa nimpisazy ty bey ty mpisoro rey noho olo-bey rey ie, le tsy namaly ndra ino ndra ino.

¹³ Le nivola taminy Pilato hozao: “Tsy renao va ty fanasazia iaby aminao ato.” ¹⁴ Fa tsy namaly ndra safa raiky aza Ie, tseriky tanteraky laha zay ty governora.

¹⁵ Sady isaky ty fifaleafalea ro fomba ty governora ty mamototsy gadra raiky voatingy ty olo lako. ¹⁶ Tamy fotoa io, nana gadra malaza raty kaihe hoe Barabasy nddozy.

¹⁷ Laha zay lafa niara-nivoary ndrozy, le hoy Pilato tamin-drozy hozao: “Ia eo teanareo halefako ho ahy nareo? Barabasy, sa Jesosy ze kaihe hoe Kristy?” ¹⁸ Hainay fa noho ty fialona ro nanomezan-drozy an'i Jesosy taminy.

¹⁹ Laha nipetsaky tamy ty seza fitsara eo ie, le nandefa safa tamy ty valiny sady nanao hozao: “Tsy mana ndra ino ndra ino atao amy lahilahy tsy manan-tsiny toy zaho. Fa malahelo mare zaho androany noho ty azoko mikasiky Azy.”

²⁰ Sady ty bey ty mpisoro rey noho olo-bey nandresy lahatsy ty olo lako rey mba hangataky an'i Barabasy, sady hampamono an'i Jesosy. ²¹ Nanontany androzy ty Governora hozao: “Ia amin-drozy roe ro teanareo halefako ho ahy nareo?” Hoy ndrozy hozao: “Barabasy.”

²² Pilato nivola tamin-drozy hozao: “Ino ro tokony anoviko amy i Jesosy ze kaihy hoe Kristy?” Rozy iaby namaly hozao: “Fantsiho amy ty hazofijalea Ie.” ²³ Le hoy Ie hozao: “Nanino, ino ro heloky nanoviko?” Fa vo maiky ndrozy nikoraky mare hozao: “Fantsiho amy ty hazofijalea Ie.”

²⁴ Fa lafa hita i Pilato fa tsy afaky hanao ndra ino ndra ino ie, nefa fa nanomboky ty korakoraky, le nangalaky rano ie, nanasa ty tanany taloha ty olo lako eo, sady nanao hozao: “Tsy manan-tsiny amy ty lio lahilahy tsy man-tsiny toy zaho. Fa asanareo zay.”

²⁵ Olo iaby rey nivola hozao: “Ho aminay noho ty ananay lahy ty liony.” ²⁶ Le nalefany ho an-drozy Barabasy, fa nanisy karavasy an'i Jesosy ie sady nanome Azy ho fantsihy.

²⁷ Bakeo maramila ty governora rey nangalaky an'i Jesosy handeha an-dapa ao sady namory goropy maramila iaby rey. ²⁸ Nangalakh ty fisalorany bdrozy sady nampanao salotsy jaky Azy. ²⁹ Nanambotsy satso-boninahitsy ftiky ndrozy sady nampipetsaky zay tan-dohany eo, sady nampipetsaky tehy tamy ty tanany ankavana eo. Nandohaliky tanilany eo ndrozy sady nikizaky Azy, nanao hozao: “Arahaba, mpanjaka ty Jiosy!” ³⁰ Niroahin-drozy Ie, sady nalan-drozy ty tehy ke namango Azy mare le mare tamy ty lohany eo. ³¹ Lafa baka nikizaky Azy ndrozy, le nangalaky ty salotsiny lava sady nampisalotsy Azy ty fisalorany, sady nanday Azy niboaky mba hamantsiky Azy amy ty hazofijalea.

³² Lafa niboaky ndrozy, le nahita pahilahy raiky baka Syrena any kaihe hoe Simona, ze niforisevan-drozy hiaraky amin-drozy mba hampitakony ty hazofijaleany. ³³ Nana amy ty toera kaihy hoe Golgota ndrozy any, ze midika hoe “Toera ty Karandoha.” ³⁴ Namean-drozy divay mifangaro amy ty afero Ie mba hinomy. Fa lafa nandramanany zay, le tsy nino Ie. ³⁵ Lafa nifantsihin-drozy tamy ty hazofijalea Ie, le nanovin-drozy loka ty fizara fisalorany rey, ³⁶ ka le nipetsaky ndrozy sady nijano niemby Azy. ³⁷ Tanabo ty lohany eo ro nametsahan-drozy soratsy mivola ty nanasazia Azy, ze mivaky hoe: “Toy ro Jesosy, mpanjaka Jiosy rey.” ³⁸ Nisy Malaso roe nifantsihy niaraky taminy, ty raiky tankavanany eo sady raiky tankaviany eo. ³⁹ Ze nandalo rey ro nivolam-bola Azy, nolikoly ty lohan-drozy ⁴⁰ sady nanao hozao: “Iha ze handrava ty egilizy sady hamboatsy zay ndraiky anay ty telo andro ao, vonjeo ty vatanao! Laha Iha ro Anan-Janahary, mijotso baka amy ty hazofijalea eny!”

