¹ Lafa vita i Jesosy safa iaby zay, le nivola tamy mpianatsiny rey Ie hozao: ² “Hainareo fa afaky ndroe androle ho avy ty Paska, sady hamea hahanto amy ty hazofijalea ty Anak'Olo.”

³ Bakeo ty bey ty mpisoro noho ty olo-bey niaraky-nivory tamy ty lapa ty mpisorobey, ze nikaiky hoe Kaiafa. ⁴ Niaraky-nanao tetiky ndrozy mba hanambora milamy an'i Jesosy sady hamono Azy. ⁵ Fa hoasan-drozy hozao: “Tsy amy ty fety, mba tsy hisia ty koronta amy ty olo eo.”

⁶ Sady Jesosy lafa ta Betania an-tsano i Simona boka ao, ⁷ laha nipetsaky nihina tamy ty latabatsy eo, le nisy ampela raiky nana tavoara alabastara atsiky menaky sarotsy vily namonjy Azy, le nandraraky zay tamy ty lohany. ⁸ Fa lafa hita mpianatsiny rey zay, le neloky ndrozy ka le nanao hozao: “Ino ro dika fandania zao. ⁹ Afaky navily sarotsy sady namea mijaly rey io.”

¹⁰ Fa Jesosy, nahay zay, nivola androzy hozao: “Nanino nareo ro manahiran-tsay ty ampela? Fa raha soa ro nanoviny tamiko. ¹¹ Aminareo eo zisiky farany ty mijaly, fa Zaho ro tsy ho aminareo eo zisiky farany. ¹² Fa lafa nandraraky menaky manitsy zay tamy ty vatako ie, le nanoviny ho ahy ty fandevena Ahy zay. ¹³ Volaniko aminareo marina, ndra aia ndra aia hanambara ty filazantsoa amy ty tani iaby toy eto, ze nanovy ampela toy ro ho volany avao koa ho fahatiarova azy.”

¹⁴ Bakeo raiky tamy ty folo roa ambyze nikaihe hoe Jodasy Iskariota, nana amy ty bey ty mpisoro any ¹⁵ sady nanao hozao: “Ameanareo hotsino zaho hanomezako Azy aminareo?” Nandanja volafoty maliniky telopolo ndrozy ho azy. ¹⁶ Tamy fotoa zay le nila fahafaha ie mba hanomeza Azy amin-drozy.

¹⁷ Tamy ty andro veloha ty mofo tsy misy lalivay le namonjy an'i Jesosy mpianatsy rey ka le nivola hozao: “Aia ro teanao hanomananay ho anao hihina ty hany ty paska?”

¹⁸ Namaly Ie hozao: “Milira an-tanà ao misy lahilahy raiky sady volano ie hozao: ‘Hoy ty Mpampianatsy hozao: “Fa mariny ty fotoako. An-tsanonao ato Zaho ro hanao ty paska miaraky amy mpianatsiko rey.”’” ¹⁹ Nanovy mpianatsy rey manahaky ze nibekoa i Jesosy zay, sady nanoma ty hany ty paska ndrozy.

²⁰ Lafa avy ty hariva, le nipetsaky nihina niaraky tamy ty mpianatsy folo roa amby Ie. ²¹ Lafa nihina ndrozy, le hoy Ie hozao: “Volaniko aminareo marina fa hisy raiky aminareo hamitaky Ahy.”

²² Nalahelo ndrozy sady nanomboky nanontany Azy ty kirai-draiky hozao: “Tsy ho zaho mihintsy, Tompo?”

²³ Namaly Ie hozao: “Ze niaraky-nampitsoboky ty tanany tamiko tanay lovia ao ro azy raiky hamitaky Ahy iny. ²⁴ Handeha ty Anak'Olo, manahaky ze fa voasoratsy mikasiky Azy. Nefa volany ty olo ze hamitaky ty Anak'Olo! Soa vatany ho ahy Olo zay ro tsy teraky akory.” ²⁵ Jodasy, ze hamitaky Azy nivola hozao: “Zaho va zay, Raby o?” Hoy Ie taminy hozao: “Voavolanao.”

²⁶ Laha mbo nihina ndrozy, le nangalaky mofo Jesosy, nisaotsy, sady nanapaky zay. Nameany mpianatsy rey zay sady nivola hozao: “Rambeso, hano. Toy ro vatako.” ²⁷ Nandramby ty kapoaky Ie sady nisaotsy, sady nanome zay androzy ka le nivola hozao: “Nareo iaby, inomy toy. ²⁸ Fa toy ty lio ty fanenkem-pilongoa arotsaky ho ahy ty lako ho famelan-keloky. ²⁹ Fa volaniko aminareo, fa tsy mba hino ty vokatsy ty voloboky sasy Zaho, zisiky-iavia ty finoma vaovao hiarahako aminareo amy ty fanjaka ty Babako any.”

