¹ Nilitsy tan-daka ao Jesosy, nanapaky, sady niavy tamy ty tanàny ao. ² Ingo, nisy lahilahy marary ty paralysisy nandramby tam-pandrea eo nandesin-drozy Taminy eo. Lafa nahita ty finoan-drozy, le hoy Jesosy tamy azy lahilahy marary ty paralesisa iny hozao: “Anaky, enga anie iha hifaly. Fa voenga ty helokinao.”

³ ngo, ty ilany tamy mpanora-dalà rey nanao am-po hozao: “Mivola raty lahilahy io.” ⁴ Hay i Jesosy ty eritseritsin-drozy sady nivola hozao: “Nanino nareo ro mieritseri-draty am-ponareo? ⁵ Fa ia ro moramora vatany ro mivola azy hozao: ‘Voaenga ty helokinao,’ sa ty mivola hozao: ‘mitsangana ka le mandehana.’? ⁶ Fa mba ho hainareo fa ty anak'olo ro mana fahefa hanenga heloky anabo ty tany eto...” hoy Ie tamy azy marary ty paralisisa iny hozao: “Mitsangana, ondrono ty fandreanao, sady mandehana an-tsanonao any.” ⁷ Bakeo nitsanga lahilahy iny sady nana an-tsanony any. ⁸ Lafa nahita zay ty olo lako, le tseriky ndrozy sady nanompo an-Janahary, ze nanome fahefa manahaky zay ho ahy ty olo.

⁹ Sady laha niala bakeo Jesosy, le nahita lahilahy nikaihy hoe Matio, ze nipetsaky tamy ty lay ty famoria-haba eo. Hoy Ie taminy hozao: “Manoriha Ahy.” Nitsanga ie sady nanoriky Azy. ¹⁰ Sady laha nipetsaky hihina tan-tsano Jesosy ao, ingo, mpamory haba noho solo mpanota lako avy sady niaraky-nihina tamy Jesosy noho mpianatsiny rey.

¹¹ Lafa nahita zay fariseho rey, le nivola tamy mpianatsiny ndrozy hozao: “Nanino ty mpampianatsinareo ro miara-mihina amy ty mpamory ba noho ty olo mpanota?”

¹² Lafw nahare zay Jesosy, le hoy Ie hozao: “Ty olo matanjaky ara-bata ro tsy mila mpitaha, fa ze marary rey avao. ¹³ Tokony mandeha mianatsy nareo ty dika ty hozao: ‘Famalozam-po ro iriko fa tsy soro.’ Fa avy Zaho, tsy hikaiky marina rey hibebaky, fa mpanota rey.”

¹⁴ Bakeo namonjy androzy mpianatsy i Jaona rey ka le nivola hozao: “Nanino zahay noho fariseho rey ro mifaly hany san'andro, fa mpianatsinao rey koa tsy mba mifaly?”

¹⁵ Hoy Jesosy tamin-drozy hozao: “Mety halahelo va longo ty mpampiakatsy rey, laha mbo miaraky aminin-drozy eo ty mpampiakatsy? Fa ho avy ty andro hangala ty mpampiakatsy amin-drozy eo, le amy ze androzy vo hifaly hany.

¹⁶ Tsy misy olo manampea salotsy tonta amy ty tapa-tsiky vaovao, fa ty tampy hanataky ty siky, sady hisy tsiatsy raty lavitsy. ¹⁷ Tsy misy olo manisy divay vaovao any sihoa holitsy tonta. Lafa manao zay ndrozy, le ho jiatsy ty sihoa holitsy, ho raraky ty divay sady ho toro ty sihoa holitsy. Fa koa, manisy divay vaovao anay sihoa holitsy vaovao ao ndrozy, sady ho voahajary ndrozy.”

¹⁸ Laha mbo nivola raha rey tamin-drozy Jesosy, le ingo, nisy manam-pahefa raiky niavy ka le nandohaliky taminy eo. Nivola ie hozao: “Maty amy zao ty anak'ampelako, fa miavia sady apetsaho aminy eo ty tananao, le ho velo ie.” ¹⁹ Bakeo nitsanga Jesosy sady nanoriky azy, le nanao manahaky zay koa mpianatsiny rey. ²⁰ Ingo, nisy ampela ze fa nandeha lio tanay ty folo roa amby tao, nana afara i Jesosy ao sady nikasiky ty sisy ty salotsiny.

²¹ Fa hoy ie tamy ty vatany hozao: “Laha mahavoakasiky ty sikiny avao zaho, le ho afaky.”

²² Fa nitoliky Jesosy ka le nahita azy, le nivola hozao: “Anak'ampela, mahereza; ty finoanao ro nahafaky anao.” Sady afaky azy ampela iny nanomboky tamy lera io.

²³ Lafa avy tamy ty tsano azy manam-pahefa Jesosy, le nahita mpitsioky sody rey noho olo lako rey nikorakoraky mare rey Ie. ²⁴ Le hoy Ie hozao: “Mandehana, fa tey maty azy ajam-pela iny, fa miroro ie.” Fa nihehy Azy tamy ty fikizaha androzy. ²⁵ Lafa niboaky tambaliky ty olo lako any, le nilitsy tan'efitsy ao Ie sady nandramby azy tamy tt tana, sady nitsanga azy aja-ampela iny. ²⁶ Niparitaky nameno ty faritsy iqby ty vaovao mikasiky zay.

²⁷ Sady laha teo jesosy, le nisy jiky roe lahy nanoriky Azy. Tsy nijano nikaiky androzy sady nivola hozao: “Mamalo fo aminay, ana i Davida!” ²⁸ Lafa avy tan-tsano Jesosy ao, le namonjy Androzy lahilahy jiky. Hoy Jesosy tamin-drozy hozao: “Mino va nareo fa mahay manao zay Zaho?” Le hoy ndrozy taminy hozao: “Eka, Tompo.”

²⁹ Bakeo nikasihy i Jesosy ty mason-drozy sady nivola hozao: “Ho tanteraky aminareo manahaky ty finoanareo lahy zay,” ³⁰ sady nahita ty mason-drozy. Bakeo Jesosy nibeko mare androzy sady nivola hozao: “Engao mba tsy hisy olo hahay mikasiky zao.” ³¹ Fa nandeha roe lahy rey ka le nampiparitaky ty vaovao mikasiky zay nameno faritsy zay.

³² Sady laha nandeha roe lahy rey, le ingo, nisy lahilahy moa nipetsaha ty demonia nandesy tamy i Jesosy eo. ³³ Sady lafa naboaky azy demonia iny, le nivola azy lahilahy moa iny. Tseriky ty olo lako ka le nivola hozao: “Tsy mbo fahita indraikytamy Israely zao!”

³⁴ Fa hoy fariseo rey hozao: “Tamy ty fanapaha demonia rey, ro nampiboahany demonia rey.”

³⁵ Nandeha nitety tanà-bevata rey noho vohitsy iaby rey Jesosy. Nanohy nampianatsy tamy synagovan-drozy rey any Ie, nanambara ty filazantsoa ty fanjaka, sady nanafaky karazan'arety iaby noho karaza faharary iaby rey. ³⁶ Lafa nahita olo lako rey Ie, le nana fangoraham-po tamy rey safe niahiahy noho kivy ndrozy. Manahaky ty aondry tsy misy mpiemby ndrozy. ³⁷ Le hoy ie tamy mpianatsiny rey hozao: “Lako ty vokatsy, fa mpiasa rey ro tsy ampy. ³⁸ Laha zay mivavaha malaky amy ty Tompo ty vokatsy, mba handefasany mpiasa amy ty vokatsiny.”