¹ Tamy fotoa zay avao ro niavy tamy i Jesosy eo mpianatsiny rey sady nivola hozao: “Ia ro bevata bibiky amy ty fanjaka ty lanitsy any?”

² Jesosy nikaiky aja kelikely ho aminy eo, nampipetsaky azy tamin-drozy eo, ³ sady nivola hozao: “ambarako aminareo marina, fa laha tsy miova manahaky ty aja kelikely nareo, le tsy hisy hevitsy ty hiliranareo amy ty fanjaka ty lanitsy any. ⁴ Laha zay, ndra ia ndra ia manetsy tena manahaky aja kelikely toy ro bevata bibiky ie amy ty fanjaka ty lanitsy any. ⁵ Ndra ia ndra ia mandramby ty aja kelikely manahaky zao amy ty anarako le mandramby Ahy.

⁶ Fa ndra ia ndra ia mahavy ty raiky amy aja kelikely reto ze mino Ahy hanota, le ho soa vatany ho azy ty hiantona ty fikosoham-bary bevata amy ty vozony eo, ka le halentiky amy ty riaky laliky any ie. ⁷ Loza ho ahy ty tany iaby toy noho ty fotoa ty fanafitoha! Fa ilany ty ahavia fotoa zay, nefa loza ho ahy ty olo ze niavia fotoa zay! ⁸ Laha mitetiky fanafitohina ho anao ty tananao ndra ty tombonao, le tapaho zay safy esory aminao eo. Soa vatany ho anao ty militsy kolatsiky ndra mandrava amy ty fiaina zisiky farany any nono ty ho tsobo amy ty afo tsy mety maty any amy ty fanana tana roe ndra tomboky roe. ⁹ Laha miteraky fanafintohina ho anao ty masonao raiky, homhota zay sady alao aminao eo. Soa vatany ho ahy nao ty militsy amy ty fiaina zisiky farany any miaraky amy ty maso ila nohl ty hoe tsobo amy ty afo tsy mety maty any miaraky amy ty maso roe.

¹⁰ Embeno tsy hanao tsinotsino aja maliniky rey nareo. Fa mivola aminareo Zaho fa an-danitsy any anjeliny rey ro manenty avao ty endriky ty Babako ze an-danitsy any. ^{11 12} Ino ro eritserinareo? Laha misy mana aondry zato, ka le mana amy ty lalan-diso any ty raiky amin-drozy, le tsy hiala ty sivampolo sivy amby amy ty avoana eo va ie sady handeha hikaroky azy raiky ze nana amy ty lala-diso any? ¹³ Laha hitany zay, le volaniko aminareo marina, fa mifaly amy zay mandilatsy noho sivampolo sivy amby ze tsy nana amy ty lala-diso any ie. ¹⁴ Manahaky zay avao koa, tsy enke ty Babanareo an-danitsy any ty haha tsobo ty raiky amy maliniky rey.

¹⁵ Laha manota aminao ty rahalahinao, mandeha sady ambarao azy ty hadisoany, aminao noho ie raiky avao. Laha mijanjy anao ie, le hifankahazo amy ty rahalahinao ndraiky iha. ¹⁶ Nefa laha tsy mijanjy anao ie, le mangalà raiky ndra roe hafa miaraky aminao, amy zay mba amy ty vava vavolombelo roe ndra telo rey ro hafaha manamary ty safa iaby. ¹⁷ Sady laha mandà ty hijanjy androzy ie, le volano amy ty egilizy ty raha-mitsanga. Laha tsy manenky hijanjy ty egilizy avao koa ie, le engao ie ho manahaky ty Jentilisa noho ty mpamory haba. ¹⁸ Ambarako aminareo marina, ndra ino ndra ino fehezinareo an-tany eto le ho fehezy an-danitsy any; sady ndra ino ndra ino enganareo an-tany eto le ho voa enga an-danitsy any. ¹⁹ Le mbo volaniko aminareo ndraiky hozao: “Laha misy roe aminareo manenky an-tany etoy ty amy ze iaby angatahan-drozy, le hanovy ho androzy zay amy ty alala ty Babako ze an-danitsy any. ²⁰ Fa ndra aia misy roe ndra telo miara-mivory amy ty Anarako, le anivon-drozy eo Zaho.”

²¹ Bakeo namonjy Petera sady nivola tamy i Jesosy hozao: “Tompo, impiry hanota amiko ty rahalahiko ka le hanenga azy zaho? Zisiky amy ty im-pito va?”

²² Jesosy nivola azy hozao: “Tsy mivola aminao Zaho hozao im-pito, fa zisiky amy ty fitopolo im-pito. ²³ Laha zay ty fanjaka ty lanitsy ro mitovy amy ty mpanjaka raiky ze ta hifandamy ara-jala miaraky amy ty mpiasany. ²⁴ Laha vo nanomboky ty fandamina ie, le nisy mpiasa raiky nandesy taminy eo ze nananany talenta ray aly. ²⁵ Fe satsia tsy nana fomba handoava zay ie, le nibeko ty hamarota azy ty tompony, miaraky amy ty valiny noho anany rey sady ze nanany iaby, ka le ho vita ty fandoavan-tsosa. ²⁶ ha zay le niondriky azy mpiasa iny, sady niondriky talohany eo, sady nivola hizao: ‘Tompo, mana fahareta amiko, le haloako aminao ty raha iaby.’ ²⁷ Laha zay ty tompo mpiasa zay, le onena, ka le nanafaky azy safy nanenga ty tsosa taminy. ²⁸ Fa niboaky mpiasa io ka le nahita ty raiky tamy mpiara-manompo aminy rey, ze nananany denaria zato. Nisamboriny ie, nirambesiny tamy ty vozony, sady nivola hozao: ‘Aloavo amiko ze nitsosanao.’

²⁹ Nefa niondriky mpiara-manompo aminy io sady nangataky taminy, nanao hozao: ‘Manana fahareta amiko, le haloako aminao ndraiky.’ ³⁰ Nefa nandà mpiasa velohany iny. Mifanohitsy amy zay, nandeha ie sady nanoviny tam-pigadra any azy mpiara-manompo aminy iny zisiky-pandoavany aminy ze nitsosany. ³¹ Lafa nahita ze niboaky mpiara manompo aminy rey, le nalahelo vatany ndrozy. Nandeha sady nivola tamy ty tompony ze iaby niboaky ndrozy.

³² Bakeo nikaiky azy ty tompo mpiasa io, sady nivola azy hozao: ‘Iha mpiasa raty fanahy e, nanenga ty tsosa iaby taminao zaho safe iha nangataky tamiko. ³³ Tsy tokony hana famalozam-po amy ty mpiara-manompo aminao va iha, manahaky ty nananako famalozam-po taminao?’ ³⁴ Neloky ty tompo sady nanday azy tamy mpampijaly rey any zisiky mahaloany ze iaby nitsosany. ³⁵ Manahaky zay avao koa ro hanovy ty Babako an-danitsy any aminareo, laha tsy manenga ty rahalahiny amy ty fony ty kirai-draiky iaby aminareo.”