¹ Ty fanjaka ty lanitsy ro hanahaky ty aja-mpela mbo tsy mahasaky lahy folo ze nangalaky ty jirony ka le nandeha nitojiky tamy ty mpampiakatsy. ² Adala ty limy tamin-drozy fa ty limy koa hendry. ³ Sady lafa nanday jirony rey aja-mpala mbo mahasaky lahy adala rey, le tsy nanday soliky niaraky taminy. ⁴ Fa aja-mpela mbo tsy mahasaky lahy rey hendry koa ro nanday fanajarian-tsoliky niaraky tamy ty jirony. ⁵ Sady laha tara mpampiakatsy, le fany rozy iaby ka le niroro.

⁶ Fa tamy ty sasak'aly ro nisy nikaiky mare hozao: “Ingo, ty mpampiakatsy! miboaha mba hotojiky aminy. ⁷ Bakeo niharé ty aja-mpela mbo tsy mahasaky lahy iaby ka le nikarakara ty jirony.

⁸ Hoy adala rey tamy hendry rey hozao: “Mba ameo antsasany amy ty solikinareo zahay fa ho maty ty jironay. ⁹ Fa namaly hendry rey ka le nivola hozao: “Tsy noho tsy ho ampy ho anay noho ho ahy nareo, fa mandeha koa amy mpamarotsy rey ka le mivilia ho ahy ty vatanareo. ¹⁰ Laha nandeha nivily androzy, le avy ty mpampiakatsy, sady ze fa vonona le niaraky-nandeha taminy ho amy ty fanambaram-panambalia, ka le nihily ty vavahady.

¹¹ Lafa ataky say ro niavy avao koa aja-ampela mbo tsy mahasaky lahy rey ka le nivola hozao: ‘Tompoko, Tompoko, mba vahao zahay.’ ¹² Fa namaly ie ka le nivola hozao: ‘Volaniko marina aminareo, tsy mahay anareo zaho.’

¹³ Ka noho zay miembena, fa tsy hainareo ty andro ndra ty lera.

¹⁴ Fa zay ro manahaky ty lahilahy raiky ze nandeha ho amy ty firenea-hafa any. Nikaiky ty mpiasany ie ka le nampitandraky androzy ty hananany. ¹⁵ Ty raiky tamin-drozy nameany talenta limy, ty raiky hafa nameany lera, sady ty raiky hafa koa nameany talenta raiky. Ty kirai-draiky ro samby nandramby talenta manahaky ze fahaizany iaby, sady nandeha tamy ty liany lahilahy zay. ¹⁶ Ty raiky ze naharamby talenta limy ro niala teo noho ka le nampiasa androzy sady nahazo talenta limy hafa. ¹⁷ Manahaky zay koa azy raiky ze naharamby talenta roe nahazo roe hafa iny. ¹⁸ Fa azy mpanompo raiky ze naharamby talenta raiky iny koa, nandeha ka le nihaly lavaky tamy ty tany, sady nandevy ty jala ty tompony.

¹⁹ Sady tafara ty fotoa ela ro nimpolia ty tompo mpiasa rey sady nandamy-raharaha tamindrozy. ²⁰ Nilitsy azy mpiasa ze naharamby talenta limy hafa. Hoy ie hozao: “Tompoko, nameanao talenta limy zaho. Ingo, nanatombo talenta limy hafa zaho.”

²¹ Hoy ty tompony taminy hozao: “Soa zay, mpiasa soa sady matoky! Natoky tamy ty raha tsy ampy iha. Zaho hampiantoky anao amy ty raha lako.

²² Azy mpiasa ze naharamby talenta roe iny ro namonjy noho nivola hozao: “Tompoko, nameanao talenta roe zaho, ingo, nanatombo talenta roe hafa zaho.”

²³ Nivola azy ty tompony hozao: ‘Soa zay, mpiasa soa sady mahatoky! Nahatoky tamy ty raha kelikely iha. Zaho hampiantoky anao amy ty raha lako. Milira amy ty fifalea ty tomponao.’

²⁴ Bakeo azy mpiasa ze naharamby talenta raiky namonjy ro sady nivola hozao iny: “Tompoko, haiko fa lahilahy masiaky iha. Mijinja amy ze tsy nandrarahanao eny iha, ro sady mamory-vokatsy amy ze tsy nambolenao eny. ²⁵ Natahotsy zaho, ka le nandeha sady namony ty talentanao tanay ty tany ao. Henteo, ingo ze ahy nao.”

