¹ Nivola tamy ty fanohara tamin-drozy ndraiky Jesosy, nanao hozao: ² “Ty fanjaka ty lanitsy ro mitovy amy ty mpanjaka ze nanoma fanasa amy ty fampiakaram-baly ho ahy ty anakilahiny. ³ Naniraky mpoasany rey hikaiky ze nahazo fanambara hanatsiky ty fetim-panam-balia rey ie, fa tsy nety ho avy ndrozy. ⁴ Nandefa mpoasany hafa rey ndraiky ty mpanjaka, manao hozao: ‘Anambara ze nambara rey hozao: “Henteo, fa nikarakarako ty haniko. Fa nivonoe ty aomby noho ty anak'aomby mifehiko, sady fa vonona ty raha-iaby. Miavia amy ty fetim-panam-balia ao.”’ ⁵ Fe tsy nidary ndrozy sady lasa nandeha, ty raiky namonjy ty toera-fihareany, ty hafa tamy ty raharaha-varotsiny. ⁶ Ilany nanambotsympiasa ty mpanjaka rey, nangala-baraka androzy, sady namono androzy. ⁷ Neloky ty mpanjaka ka le naniraky maramilany rey, sady namono mpamono olo rey ndrozy, sady nandoro ty tanany. ⁸ Bakeo nivola tamy mpiasany rey ie hozao: ‘Fa vonona ty fangalam-baly, fa ze nanambara rey ro tsy maeva. ⁹ Laha zay mandehana amy ty sampanan-dalabey eny sady manambarà olo lako ze hitanareo ho amy ty fetim-pangalam-baly ao.’ ¹⁰ Nandeha niboaky tamy ty alalam-bey any mpiasa rey sady nanambotsy ty olo iaby ze hitan-drozy, ndra ty soa ndra ty raty. Laha zay le atsiky vahiny azy efi-tsano bevata nisy ty fangalam-baly iny. ¹¹ Fa lafa nilitsy ty mpnjaka mba hanenty vahiny rey, le nahita lahilahy tsy nisiky salotsy fandesy amy ty fangalam-baly ie. ¹² Nivola taminy ty mpanjaka hozao: ‘Nama a, ino ro iliranao ato tsy miaraky amy ty fisikina fandesy amy ty fangalam-baly?’ Fa tsy nahavola lahilahy iny. ¹³ Bakeo nivola tamy mpiasany rey ty mpanjaka hozao: ‘Fehezo ty tana noho ty tomboky lahilahy toy, sady atoraho amy ty maiky ambaliky any ie, any ro misy fitania noho fikotsoha-hý.’ ¹⁴ Fa olo lako nikaihe, nefa tsy ampy ro ho voatingy.

¹⁵ Bakeo nandeha Fariseo rey sady nanoma ty fomba mety hamandriha an'i Jesosy amy ze nivolaniny. ¹⁶ Bakeo nirahin-drozy nana Aminy any mpianatsin-drozy rey, niaraky tamy Herodiana rey. Nivola tamy i Jesosy ndrozy hozao: “Mpampianatsy e, hainay fa marina Iha, sady mpampianatsy ty lalan-Janahary amy ty marina. Tsy midary ty hevitsy ty hafa Iha, sady tsy manenty mitongila. ¹⁷ Laha zay volano aminay, ino ty hevitsinao? Ara-dalà vaty fandoava haba amy i Kaisara any sa aha?”

¹⁸ Nefa azo i Jesosy ty faharatia rey ka le nivola hozao: “Nanino ro mitsapa Ahy nareo, mpihatsaravelatsihy? ¹⁹ Atoro Ahy ty farantsa amy ty haba.” Bakeo nanday denaria taminy eo ndrozy. ²⁰ Hoy Jesosy tamin-drozy hozao: “An'ia sary toy noho anara toy?”

²¹ Nivola taminy ndrozy hozao: “An'i Kaisara.” Bakeo Jesosy nivola androzy hozao: “Ameo an'i Kaisara ze an'i Kaisara rey, sady ahin-Janahary ze ahin-Janahary rey.” ²² Lafa nahare zay ndrozy, le tseriky. Sady niala Taminy eo ndrozy ka le nandeha.

