¹ Niavy Fariseo noho Sadoseo rey sady nitsapa Azy ka le nangataky Azy mba hampitoro androzy fahaiza baka an-danitsy any.

² Fa Ie namaly sady nivola androzy hozao: “Lafa hariva, le hoasa nareo hozao: ‘Ho soa ty andro, fa mena ty lanitsy.’ ³ Lafa maray, le hoasa nareo hozao: ‘Ho soa ty andro, fa mena noho mandrombo ty lanitsy.’ Hainareo ty mahay ty endriky ty lanitsy, fa nareo tsy afaky mandika fahaiza ty fotoa rey. ⁴ Ty tariha raty noho mpaheriloha ro mila fahaiza, fa tsy hisy fahaiza hamea azy ankoatsy ty fahaiza i Jona.” Bakeo Jesosy niala androzy ka le nandeha.

⁵ Lafa niavy tamy sisiny eny mpianatsy rey, le halinon-drozy ty nanday mofo. ⁶ Hoy Jesosy tamin-drozy hozao: “mihomana sady miembena amy ty masirasira Fariseo noho Sadoseo rey.”

⁷ Nialy hevitsy mpianatsy rey ka le nivola hozao: “Laha tsika tsy nanday mofo zay.”

⁸ Jesosy nahay zay ka le nivola hozao: “Nareo kelikely finoa a, nanino nareo ro nialy hevitsy aminareo ka le mivola fa noho ty tsy nandaisanareo mofo zay? ⁹ Mbo tsy hainareo ndra tiaronareo va ty mofo limy ho ahy ty dima arivo, sady sobiky firy ro navorinareo? ¹⁰ Ndra mofo fito rey ho efatsy arivo, sady sobiky firy ro nalanareo? ¹¹ Manino ro tsy ahazoanareo fa tsy mikasiky ty mofo ro volaniko anareo? Mihomana sady miembena amy ty masirasira Fariseo noho Sadoseo rey.” ¹² Bakeo azon-drozy fa tsy hiemby amy ty masirasira ty mofo ro nivolaniny androzy, fa hiemby ty amy ty fampianara Fariseo noho Sadoseo rey.

¹³ Sady lafa niavy tamy ty faritsy mariny ty Kaisaria-filipo Jesosy any, le nanontany mpianatsiny rey Ie, manao hozao: “Anovy ty olo ho ia moa ty Anan'Olo?”

¹⁴ Hoasan-drozy hozao: “Ty ilany mivola fa Jaona mpanao batisa; ty ilany, Elia; sady hafa rey, Jeremia, ndra raiky amy mpianatsiny rey.”

¹⁵ Hoy Ie tamin-drozy hozao: “Fa nareo koa manao Ahy ho ia?”

¹⁶ Namaly, Simona Petera nanao hozao: “Iha ro Kristy, Ana Njanahary velo iny.”

¹⁷ Namaly Jesosy ka le nanao taminy hozao: “Sambatsy iha, Simona Bar-Jona a, fa tsy ty nofotsy noho lio ro nanoro zay taminao, fa ty Babako ze an-danitsy any. ¹⁸ Ambarakoaminao avao koa fa iha ro Petera, sady anabo lafiam-bato toy ro hamboarako ty egiliziko. Ty vavahdy ty lolo ro tsy haharesy zay. ¹⁹ Hameako anareo ty lakile ty fanjaka ty lanitsy. Ndra ino ndra ino fehezinao anabo ty tany eto le ho feheziko an-danitsy any, sady ndra ino ndra ino vahanao an-tany etoy le ho vaha an-danitsy any.” ²⁰ Bakeo Jesosy nibeko mpianatsy rey fa ndrozy ro tsy tokony hivola ndra amin'ia ndra amin'ia fa Ie ro Kristy.

²¹ my fotoa zay Jesosy nanomboky nivola mpianatsiny rey fa tsy maintsy ho a-; Jerosalema any Ie, hizaka fijalea lako an-tana ty olo-bey noho ty loha ty mpisoro eo sady mpanora-dalà rey, ho vonoe, noho hantsanga kndraiky amy ty andro fara telo. ²² Bakeo Petera nangalaky Azy ka le nivola mare Azy, manao hozao: “Ho lavitsy anao lahy zay, Tompo e; tsy hitsanga aminao mihintsy lahy zay.”

²³ Fa Jesosy nitoliky ka le nivola tamy i Petera hozao: “Mialà andabosiko any, Satana a! Iha ro mampeloky ho Ahy, noho iha tey midary rahan-Janahary rey, fa raha ty olo rey.”

²⁴ Bakeo Jesosy nivola tamy mpianatsiny rey hozao: “Laha misy ta-hanoriky Ahy, ke tsy maintsy mandá ty safany ie, handay ty hazofijaleany, sady manoriky Ahy. ²⁵ Fa ndra ia ndra ia ta-hamonjy ty ainy le hahatsobo azy, sady ndra ia ndra ia ro hahatsobo ty ainy noho ty amiko, le hahazo zay. ²⁶ Fa ino moa ro soa ho azo ty olo laha mahazo tany iaby toy nefa tsobo ty ainy? Ino ro amea ty olo ho takalo ty ainy? ²⁷ Fa ty Anak'Olo ro ho avy amy ty voninahitsy ty Babany miaraky amy anjeliny rey. Bekeo Ie hamaly soa ty olo kirai-draiky manahaky ze vitany. ²⁸ Ambarako aminareo marina, fa misy ilany aminareo ze mitsanga eto ro tsy hitsapa ty fahafateza ziaiky hahitan-drozy ty Anak'Olo niavy amy ty fanjakany.”