³⁰ Lafa nihira hira fanompo ndrozy, le nandeha tamy ty vohitsy i Oliva any.

³¹ Bakeo hoy Jesosy tamin-drozy hozao: “Nareo iaby ro hiala Ahy noho ty amiko androany haly, fa voasoratsy hozao: ‘Hamango ty mpiemby aondry Zahi le hiparitaky ty aondry.’ ³² Fa afara ty fitsanganako amy maty, ro hitariky lala anareo a-Galilia any.”

³³ Fa Petera nanao taminy hozao: “Ndra le hiala noho ty aminao aza ty iaby, zaho tsy mba hiala mihintsy.”

³⁴ Hoy Jesosy taminy hozao: “Volaniko aminareo marina, fa androany haly laha mbo tsy maneno akoho, le handà Ahy intelo iha.”

³⁵ Petera nivola taminy hozao: “Ndra ro tsy maintsy ho maty miaraky aminao aza zaho, le tsy handà anao.” Manahaky zay avao ro nivolany mpianatsy hafa rey.

³⁶ Sady Jesosy nandeha niaraky tamin-drozy nana amy ty toera kaihy hoe Getsemane any sady nivola tamy ty mpianatsiny hozao: “Mipetsaha eto laha mbo handeha hivavaky eroy Zaho.” ³⁷ Nanday an'i Petera mbamy ty anaky i Zebedio roe lahy Ie sady nanomboky nalahelo noho mijaly. ³⁸ Bakeo hoy Ie tamin-drozy hozao: “Mijaly ty fanahiko, manahaky ty fa ho fety. Mipetsaha eto sady miembena miaraky amiko.” ³⁹ Nisitaky kelikely Ie, nandohaliky sady nivavaky. Hoy Ie hozao: “Babako e, laha azo anovy, le engao halà amiko kapoaky toy. Nefa, engao tsy manahaky ty sitsapoko, fa ty sitsaponao.” ⁴⁰ Namonjy mpianatsy rey Ie sady nahita androzy andesin-droro, ka le hoy Ie tamy i Petera hozao: “Ino, tsy mahavita miemby miaraky amiko ndra ro lera raiky aza nareo va? ⁴¹ Miembena sady mivavaha mba tsy ho azo ty fakam-panahy nareo. Mety avao ty fanahy, fa ty nofotsy ro malemy.”

⁴² Mbo nandeha fanindroeny Ie sady nivavaky. Hoy Ie hozao: “Babako, laha hohatsy ka tsy azo ala amiko raha tsy mino toy Zaho, le hanovy lahy ty sitsaponao.”

⁴³ Nimpoly ndraiky Ie sady mbo nahita androzy niroro, fa navesatsy ty mason-drozy. ⁴⁴ Ka le niala androzy ndraiky Ie, lasa sady nivavaky fanintelony, nivola safa rey avao. ⁴⁵ Bakeo Jesosy namonjy mpoanatsy rey ka le nanao tamin-drozy hozao: “Mbo miroro noho miala vozaky va nareo? Henteo, fa mariny ty lera, sady ty Anak'Olo ro hamea an-tana mpanota rey eo. ⁴⁶ Mitsangana, andao tsika. Henteo, fa mariny azy hamitaky Ahy iny.”

⁴⁷ Laha mbo nivola Ie, le avy Jodasy, raiky amy folo roa amby rey. Nisy olo lako mare niavy niaraky taminy baka amy ty bey ty mpisoro noho olo-bey. Niavy niaraky tamy ty meso-bey noho langilangy ndrozy. ⁴⁸ Sady nanome fahaiza androzy azy lahilahy hamotaky an'i Jesosy, manao hozao: “Ze horofako, ro Ie. Samboro Ie.” ⁴⁹ Teo noho eo avao namonjy an'i Jesosy ie sady nivola hozao: “Falifaly, Raby!” Sady nanoroky Azy ie.

⁵⁰ Hoy Jesosy taminy hozao: “Nama, anovo ze nandehananao Eto.” Bakeo avy ndrozy, nanampatsy tana tamy i Jesosy, sady nanambotsy Azy. ⁵¹ Ingo, raiky tamy rey niaraky tamy i Jesosy nanampatsy ty tanany, nampiala ty meso-beiny, nanapaky ty mpiasa ty mpisorobey, sady nahafaky ty sofiny. ⁵² Bakeo hoy Jesosy tamiby hozao: “Ampolio amy ty toerany ty meso-beinao, fa ze mandramby meso-bey rey ro ho vonoe amy ty meso-bey. ⁵³ Mieritseritsy va nareo fa tsy afaky mikaiky ty Babako Zaho, sady Ie ro afaky mandefa ho Ahy fatiky anjely mandilatsy noho ty folo roa amby? ⁵⁴ Fa anovy ino zay ro hahantanterahaky ty Soratsy Masy, ze mivola fa tsy maintsy hitsanga zay?”

