¹ Sady lafa baka nampianatsy mpianatsiny folo roa amby rey Jesosy, le niala baka eo Ie hampianatsy noho hanambara amy ty tanan-drozy any.

² Sady lafa re i Jaona tan-gadra ao ty mikasiky asa i Kristy rey, ro nandefa hafatsy tamy ty alala mpianatsiny rey ie ³ ka le nivola Azy hozao: Iha va azy raiky ze ho avy iny, sa tokony hila hafatsy zahay?”

⁴ Jesosy namaly sady nivola androzy hozao: “Mandehana sady ambarao amy i Jaona ze hitanareo noho renareo.” ⁵ Mahazo fahifa jiky tsy, mandeha olo kombo rey, liovy boka rey, mahare ndraiky olo mareny rey, atsangan-ko ho veli olo maty rey, sady hanambara vaovao mahafaly ty mijaly rey. ⁶ Sambatsy ze tsy meloky noho ty amiko.”

⁷ Laha nandeha tamy ty lalany eny lahilahy rey, le nanomboky nivola ty mikasiky i Jaona tamy olo lako rey Jesosy hozao: “Hanenty ino ro niboahanareo ambaliky any - volotara tsiofy ty tsioky? ⁸ Nefa hanenty ino ro niboahanareo - lahilahy manao fisikina sarotsy vily? Ingo, ze manao fisikina sarotsy vily ro mipetsaky an-tsano mpanjaka ao. ⁹ Nefa hanenty ino ro niboahanareo - to-resaky? Eka, mivola aminareo Zaho, sady mandilatsy lavitsy noho ty to-resaky. ¹⁰ Ie azy ze voasoratsy hozao: ‘Henteo, maniraky ty hirahiko hoaloha ty tarehinareo Zaho, ze hanoma ty lalànareo aloha nareo.’

¹¹ Ambarako aminareo marina, fa amy ze natera-ty ampela rey ro tsy misy bevata mandilatsy noho Jaona mpanao Batisa. Nefa ty olo tsy manan-danja bibiky amy ty fanjaka ty lanitsy eo ro bevata noho ie. ¹² Nanomboky tamy ty andro i Jaoana mpanao Batisa ka le zisiky amy zao, le miaritsy amy ty heriloha ty fanjaka ty lanitsy, sady olo mahery loha rey ro mangalaky forisé azy. ¹³ Fa olo to-resaky iaby rey noho ty lalá ro fa nanao resaky to zisiky amy i Joda; ¹⁴ sady laha enkenareo ty hanenky zay, le Ie ro Elia azy ho avy iny. ¹⁵ Ze manan-tsofy ho andesi-mijanjy, engao ie hijanjy.

¹⁶ Amy ino ro tokony hampitoviziko tariha toy? Zay ro manahaky ty aja mihisa amy bazary eny, ze mipetsaky noho mifampitsotso ¹⁷ ka mivola hozao: ‘Nitsoky sody ho ahy nareo zahay, fa tsy nisindraky nareo. Nanao hira fisaona zahay, fa tsy nitany nareo.’ ¹⁸ Fa Jaona ro tsy niavy hihina mofo ndra hino divay, ka le hoasan-drozy hozao: ‘Mana demonia ie.’ ¹⁹ Ty Anak'Olo ro niavy hihina noho hino ka le hoasan-drozy hozao: ‘Henteo, lahilahy tea-hany noho mpino toaky ie, nama mpamory haba noho mpanota rey!’ Fa ty fahendrea ro voamarina tamy asany rey.”

²⁰ Bakeo Jesosy nanomboky nivola maré tanà ze nanovany ty halakoa ty asany mahatseriky rey, safe tsy nibebaky ndrozy. ²¹ “Loza ho ahy nareo, Korazina a! Loza ho ahy nareo, Betsaida a! Laha nanovy ta Tyra noho Sidona any asa mahatseriky ze nanovy taminareo teto rey, le fa ela ro nibebaky tamy ty siky fisaona noho lavenoky ndrozy. ²² Nefa ho lako vatany ty ahy ty Tyra noho Sidona amy ty andro ty fitsara mandilatsy noho ty ahy nareo. ²³ Nareo, Kapernaomy e, midiniky va nareo fa hasondrotsy an-danitsy any? Aha, handesy hijotso amy ty helo any nareo. Safe laha ta Sodoma any ro nanovy asa mahatseriky ze nanovy taminareo teto rey, le mbo ho tavela zay zisiky androany. ²⁴ Nefa mivola aminareo Zaho fa ho lako vatany ho ahy ty tany i Sodoma ty andro ty fitsara noho ty ho aminareo.”

²⁵ Tamy fotoa zay Jesosy nivola hozao: “Manompo Anao Zaho, Njanahary e, Tompo ty lanitsy noho ty tany, safe Iha ro namony raha rey tamy ty hendry noho ty mahay, sady nanambara tamy ze tsy mahay rey, manahaky aja kelikely rey. ²⁶ Eka, Njanahary e, safe zay ro nitea tamasonao eo.

²⁷ Ty raha iaby napetsaky tamiko le baka amy ty Babako; sady tsy misy mahay ty Anaky hafa-tsy ty Njanahary sady tsy misy mahay ty Njanahary hafa-tsy ty Anaky, noho ze nitingy ty Anaky hanambara Azy. ²⁸ monjea amiko atoy, nareo iaby ze miasa noho manday mavesatsy, le ameako fijanona nareo. ²⁹ Andeso ty ziogako sady mianara amiko, fa malemy fanahy noho mampijotso vata am-po Zaho, le hahita fijanona ho ahy ty fanahinareo nareo. ³⁰ Fa mora ty ziogako sady maiva ty entako.”