⁴¹ Manahaky zay koa ty bey ty mpisoro nikizaky Azy, niaraky tamy mpanora-dalà rey noho olo-bey rey, sady nivola hozao: ⁴² “Nanavotsy hafa rey Ie, fa tsy afaky manavotsy ty vatany. Ie ro mpanjakan'Israely. Engao Ie hijotso amy ty hazofijalea eny, sady le hino Azy tsika. ⁴³ Natoky an-Janahary Ie, engao Njanahary hamonjy Azy amy zao, laha manenky ty hanafaky Azy Njanahary. Fa ndra Ie aza ro nivola hozao: ‘Zaho ro Anan-Janahary.’” ⁴⁴ Manahaky zay koa malaso ze nifantsihy niaraky taminy rey nivola fanivatova taminy avao koa.

⁴⁵ Sady nanomboky tamy ty lera faha eny le nandrakotsy ty tany iaby ty haiky ka le zisiky amy ty lera faha sivy. ⁴⁶ Tamy ty lera faha sivy eo, le nikoraky tamy ty feo mare Jesosy sady nanao hozao: “Ely, Ely, lamà sabaktani?” Ze midika hozao: “Njanahariko, Njanahariko, nanino ro niala Ahy Iha?” ⁴⁷ Lafa re ty ilany tamy ze nitsanga teo rey zay, le hoy ndrozy: “Mikaiky an'i Elia Ie.” ⁴⁸ Teo noho eo ro nilay ty raiky tamin-drozy sady nangalaky spaonjy, namonto zay tamy ty vinegra, nametsaky zay tamy ty tohitohy bararata, sady nanome zay Azy mba hinomy.

⁴⁹ Ty ilany tamin-drozy nivola hozao: “Engao Ie. Hitantsika eo laha ho avy hamonjy Azy Elia.” ⁵⁰ Le nikoraky tamy ty feo mare ndraiky Jesosy sady nanome ty fanahiny. ⁵¹ Ingo, ty siky ty egilizy nidriatsy roe zisiky anabo any kable zisiky ambany any, sady nihorohoro ty tany, sady nivaky sasaky lafiam-bato rey. ⁵² Nivoha lolo rey, sady ty fatin'olon-Njanahary lako ze nimaty rey ro nitsanga. ⁵³ Ndrozy ro niboaky baka amy ty lolo tafara ty fitsanganany tamy maty ao, nilitsy ty tanà masy, sady niboaky tamy ty lako.

⁵⁴ Sady kapiteny rey noho ze nanenty an'i Jesosy rey lafa nahita ty horohoron-tany noho raha ze nitsanga rey, le nanjary natahotsy mare sady nanao hozao: “Anan-Janahary marina toy.”

⁵⁵ Nisy Ampela lako ze nanoriky an'i Jesosy zisiky a-Galilia any mba hikarakara Azy teo nanenty baka lavitsy eny. ⁵⁶ Tamin-drozy Maria Magdalena, Maria reny i Jakoba noho Josefa, sady ty reny anakilahy i Zebedio rey.

⁵⁷ Lafa hariva ty andro, le nisy lahilahy raiky manan-kanana baka Amrmatia any niavy, kaihe hoe Josefa, ze mpianatsy i Jesosy avao koa. ⁵⁸ Namonjy an'i Pilato ie sady nangataky ty faty i Jesosy. Le nibekoe i Pilato hamea azy zay. ⁵⁹ Nangalaky faty Josefa, namono zay tamy ty siky tongony malio, ⁶⁰ sady nampiemby zay tamy ty lolony vaovao ze nilavahany tamy ty lafiam-bato. Le nanodiky vato bevata hanohana ty varavara ty lolo ie sady niboaky. ⁶¹ Maria Magdalena noho Maria hafa rey ro eo, nipetsaky tamy sisy ty lolo eo.

⁶² andro manaraky, ze andro afara ty Fanomana, le niara-nivory tamy i Pilato bey ty mpisoro rey noho Fariseo rey. ⁶³ Hoasan-drozy hozao: “Tompoko, tiaronay fa tamy ty mbo velo mpamitaky iny, le hoy Ie hozao: ‘Afara ty telo andro, le hitsanga ndraiky Zaho.’ ⁶⁴ Ka le laha zay, mibekoa mba ho ambena ty lolo zisiky amy ty andro faha telo, laha tsy zay mpianatsiny rey mety ho avy sady hangalatsy Azy le hivola amy ty olo hozao: ‘Nitsanga tamy maty Ie,’ sady ty fitaky farany ro ho raty noho azy tamy ty velohany iny.”

⁶⁵ Hoy Pilato tamin-drozy hozao: “Mangalà mpiemby. Mandehana sady embeno soa manahaky ze vitanareo zay.” ⁶⁶ Le nandeha ndrozy sady niemby ty lolo, nanisy tampô ty vato sady nampipetssky ty mpiemby.