⁵⁵ Tamy andro zay Jesosy nivola tamy ty olo lako hozao: “Niavy miaraky amy ty meso-bey noho langilangy hanambotsy Ahy manahaky ty malaso va nareo? Isan'andro le nipetsaky nampianatsy tamy ty egilizy eo Zaho, fa tsy nisamborinareo. ⁵⁶ Fa iaby zay le nitsanga mba hahantanteraky ze voasoratsy olo to-resaky rey.” Bakeo niala Azy mpianatsy iaby rey ka le nilay.

⁵⁷ Nandesy rey nanambotsy Azy tamy i Kaiafa any mpisorobey rey Jesosy, ze navory mpanora-dalà rey noho olo-bey. ⁵⁸ Fa Petera nanoriky Azy baka lavitsy eny nana amy ty kianja ty mpisorobey eny. Nilitsy tanainy ao ie sady nipetsaky niaraky tamy mpiemby raharaha rey mba hahita ze hiafarany.

⁵⁹ Sady ty bey ty mpisoro rey noho Synedriona iaby rey le nila fanasazia tsy marina manohitsy an'i Jesosy, mba mety ahafan-drozy mamono Azy. ⁶⁰ Tsy nahita ndra ino ndra ino ndrozy, ndra le nisy mpitsanga vavolombelo lako tsy marina avy aza teo. Sady kelikely bakeo le nisy lera avy namonjy teo ⁶¹ sady nivola hozao: “Lahilahy io ro nivola hozao: ‘Afaky mandrava ty Egilizy Njanahary Zaho sady mampitsanga zay ndraiky afaky telo andro.’”

⁶² Nitsanga azy mpisorobey iny ka le nanao taminy hozao: “Tsy manan-kavaly va Iha? Ino hahazoan-drozy Anao zay?” ⁶³ Fa tsy nivola Jesosy. Hoy ty mpisorobey taminy hozao: “Mibeko Anao amy tyalalan-Janahary velo zaho, volano aminay laha Iha ro Kristy, Anan-Janahary.”

⁶⁴ Jesosy namaly azy hozao: “Voavolanao. Fa volaniko aminareo, manomboky zao le ho hitanareo ty Anak'Olo hipetsaky an-tana ankavana ty Hery eo, sady ho avy amy ty raho ty lanitsy eo.”

⁶⁵ Bakeo ty mpisorobey nanataky ty salotsiny sady nivola hozao: “Nivola raty Ie! Nanino tsika ro mbo mila mpitsanga vavolombelo? Ingo, renareo ty fivolana-raty zao. ⁶⁶ Ino ro hevitsinareo?” Namaly ndrozy sady nanao hozao: “Maeva ty ho maty Ie.” ⁶⁷ Bakeo ndrozy nandora ty tarehiny noho namango Azy, sady namango tampify Azy, ⁶⁸ sady nanao hozao: “Mananova to-resaky aminay, Kristy. Ia ro namango Anao?”

⁶⁹ Sady Petera nipetsaky ambaliky kianja, sady nisy mpiasa ampela avy namonjy azy nivola hozao: “Iha avao koa ro niaraky tamy i Jesosy ty Galilia.”

⁷⁰ Fa nanda zay talohan-drozy eo ie, manao hozao: “Tsy haiko ze resahinareo.”

⁷¹ Lafa niboaky ty vavahady ie, le nisy mpiasa ampela hafa nahita azy sady nivola tamy zay rey teo hozao: “Lahilahy toy avao koa ro niaraky tamy i Jesosy baka Nazareta any.”

⁷² Mbo nandà ndraiky ie niaraky tamy ty fifanta hozao: “Tsy haiko lahilahy zay!”

⁷³ Lafa afaky kelikely le namonjy ze nitsanga teo rey sady nivola tamy i Petera hozao: “Iha avao koa ro tena raiky amy rozy reny, fa ty fomba firesakinao ro mahazo anao.”

⁷⁴ Bakeo ie nanomboky nanozo noho nifanta ka le nanao hozao: “Tsy haiko lahilahy zay.” Sady teo noho eo naneno ty akoho.

⁷⁵ Tiaro i Petera ty safa ambara i Jesosy hozao: “Mbo tsy maneno akoho le handà Ahy intelo iha.” Bakeo ie niboaky sady nitany mare.