¹ Enin'andro tafara tato Jesosy le nangalaky an'i Petera, Jakoba, noho Jaona rahalahiny niaraky taminy, sady nanday androzy niakatsy ty vohitsy abo tamy ty vatan-drozy. ² Niova endriky talohan-drozy eo Ie. Nipitiaky manahaky ty masoandro ty vatany, sady fisikinany rey nanjary nipiriaky manahaky ty hazava. ³ Ingo, niboaky tamin-drozy Mosesy noho Elia niresaky taminy. ⁴ Namaly Petera sady nanao tamy i Jesosy hozao: “Tompo, soa amintsika ty eto. Laha enkenao, le hanao fialona telo ho antsika eto zaho - raiky ho ahy nao, raiky ho an'i Mosesy, sady raiky ho an'i Elia.”

⁵ Laha mbo nivola Ie, ingo, nisy raho mazava nampisaro androzy, sady ingo, nisy feo niboaky baka amy ty raho ao, nanao hozao: “Toy ty Anako teako, ze enkeko vatany. Janjino Ie.” ⁶ Lafa re mpianatsy rey zay, le lavo ndrozy sady natahotsy mare.

⁷ Bakeo tamy Jesosy sady nikasiky androzy ka le nivola hozao: “Mitsangana sady ka matahotsy.” ⁸ Bakeo le nanenty ambony ndrozy fa tsy nahita ndra ia ndra ia hafa-tsy Jesosy raiky avao.

⁹ Laha nijotso ty vohitsy ndrozy, le nibeko androzy Jesosy, nanao hozao: “Ka manesy fahita zay ndra amin'ia ndra amin'ia zisiky-hitsangana ty Anak'Olo amy ty maty.”

¹⁰ Nanontany Androzy mpianatsiny, nanao hozao: “Nanino sady mpanora-dalà rey ro mivola fa Elia ro tsy maintsy ho avy aloha any?”

¹¹ sosy namaly sady nivola hozao: “Elia ro ho avy vatany sady hamary amy velohany ty raha iaby. ¹² Nefa ambarako aminareo, fa niavy Elia, fa ndrozy tsy nahay azy. Mifanohitsy amy zay, nanao ty raha iaby ze teany nanovy taminy ndrozy. Sady manahaky zay avao koa, ty Anak'Olo avao koa ro hijaly an-tanan-drozy eo. ¹³ Bakeo le azo mpianatsy rey fa nivola tamin-drozy ty mikasiky an'i Jaona mpanao Batisa Ie.

¹⁴ Lafa niavy tamy ty olo lako eo ndrozy, le nisy lahilahy raiky namonjy Azy, nandohaliky talohany eo, sady nivola hoe, ¹⁵ “Tompo, manà famalozam-po amy ty anakilahiko, fa voa ty androbe ie sady mijaly mare. Fa lavo san'andro anay afo ndra rano any ie. ¹⁶ Nanday azy tamy mpianatsinao rey eo zaho, fa tsy afaky nanafaky azy ndrozy.”

¹⁷ Namaly Jesosy sady nivola hozao “Tariha tsy mpino noho simba toetsy rey, zisiky-ombia ro tokony hipetsahako miaraky aminareo? zisiky-ombia ro tsy maintsy izakako miaraky aminareo? Andeso amiko eto ie.” ¹⁸ Nivola mare ty demonia Jesosy, ka le niboaky taminy zay sady le afaky tamy lera zay aja lahilahy iny.

¹⁹ namonjy an'i Jesosy milamy mpianatsy rey sady nanao hozao: “Manino ro tsy nahavita nampiboaky an'iny zahay?”

²⁰ Jesosy nivola androzy hozao: “Laha ty finoa kelikelinareo. Fa volaniko aminareo marina, laha mana finoa ndra le kelikely manahaky ty voatsinapy aza nareo, le afaky mivola amy vohitsy toy nareo hozao: ‘Mifaloza baka eto ho eroy,’ le hifalo zay sady tsy hisy ndra ino ndra ino tsy ho hainareo ovy. ²¹

²² Laha nipetsaky ta Galilia any ndrozy, le hoy Jesosy tamy mpianatsiny rey hozao: “Ty Anak'Olo ro hamea an-tana ty olo eo, ²³ sady ndrozy hamono Azy, sady ty andro faha telo ro hatsznga Ie.” Nanjary nalahelo tanteraky mpianatsy rey.

²⁴ Lafa niavy ta Kapernaomy any ndrozy, le nana amy i Petera eo lahilzhy ze namory ty haba antsasaky ty sekely rey sady nivola hozao: “Tsy mandoa ty haba antsasaky ty sekely va ty mpampianatsinareo?” ²⁵ Hoy ie hozao: “Eka.” Fa lafa nilitsy tan-tsano Petera ao, ke Jesosy aloha ro niresaky taminy ka le nanao hozao: “Ino ro eritseritsinao, Simona a? Mpanjaka an-tany eto rey, baka amin'ia ro andrambesan-drozy haba ndra haban'olo? Baka amy olo lakony rey va sa baka amy vahiny rey?”

²⁶ Lafa nivola Peteara hozao: “Baka amy vahiny rey,” Le hoasa Jesosy taminy hozao: “Le afaky amy ty fandoava olo lako rey zay. ²⁷ Fa mba tsy hampanontantsika ty mpamory haba, le mandehana amy ty riaky any, manoraha fitana ao, sady alao ty fia ze miakatsy velohany. Lafa voa vohanao ty vavany, l hahita sekely iha. Alao zay sady ameo mpamory haba rey ho Ahy noho ho ahy nao.”