¹ Тогава о небесно царство ка опреличингиол деше девиценде, колато лиле пе светилникя тай иклиле те посрещнинен е жамутрес. ² А лендар панч сине неразумна тай панч разумна. ³ Соскето о неразумна, като лиле пе светилникя, на лиле масло песа. ⁴ Но о разумна, заедно пе светилникиенца, лиле масло ан пе съдовиенде. ⁵ Тай жи кай бавинелас пес о жамутро, додремисало саворенге тай засуте. ⁶ А машкар и рат шунде пища: Аке о жамутро авел! Иклон те посрещнинен лес!

⁷ Тогава саворе колка девицес ухтиниле тай приготвинде пе светилникя. ⁸ А о неразумна пенде е разумноненге: Ден амен тумаре маслостар; соскето амаре светилникя мерен.

⁹ А о разумна в отговор пенде: Ако на ресел аменге да, туменге да; по - лачес жан ко продавачия тай кинен туменге. ¹⁰ Тай жи кай он жан те кинен, о жамутро ало; тай о готова дине леса ко бияв, тай о вудар панлило.

¹¹ После але колкада девицес тай пенде: Девла, Девла, путер аменге!

¹² А Ов в отговор пенгяс: Истина пенав туменге, нана пенджарав тумен. ¹³ Тай чука, бдинен; соскето на жанен ни о диес, ни о сахати, колесте о Човешко Чаво ка авел.

¹⁴ Соскето си сарто като мануш, ко жаиба анди чужбина, викинел пере слуги тай предел ленге по имане. ¹⁵ Иекес диняс панч талантя, аверес дуи, аверес иек, секас според и способност лескири; тай цидингяс. ¹⁶ Веднага кавка, кате получингяс о панч талантя, гело тай търгувингяс ленца, тай спечелингяс още панч талантя. ¹⁷ Също кавка да, ковато получингяс о дуи, спечелингяс още дуи. ¹⁸ А кавка, кате получингяс о иек, гело хранляс анди пув тай гарагяс о парес пе господариескере. ¹⁹ Като накло дълго време авел о господари калке слугенгоро тай мангел ленге сметка. ²⁰ Тай като приближисало кавка, ковато получингяс о панч талантя, ангяс още панч талантя тай пенгяс: Господарю, ту динян ман панч талантя; аке, спечелингиом още панч.

²¹ О господари пенгяс леске: Шукар, лачо тай верно слугас! Ко хари улан верно, ко бут ка поставинав тут; де анди радост те господариеске.

²² Приближисало кавка да, ковато получингяс о дуи талантя, тай пенгяс: Господарю, ту динян ман дуи талантя; аке, спечелингиом още дуи талантя.

²³ О господари пенгяс леске: Шукар, лачо тай верно слугас! Ко хари улан верно, ко бут ка поставинав тут; де анди радост те господариеске.

²⁴ Тогава приближисало ковка, ковато получингяс иек таланти, тай пенгяс: Господарю ме жанавас тут, кай синян строго мануш; жънинес, кате на сеингян, гай кидес, кате на пръскингян; ²⁵ тай като даранилом, гелом тай гарагиом о таланти анди пув; аке, иси тут торо.

²⁶ А о господари лескоро в отговор пенгяс леске: Канило тай лениво слугас! Жанесас, кай жънинав, кате на сеингиом, тай кидав, кате на пръскингиом; ²⁷ ту требеше те внесинес ме парес ко банкерия тай като аломас манге, ка лавас моро лихваса. ²⁸ Далкеске, лен лестар о таланти тай ден лес колкеске, кате иси лес деш талантя. ²⁹ Соскето всекас, кас иси, ка дел пес, тай лес ка овел в изобилие; а калкестар, кате нанай лес, лестар ка лел пес давка да, со иси лес. ³⁰ А калке безполезноне слугас чивен анди външно тъмнина; оте ка овел роиба тай скърцане данденца.

³¹ А като ка авел о Човешко Чаво Пе славаса, тай саворе свята ангела Леса, тогава ка бешел Пе славноне престолесте. ³² Тай ка киден пес англал Лесте саворе народовя; тай ка отлъчинел лен иек аврестар, сарто о овчари отлъчинел е овцен таро бузня; ³³ тай ка поставинел е овцен Пе десноне ригатар, а е бузниен тари лево риг. ³⁴ Тогава о Цари ка пенел колкенге, колато си Лескере десноне ригатар: Елан, туме благословиме таро Отца Ми, наслединен о тагарипе, приготвиме туменге таро създаване е светоскоро. ³⁵ Соскето бокалилом, тай парваргиен Ман, ожаднингиом, тай напоингиен Ман; странники улом, тай прибирингиен Ман; ³⁶ нанго улом, тай уряген Ман; насвало улом, тай посетингиен Ман; анди тъмница улом, тай споходингиен Ман.

³⁷ Тогава о праведна в отговор ка пенен Леске: Девла, кана диклям Тут бокало, тай парваргям Тут; или жадно, тай напоингям Тут? ³⁸ Тай кана диклям Тут странники, тай принирингям Тут; или нанго, тай урягям Тут? ³⁹ Тай кана диклям Тут насвало или анди тъмница, тай споходингям Тут?

⁴⁰ А о Цари в отговор ка пенел ленге: Истина пенав туменге: Понеже кергиен давка иекеске калкендар таро наи - скромна Мере прала, Манге кергиен лес. ⁴¹ Тогава ка пенел калкенгеда, колато си Лескере лявоне ригатар: Жан Мандар, туме проклета, анди вечно яг, приготвиме е бенгеске тай лескере ангеленге. ⁴² Соскето бокалилом, тай на парваргиен Ман; ожаднингиом, тай нана напоингиен Ман; ⁴³ странники улом, тай на прибирингиен Ман; нанго улом, тай на урявгиен Ман; насвало тай анди тъмница улом, тай на посетингиен Ман.

⁴⁴ Тогава онда в отговор ка пенен: Девла, кана диклям Тут бокало, или жадно, или странники, или нанго, или насвало, или анди тъмница, тай на послужингям Туке?

⁴⁵ Тогава в отговор ка пенел ленге: Истина пенав туменге: Понеже на кергиен давка ни иекеске калкендар таро наи - скромна, Манге да на кергиен лес. ⁴⁶ Тай калка ка жан андо вечно наказание, а о праведна - андо вечно животос.