¹ Sady lafa nahavita safa rey Jesosy, niala ta Galilia any Ie, sady nana amy ty faritsy i Jodia ze tamy sisy ty renirano ty Jordana any. ² Olo lako maré ro nanoriky Azy, ka le nanafaky androzy tany Ie.

³ Namonjy Azy fariseo rey, nitsapa Azy, nivola taminy hozao: “Ara-dalà ho ahy ty lahilahy va ty misaraky amy ty valiny noho ze mety ho antony iaby?”

⁴ Jesosy namaly sady nivola hozao: “Tsy nivakinareo va fa Ie ze nanao androzy tamy ty velohany ro nanao androzy ho lahilahy noho ampela? ⁵ Ie Ze nanao androzy le nivola avao koa hozao: ‘Fa laha dikany zay le hiala ty babany noho reniny ty lahilahu ka le hiharo amy ty valiny, sady hanjary nofotsy raiky ndrozy roe?’ ⁶ Ka le tsy ho roe sasy ndrozy, fa ho nofotsy raiky. Ka le ze naharon-Janahary, engao tsy hisy hampisaraky.”

⁷ Hoasandrozy taminy hozao: “Nanino zay Mosesy ro mibeko anay hanome taratasy fanamariham-pisaraha sady bakeo hampoly azy?”

⁸ Hoy Ie tamy rey hozao: “Fa ty hampaherim-ponareo ro nanenga i Mosesy anareo hisaraky amy ty valinareo, fa tamy ty velohany ro tsy zay ro fomba. ⁹ Volaniko anareo, ndra ia ndra misaraky amy ty valiny, hafa-tsy noho ty heriloha, ka le manambaly hafa, le manitsakitsa-baly; sady ty lahilahy manambaly ampela ze fa nisara-baly le maheriloha.”

¹⁰ Mpianatsy rey nivola tamy i Jesosy hozao: “Laha zay ro toetsy ty lahilahy amy ty ampela, le tsy soa ty manambaly.”

¹¹ Fa Jesosy nivola tamy rey hozao: “Tsy ty aolo iaby ro afaky manenky fampianara zay, fa ze nanenga hanenky rey zay avao. ¹² Fa misy ionoka ze fa manahaky zay rey zisiky an-tsarotson-drenin-drozy, sady misy ionoka ze nanovin'olombelo rey, sady misy ionoka ze manao tg vatan-drozy rey ho ionoka noho ty fanjaka ty lanitsy. Ie ze afaky mandramby fampianara zay, engao ie handramby zay.”

¹³ Bakeo nisy aja maliniky ilany nandesiny faminy eo mba hametsahany tana amin-drozy ka le hivavaky, fa nivola mare androzy mpianatsy rey. ¹⁴ Fa hoy Jesosy hozao: “Engao ty aja maliniky, sady ka rarà ndrozy hampnjy Ahy, safe ty fanjaka ty lanitsy le ahy ty manahaky androzy.” ¹⁵ Napetsakiny tamy ty aja rey eoty tanany, sady bakeo niala teo Ie.

¹⁶ Ingo, nisy lahilahy namonjy an'i Jesosy sady nivola hozao: “Mzmpianatsy, Ino ro raha soa tsy maintsy anoviko mba hahazoako ty fiaina zisiky farany?”

¹⁷ Jesosy nivola taminy hozao: “Nanino iha ro manontaany mikasiky ze soa amiko atoy? Raiky avao ro soa, fa laha ta-hilitsy amy fy fiaina any iha, le embeno lily rey.”

¹⁸ Hoy azy lahilahy iny taminy hozao: “Lily ino?” Le hoy Jesosy hozao: “Ka mamono olo, ka maheriloha, ka mangalatsy, ka mety vavolombelo diso, ¹⁹ hajao ty babanao noho ty reninao, sady tiavo ty mpiara-belo aminao manahaky ty vatanao.”

²⁰ Azy tovolahy iny nivola taminy hozao: “Fa nenkeny iaby iaby zay. Ino ro mbo ilako?”

²¹ Jesosy nivola taminy hozao: “Laha mitiry ty hanenky iha, le mandeha, avilio ze anananao, sady ameo ty mijaly, ka le hana hanana an-danitsy any iha; sady avia, manoriha Ahy.” ²² Fa lafa naharé ze nivolany i Jesosy azy zatovo iny, le niala tamy alahelo ie, safe nana fznana lako.

²³ Hoy Jesosy tamy mpianatsy rey hozao: “Volaniko marina aminareo, sarotsy ho ahy ty mpanan-kanana ty hilitsy ty fanjaka ty lanitsy. ²⁴ Sady mbo volaniko aminareo ndraiky, mora vatany ho ahy ty rameva ty militsy amy ty fara ty fitsebiky noho ty ilira ty mpanankanana amy ty fanjakan-Janahary ao.”

²⁵ Laha nahare zay mpianatsy rey, le tena jilo vatany ka le nivola hozao: “Ia sady zay ro afaky ho vonje?”

²⁶ Nanenty androzy Jesosy sady nivola hozao: “Amy ty olo le tsy hay anovy zay, fa amin-Janahary ty raha-iaby le azo anovy.”

²⁷ Bakeo Petera namaly sady nivola hozao: “Ingo, nenganay ty raha-iaby sady nanoriky Anao zahay. Ino moa ro ho azonay?”

²⁸ Jesosy nivola androzy hozao: “Ambarako aminareo marina, amy ty vanim-potoa vaovao lafa mipetsaky amy ty seza fipetsaha ty voninahitsy ty Anak'Olo eo, le hipetsaky amy ty seza fipetsaha folo roa amby eo avao koa nareo ze nanoriky Ahy, hitsara foko folo roa amby ty Israely rey. ²⁹ Ty olo iaby ze niala tsano, rahalahy, anabavy, baba, reny, anaky, ndra tany noho ty anarako, le handramby hitombo zato sady handova fiaina zisiky farany rey.

³⁰ Fa lako ze velohany hanjary farany rey, sady ty farany ho velohany.