¹ Nikaihy Jesosy niaraky mpoanatsiny folo roa amby rey sady nanome androzy fahefa amy fanahy maloto rey, mba handroaha androzy, noho hanafaha karazan'arety noho karaza faharary iaby rey. ² Sady ndreto iaby ty anara apostoly folo roa amby rey. Ty celohany, Simona (ze kaihy avao koa hos Petera), sady Andreo rahalahiny; Jakoba anakilahy i Zebede, nohoJaona rahalahiny; ³ Filipo, noho Barteleomy; Tomasy, noho Matio azy mamory haba iny; Jakoba anakilahy i Alfeosy, sady Tadeosy; ⁴ Simona azy Zelota iny, sady Jodasy Iskariota, azy hamitaky Azy iny.

⁵ Nirahy i Jesosy rozy folo roa amby. Nanoro androzy Ie sady nivola hozao: “Ka mandeha amy ty toera ze hipetsaha ty Jentilisa any nareo, sady ka militsy amy ty tana Samaritana rey. ⁶ Fa mandehana koa amy aondry tsobo rey amy ty tariha Israely rey any; ⁷ ka lafa mandeha nareo, le manambara sady ambarao hozao: ‘Fa marine ty fiavia ty fanjaka ty lanitsy.’ ⁸ Afaho ty marary, atsangano ty maty, liovo boka rey, sady roaho demonia rey. Manahaky ty nahazoanareo amy zao avao, le manomeza avao koa amy zao avao. ⁹ Ka manday volamena, volafoty, ndra saba amy ty kitapon-dralanareo ao. ¹⁰ Ka manday kitapom-batsy amy ze andehananareo, ndra fisikina hafa, ndra kiraro, ndra tehy fa ty mpiasa ro maeva hahazo ty haniny. ¹¹ Ndra ino ndra ino tanà-vevata ndra tanà kelikely hiliranao, ilao ze maeva ao, sady mipetsaha zisiky-pialanareo ao. ¹² Laha vo militsy amy azy tsano iny ao nareo, le miarahaba ty ao. Laha maeva azy tsano iny, le engao ty fiadananareo ho avy ao. ¹³ Fa laha tsy maeva koa zay, le engao ty fiadananareo himpoly aminareo. ¹⁴ Ho ahy ze tsy mandramby anareo ndra mijanjy ty safanareo, le ahitsano ty lemboky amy ty tombonareo, lafa miala amy tsano ndra tanà-bevata zay nareo. ¹⁵ Volaniko aminareo marina, fa ho moramora vatany ty ahy ty fany i Sodoma noho Gomora amy ty andro fitsara noho tanà-bevata zay.

¹⁶ Ingo, handefa anareo manahaky ty aondry anivo ty alika-ly eo Zaho, ka le hahare manahaky ty menara sady tsy manan-tsiny manahaky ty pizon. ¹⁷ Miembena ty amy olo! Hanome anareo amy ty fila-hevitsy eo ndrozy, sady hamango anareo amy ty sinagogan-drozy ao. ¹⁸ Bakeo le handesy aloha ty governora noho ty mpanjaka nareo noho ty Amiko, mba ho vavolombelo ho androzy noho ho ahy Jentilisa. ¹⁹ Lafa manome anareo ndrozy, le ka mana ahiahy ty amy ty hoe manao akory ndra ino ndra ino ro ho volaninareo, fa hamea nareo amy lera io ze tokony ho volany. ²⁰ Fa tsy nareo ro hivola, fa ty Fanahy Babanareo iny ro hivola aminareo ao. ²¹ Ty rahalahy ro hanome ty rahalahy ho amy ty fahafatesa, sady ty raiky ro ty anany. Ty anaky ro hitsanga hanohitsy ty ray aman-dreniny ka le hahavy ty fahafatesan-drozy. ²² Ho hala ty olo-iaby nareo noho ty amy ty anarako. Fa ndra ia ndra ia miaritsy zisiky amy farany, le ho voasarombaky olo zay. ²³ Lafa manenjiky anareo amy tanà-bevata io ao ndrozy, le milaisa amy ty manaraky any, fa volaniko aminareo marina, fa tsy hahafampitsy tanà Israely rey aloha ty iavia ty Anak'Olo nareo.

²⁴ Ty mpianatsy ro tsy bevata noho ty mpampianatsiny, ndra ty mpanompo ho anabo noho ty tompony. ²⁵ Ampy ho ahy ty mpianatsy laha avy manahaky ty mpampianatsiny ie, sady ty mpanompo manahaky ty tompony. Laha nikaihin-drozy hoe Belzeboba ty tompo ty tsano, le ho raty lavitsy manahaky ty ino anara hikaihan-drozy rey ty hisam-pilongoa!

²⁶ Laha zay ka matahotsy androzy, fa tsy hisy toka ze tsy hiboaky, sady raha-tsy hita ze tsy ho hay. ²⁷ Ze volaniko anareo amy ty haiky ao, le volano amy ty andro mazava, sady ze bisibisiky renareo amy ty sofinareo, le ambarao anabo tafotsano eny. ²⁸ Ka matahotsy ahy ty ze mamono ty vata nefa tey afaky mamono ty fanahy. Fa koa, matahora ahy ze afaky mamotiky ty fanahy noho ty vata amy ty helo eny. ²⁹ Moa va tsy jala maliniky kelikely ro hamarota foly roe? Fa tsy mbo misy ndra raiky amin-drozy ka milavo amy ty tany laha tsy misy ty fahaiza ty Babanareo. ³⁰ Fa ndra ty volon-dohanareo ka voahisaky iaby. ³¹ Ka matahotsy. Manan-danja bevata vata noho ty foly lako nareo. ³² Laha zay ze iaby manenky Ahy anila ty olo eo, le ho enkeko avao koa anila ty Babako eo ze an-danitsy any. ³³ Fa ze mandà Ahy anila ty olo eo koa, le tsy henkeko avao koa anila ty Babako eo ze an-danitsy any.

³⁴ Ka mieritseritsy fa zaho ro avy handay fiadana an-tany eto. Tsy avy mba handay fiadana Zaho, fa meso. ³⁵ Fa niavy zaho nampisaraky ty anakilahiko amy ty babany, noho ty anak'ampela amy ty reniny, sady ty vinanto ampela amy ty rafozany ampela. ³⁶ Ze an-tokatsanony ao rey avao ro ho hanjary fahavalo ty olo. ³⁷ Ze tea ty babany ndra reniny mandilatsy Ahy vatany ro tsy maeva Ahy; sady ze tea ty anak'ampela mandilatsy Ahy ro tsy maeva Ahy. ³⁸ Ze tsy mandramby ty hazofijaleany ka le manoriky Ahy le tsy maeva Ahy. ³⁹ Ze mamonjy ty ainy ro hahatsobo ty ainy le hahatsobo zay. Fa ze mahatsobo ty ainy noho ty amiko le hahita zay.

⁴⁰ Ze mandramby anareo ro mandramby Ahy, sady mandramby azy naniraky ahy iny avao koa. ⁴¹ Ze mandramby ty olo to-resaky safe to-resaky ie ro hahazo ry valisoa ty to-resaky, sady ze mandramby ty olo-marina safe ty olo-marina ie ro hahazo ty valisoa ty olo-marina. ⁴² ndra ia ndra ia manome ty raiky amy maliniky bibiky reny, ndra le rano manitsy kopy raiky hinomy aza, safe ie mpianatsy, ro ambarako aminareo marina fa, tsy ho tsobo ty valisoany.”