¹ Laha namonjy an'i Jerosalema Jesosy noho ty mpianatsiny ka le nana Betifaga ao, am-bohitsy i Oliva any, le nandefa mpianatsy roe Jesosy, ² nivola tamin-drozy hozao: “Mandehana amy ze vohitsy manaraky ao, fa eo noho eo nareo le hahita boriky mifehy sady ana-boriky raiky miaraky aminy. Vahao ndrozy sady handeso amiko atoy. ³ Laha misy mivola anareo mikasiky zay, le volano hozao: ‘Misy ila ty Tompo androzy,’ sady eo noho eo olo zay ro handefa androzy miaraky aminareo.”

⁴ Sady nitsangavzay mba hahatanteraky ze nambara tamy ty alala ty mpianatsiny. Hoy Ie hozao: ⁵ “Anambarao ty anak'ampela i Ziona hozao: ‘Ingo, ty Mpanjakanao mamonjy anao, Mandefitsy sady miondra boriky- ana-boriky lahy.’”

⁶ Bakeo le nandeha mpianatsy rey sady nanao manahaky ze nibekoa i Jesosy androzy. ⁷ Nandesin-drozy azy ampondra noho azy ana-boriky iny sady nampipetsaky ty sikin-drozy taminy eo rey, ka le nipetsaky tamy azy siky Jesosy iny eo. ⁸ Ty halakoa ty olo lako ro namelatsy ty sikiny tamy ty tny, sady hafa rey nanapaky sampan-kazo sady nampiparitaky zay tamy ty lala. ⁹ Bakeo olo lako rey nitariky an'i Jesosy noho ze nanoriky azy nikorakoraky rey hozao: “Hosana ho ahy ty anaky i Davida! Isaora azy niavy baka amy ty anara ty Tompo iny! Hosana amy ty abo bibike any!”

¹⁰ Lafa nilitsy ta Jerosalema any Jesosy, le nikoraky ty tanà raiky ka le nanao hozao: “Ia moa io?”

¹¹ Namaly ty olo lako hozao: “Ie ro Jesosy azy to-resaky baka Nazareta a-Galilia any iny.”

¹² Bakeo nilitsy tan-degilizy ao Jesosy. Niroahiny iaby mpivily noho mpamarotsy tan-degilizy ao rey, sady navalikiny ty latabatsy mpanakalo jala rey noho ty fipetsaha mpamarotsy pizon rey. ¹³ Hoy Ie tqmin-drozy hozao: “Fa voasoratsy hozao: ‘Ty tsanoko ro ho kaihy hoe tsano fivavaha,’ nefa anovinareo zohy fiereny ty Jiolahy.”

¹⁴ Lafa bakeo le nisy jiky noho mandrava namonjy Azy eo tan-degilizy ao, ka nafahany rozy.

¹⁵ Fa lafa nahita ty raha-mahatseriky nanovy ty bey ty mpisoro noho ty mpanora-dala, sady lafa ren-drozy ty aja maliniky nikorakoraky tan-degilizy ao hozao: “Hosana ho ahy ty ana i Davida,” le meloky mare ndrozy.

¹⁶ Hoasan-drozy taminy hozao: “Renareo va volany olo rey zay.” Namaly androzy Jesosy hozao: “Eka! Fa tsy mbo nivakinareo mihintsy va ty hozao: ‘Baka amy ty vava ty aja maliniky noho ty aja minono ro naha mety ty fanompoa nareo’?”

¹⁷ Bakeo niala androzy Jesosy ka le nandeha tamy ty tana i Betania any sady nipetsaky tao lafa haly.

¹⁸ Sady lafa maray lafa nimpoly tan-tana any ie, le mosary. ¹⁹ Nahita hazon'aviavy tan-tsisin-dala dn6, le namonjy teny Ie sady tsy nahita ndra ino ndra ino teo hafa-tsy ty raviny. Hoy Ie taminy hozao: “Engao tsy hisy voa sasy baka aminao zisiky farany,” sady niaraky tamy zay ro maiky aviavy any.

²⁰ Lafa nahita zay mpianatsy rey, le tseriky ndrozy sady nivola hozao: “Ino nahamaiky direkita aviavy toy?”

²¹ Namaly Jesosy sady nivola androzy hozao: “Volaniko aminareo marina, laha manam-pinoa noho tsy misy fisalasala nareo, le tsy ze nanovyo avao ro hanovinreo, fa ndra le hivola amy vohitsy toy aza hozao: ‘miombotsy sady milavo an-driaky any,’ le hanovy zay. ²² Ndra ino ndra ino angafahanareo am-bavaky, am-pinoa, le ho azonareo.”

²³ Lafa nilitsy tan-degilizy ao Jesosy, le namonjy Azy ty bey ty mpisoro noho ty olo-bey lafa nampianstsy Ie sady nivola hozao: “Fahefa baka aia moa ro ananovanao raha reny, sady ia ro nanome anao fahefa zay?”