²³ Tamu andro zay avao ty Sadoseo ilany, ze nivola fa tsy misy fitsangana amy maty, namonjy Azy. Nanontany Azy ndrozy, ²⁴ nanao hozao: “Mpampianatsy e, Mosesy nivola hozao: ‘Laha maty ty olo, tsy manan'anaky, le tokony hanambaly ty valy ty rahalahiny sady hanan'anaky ho ahy ty rahaahiny.’ ²⁵ Nisy mpirahalahy fito. Nanambalg ty velohany sady maty bakeo. Lasa tsy nanenga anaky, nengany ho ahy ty rahalahiny ty valiny. ²⁶ Bakeo nanao raha mitivy amy zay ty faharoe, bakeo ty faha telo, manahaky zay avao zisiky any amy rahalahy faha fito i y. ²⁷ Tafara rozy iby, le maty ampela iny. ²⁸ Sady amy ty fitsangana ty maty, ho valinia amy mpirahalahy fito rey ie. Fa nanambaly azy rozy iaby.”

²⁹ Fa namaly Jesosy sady nivola androzy hozao: “Diso nareo, safe tsy mahay ty Soratsy Masy ndra ty herin-Janahary. ³⁰ Fa amy ty fitsangana ty maty ro sady tsy hanambaly androzy ro tsy ameao ampanambalý. Fa koa, mitovy amy anjely rey an-danitsy any. ³¹ Fa mikasiky ty fitsangana ty maty mbo tsy nivakinareo va ze nivolan-Janahary taminareo, manao hozao: ³² ‘Zaho ro Njanahary i Abrahama, Njanahary Isaka, sady Njanahary i Jakoba’? Njanahary ro twy Njanahary ty maty, fa ahy ty velo.”

³³ Lafa nahare zay olo lako rey, le jilo tamy ty fampianarany.

³⁴ Fa lafa re i Fariseo rey ty tsy nampivolana i Jesosy ty Sadoseo rey, le niara-nikombo ndrozy. ³⁵ Ty raiky tamin-drozy, mpahay lalà, nametsaky-fanontanea taminy, nangalaky fanahy Azy hozao: ³⁶ “Mpampianatsy, ia ro bey bibike amy ty lily amy ty lalà ao.”

³⁷ Nivola taminy Jewosy hozao: “‘Tiavo amy ty fonareo iaby, amy ty fanahinareo iaby, sady amy ty sainareo iaby ty Tompo Njanaharinareo.’ ³⁸ Zay ro lily bevata noho velohany. ³⁹ Sady ty lily faharoe ro manahaky zay avao: ‘Tiavo ty mpiara-belo aminareo manahaky ty vatanareo.’ ⁴⁰ Amy lily roe rey ro iankina ty lalà iaby noho ty olo to-resaky rey.”

⁴¹ Sady laha mbo niara-nikombo Fariseo rey, le nametsaky-fanontanea androzy Jesosy. ⁴² Hoy Ie hozao: “Ino ro eritseritsinareo miksiky i Kristy? Anakilahin'ia Ie?” Nivola taminy rey hozao: “anaky i Davida.”

⁴³ Hoy Jesosy tamin-drozy hozao: “Nanino moa Davida mipetsaky amy ty Fanahy ao ro mikaiky Azy hoe Tompo, manao hozao: ⁴⁴ ‘Ty Tompo nivola tamy ty Tompoko hozao: “Mipetsaha amy ty tanan-kavanako eo, zisiky-ananovako ty fahavalonao ho fipetsaha-tombokinao?’ ⁴⁵ Laha Davida aza mikaiky an'i Kristy hozao: ‘Tompo,’ le ino ro maha-ana i Davida Azy?” ⁴⁶ Tsy nisy nahavaly Azy tamy ty safa, sady tsy nisy olo nahasaky nametsaky-fanontanea hafa sasy nanomboky tamy andro zay.