²⁶ Sady namaly azy ty tompony ka le nanao taminy hozao: ‘Iha mpiasa raty sady tsy tea, hainao fa zaho ro mijinja amy ze tsy nandrarahako noho mamory-vokatsy eny amy ze tsy namboleko eny. ²⁷ Laha zay le tokony nameanao ty mampitombo-jala ty jalako, ka le lafa nimpoly zaho le nandramby ty ahy miaraky amy ty tombony. ²⁸ Laha zay alao aminy any ty talenta sady ameo ho an'i azy mpiasa ze mana talenta folo iny zay. ²⁹ Fa ze iaby mana ro hamea bevata vatany mandilatsy aza. Fa ho an'i ze tsy mana ndra ino ndra ino koa rey, ndra ze hananany aza le hala aminy. ³⁰ Ario amy ty maiky any ambaliky ty mpiasa tsy maeva any, any ro misy ty fitania noho ty fikotsoha-hý.’

³¹ Ka lafa avy amy ty voninahitsy ty Anak'Olo noho ty anjely iaby miaraky Aminy, le hipetsaky amy ty seza fipetraha ty voninahitsy eo Ie. ³² Sady ty firenena iaby ro havory anilany eo, sady hanavaky ty olo raiky amy raiky hafa Ie, manahaky ty mpiemby aondry manavaky ty aondry noho aosy. ³³ Hampipetsaky ty aondry ho ankavanany eo ie, fa ty aosy ankaviany eo.

³⁴ Sady ty mpanjaka hivola amy ze an-tana ankavanany rey eo hozao: ‘Avia, nareo ze nitahy ty Babako, mandovà ty fanjaka ze fa voahoma ho ahy nareo nanomboky tamy namboara an'i tany iaby toy. ³⁵ Fa mosary Zaho le nameanareo hany; te hinon-drano Zaho le nomeanareo hinomy; nivahiny Zaho le nampandrosonareo; ³⁶ nitanjaky Zaho le nampisalorinareo; narary Zaho nikarakaranareo; sady tan-gadra any Zaho le nana amiko any nareo.’

³⁷ Sady marina rey ro hamaly noho hivola hozao: ‘Tompo, ombia zahay ro nahita Anao mosary ka le namaha Anao? Ndra tahinon-drano ka le nampinominay? ³⁸ Ombia Iha ro hitanay nivahiny ka le nampandrosonay? Ndra nitanjaky ka le nampisalorinay? ³⁹ Ombia zahay ro nahita Anao narary ndra tan-gadra any ka le nana aminao any?

⁴⁰ Sady ty Mpanjaka namaly ka le nivola androzy hozao: ‘Volaniko aminareo marina, ze nanovinareo tamy rahalahiko kelikely bibike reny, le nanovinareo tamiko.’

⁴¹ Sady ie hivola amy ze ankaviany eo hozao: ‘Mialà amiko, Nareo ze voahozo, ho amy ty afo mirehitsy zisiky farany any ze fa voahoma ho ahy ty devoly noho anjeliny rey, ⁴² safe mosary Zaho, fa tsy nameanareo hany; te hino rano Zaho, fa tsy nameanareo hinomy; ⁴³ nivahiny Zaho, fa tsy nampandrosonareo; nitanjaky Zaho, nefa tsy nampisalorinareo; narary noho tan-gadra ao Zaho, fa tsy nikarakaranareo.’

⁴⁴ Sady le hamaly koa ndrozy ka le hivola hozao: ‘Tompo! Ombia zahay ro nahita Anao mosary, ndra te hino rano, ndra nivahiny, ndra natanjaky, ndra narary, ndra tan-hadra any, ka le tsy nanompo Anao?’

⁴⁵ Sady Ie namaly androzy ka le hivola hozao: ‘Volaniko aminareo marina, fa ze tsy nanovinareo tamy raiky tamy maliniky rey iny, ro tsy nanovinareo tamiko.’

⁴⁶ Rey ro halefa ho amy ty fanasazia zisiky farany ao fa marina koa rey amy ty fiaina zisiky farany.”