¹ Sady tamy ty haly ty Sabata, laha vo nanomboky harivariva ty andro velohany amy ty herin'andro, le lasa nandeha nanenty ty lolo Maria Magdalena noho azy Maria raiky hafa iny. ² Ingo, nisy horohoron-tany bey, fa ty anjely ty Tompo ro nijotso baka an-danitsy any, niavy sady nanodiky ty vato, ka le nipetsaky tanabo zay eo. ³ Ty endriky ro manahaky ty helatsy, sady ty salony le foty manahaky ty zavoky. ⁴ Natahotsy mpiemby rey ka le nanjary nanahaky ty lahilahy maty.

⁵ Niresaky tamy ampela rey anjely iny sady nivola tamin-drozy hozao: “Ka matahotsy, haiko fa mila an'i Jesosy nareo, azy nifantsihy tamy ty hazofijalea iny. ⁶ Tsy ato Ie, fa nitsanga, manahaky ty fa nivolaniny. Avia henteo ty toera ze niroro ty Tompo.

⁷ Mandehana malaky sady volano mpianatsiny rey hozao: ‘Nitsanga tamy maty Ie. Ingo, fa nandeha aloha nareo a-Galilia any Ie. Any ro hahitanareo Azy.’ Ingo, fa voavolako taminareo.”

⁸ Niala malaky ty lolo tamin-tahotsy noho tamy ty hafalea bevata ampela rey, sady nilay mba hivola mpianatsiny rey. ⁹ Ingo, nitojiky tamin-drozy Jesosy sady nivola hozao: “Arahaba!” Namonjy ampela rey, nitandraky ty tombony sady nanompo Azy. ¹⁰ Sady bakeo Jesosy nivola tamin-drozy hozao: “Ka matahotsy. Mandehana mivola amy rahalahiko rey mba hiala ka le hitandraky an'i Galilia. Any ro hahitan-drozy Ahy.”

¹¹ Sady lafa mbo nandeha iny ampela rey, ingo, ty ilany tamy mpiemby rey nana amy ty tanà-bevata any sady nivola tamy ty loha ty mpisoro ty raha iaby ze niboky. ¹² Lafa nitojiky tamy olo-bey ty mpisoro rey sady niresaky mikasiky ty raha nahazo androzy, le nanome jala bevata maramila rey ndrozy ¹³ sady nivola androzy hozao: “Ambarao amy ty hafa rey hozao: ‘Niavy tamy ty andro haly mpianatsy i Jesosy rey sady nangalatsy ty vatany laha mbo niroro zahay.’ ¹⁴ ha niavy amy governora any tatitsy zay, le handesy lahatsy azy tsika sady hangalaky ty ahiahy zminareo.” ¹⁵ Sady le nala ty maramila ty jala sady nanao manahaky ze fa nivolany azy rozy. Sady tatitsy zay ro niparitaky tamy Jiosy rey sady mitohy zisiky amy zao aza.

¹⁶ Fa nana Galilia any mpianatsy folo raiky amby rey, tamy ty vohitsy ze fa natoro i Jesosy androzy any. ¹⁷ Lafa nahita Azy ndrozy, le nanompo azy, fa ty ilany koa niahiahy. ¹⁸ Namonjy androzy Jesosy ka le niresaky tamin-drozy sady nivola hozao: “Fa namea Ahy ty fahefa iaby an-danitsy any noho an-tany etoy. ¹⁹ Ka mandehana sady anovo lasa mpianatsiko ty firenea-iaby. Anovo batisa rozy amy ty anara Njanahary, ty Anaky, sady ty Fanahy Masy. ²⁰ Ampianaro androzy hanenky ty raha iqby ze nibekoako anareo. Ingo, miaraky aminareo Zaho, eka fa ndra zisiky amy ty fohafara ty tany iaby toy aza.”