²⁴ Namaly Jesosy sady nivola tamin-drozy hozao: “Hametsahako fanontanea raiky avao koa nareo. Laha volaninareo aminpko, leho volaniko aminareo ty fahefa anoviko raha reny. ²⁵ Ty batisa i Jaona - baka aia ro niaviany? Baka an-danitsy any sa baka amy ty olombelo any?” Nialy hevitsy ndrozy, nanao hozao: “Laha mivola tsika hoe, ‘Baka an-danitsy any,’ Ie hivola amintsika hozao: ‘Fa nanino zany nareo ro tsy nino azy?’ ²⁶ Fa laha mivola tsika hozao: ‘Baka amy ty olombelo,’ matahotsy ty olo lako tsika, safe ie iaby ro mihevitsy an'i Jaona manahaky ty olo to-resaky.” Ka le namaly an'i Jesosy ndrozy ka le nivola hozao: “Tsy hainay.” ²⁷ Sady hoy avao koa Ie tamin-drozy hozao: “Zaho avao koa ro tsy hivola aminare hoe baka aia ty fahefa anoviko raha reny.

²⁸ Fa ino ty hevitsinareo? Nisy lahilahy raiky nana anakilahy roe. Nandeha nana amy azy velohany iny any ie sady nanao hozao: ‘Anaky, mandehana miass amy ty tanim-boloboky any androany.’

²⁹ Azy anakilahiny iny namaly azy hozao: “Tsy ho any zaho,” fa lafa bakeo niova hevitsy ie ke nandeha.

³⁰ Bakeo le nana amy azy faharie iny any ie sady nivola manahaky zay avao koa. Namaly ie ka le nivola hozao: ‘Ho any zaho, topoko,’ nefa tsy nana any ie. ³¹ Ia tamy anany roe rey ro nanao ty sitsapo ty babany.” Sady hoasan-drozy hozao: “Azy velohany iny.” Jesosy nivola androzy hozao: “Volaniko aminareo marina, mpamory haba rey noho mpivaro-bata rey ro hilitsy ty Fanjaka Njanahary alohanareo. ³² Fa Jaona namonjy anareo tamy tyfahamarina, fa tsy nino azy nareo. Fa mpamory haba noho mpamaro-bata rey nino azy. Fa nareo, ndra le nahita zay aza, le tsy nibebaky noho tsy nino azy.

³³ Janjino fanohara raiky hafa toy. Nisy lahilahy raiky, tompon-tany. Nanao tanim-boloboky ie, nivalanany zay, nandavahany famiaza tanainy ao, nampitsanga tilikambo, sady nampanofany tamy mpamboly rey voloboky. Bakeo le nana amy ty tanà hafa any ie. ³⁴ Lafa nanariny ty taom-pamokara, le naniraky ty ilany tamy mpiasa rey ie ho amy mpamboly voloboky rey any hangalaky ty vokatsiny. ³⁵ Fa nisambory mpamboly voloboky rey mpiasany rey, nivangoany ty raiky, nivonony ty hafa, le mbo nitoraha vato ty hafa. ³⁶ Sady mbo, nandefa mpiasany hafa ndraiky azy tompon-tany iny, lako noho ty tamy ty velohany, fa nanovin-drozy manahaky zay avao koa. ³⁷ Tafara zay le naniraky ty anakilahiny raiky avao iny tamy ty tompon-tany tey any, nivola hozao: ‘Hanaja ty anakilahiko ndrozy.’

³⁸ Fa lafa nahita azy anakilahy mpamboly voloboky iny, le nifampiresaky ndrozy hozao: ‘Toy ro mpandova. Andao, ho vononteika ie sady le halanteika ty lova.’ ³⁹ Laha zay le nisamborin-drozy ie, natoraky tanay ty tanim-boloboky ao sady nivonony. ⁴⁰ Sady lafa avy ty tompo ty tanim-boloboky, ino ro hanoviny amy mpamboly voloboky rey?”

⁴¹ Hoasan-drozy taminy hozao: “Ho ravany amy ze fomba mahery biby olon-doz rey, sady bakeo hampanofany amy mpamboly voloboky hafa rey ty tanim-boloboky, olo hanome azy ty anjara voliny amy ty fotoam-pamokara.”

⁴² Jesosy nivola tamin-drozy hozao: “Tsy mbo namaky ty Soratsy Masy mihintsy va nareo hozao: ‘Ty vato tsy nenke ty mpamboatsy tsano ro nanovy vato fehizoro. Baka amy ty Tompo zay, sady mahajilo amasontsika eo’?

⁴³ Laha zay volaniko aminareo, hala aminareo ty fanjakan-Janahary sady hanome ty firenea ze mamokatsy voany rey. ⁴⁴ Ndra ia ndra ia ho lavo vato io le ho torotoro. Fa ze hilavoany koa ro ho torotoro.”

⁴⁵ Lafa nahare fanoharany rey ty bey ty mpisoro noho Fariseo rey, le azon-drozy fa mikasiky androzy ro nisarahany. ⁴⁶ Naniry ty hanambotsy Azy, fe natahotsy ty olo lako ndrozy, safe nanovy ty olo ho to-resaky Ie.