¹ Reinu di seu i parsi ku storia di des badjudas ku toma se kandia e sai pa kontra ku noivu. ² Sinku delis i tulus i sinku djirus. ³ Kil tulus e leba son kandia ma e ka leba azeiti pa buri, ⁴ ma kil djiru e leba azeiti di buri djuntu ku kandia. ⁵ Noivu tarda, elis tudu e djungu e durmi. ⁶ Ma meia noti e obi gritu: Ala noivu na bin, bo bai kontra ku el.

⁷ Badjudas lanta e djunta se kandia. ⁸ Ki tulu fala ki djirus: Bo danu un bokadu di bo azeiti pabia no kandia paga.

⁹ Ma kil djirus ruspundi e fala: di nin manera i kana tchiganu, bo bai pa kilis ku ta bindi bo kumpra pa bos. ¹⁰ Tementi e bai kumpra, noivu tchiga, i kilis ku sta ba pruntu e yentra ku el pa festa di kasamenti porta fitcha.

¹¹ Dipus des kil utrus badjudas tchiga e fala: Sinhor, sinhor yabrinu porta.

¹² Ma i ruspundi i fala: Na bardadi nka kunsi bos. ¹³ Pa kila bo bisia, bo ka sibi nin dia nin ora.

¹⁴ Pabia i na sedu suma un omi ku pertu bai pa utru tera, i tchoma si servus i pui elis pa kontrola si bens. ¹⁵ I da un son sinku talentus, utru dus, i da inda utru un telentu, kada kunformu si kapasidadi, i bai bias. ¹⁶ Kil ku dadu sinku talentu i nogosia djanan i i otcha mas sinku talentus. ¹⁷ Na mesmu manera, kil ku risibi dus talentus i fasi mas dus. ¹⁸ Ma kil ku risibi un talentu i bai, i koba tchon i sukundi dinheru di si patron la. ¹⁹ Dipus di manga di tempu, ki sinhor ribapa serta konta ku elis. ²⁰ Servu ku risibi sinku talentus i tisi mas sinku talentus i fala: Sinhor bu dan ba sinku talentus. Ali sinku talentus kun otcha.

²¹ Si sinhor falal: Muitu bon servus bon i fiel, Bu sedu fiel na puku, na pu riba kusas garandi. Yentra pa alegria di bu Sinhor.

²² Kil ku risibi dus talentus tchiga i fala: Sinhor bu dan dus talentu. Ali mas dus talentu.

²³ Si sinhor falal: Muitu bon servu bon i fiel. Bu sedu fiel na puku kusas, na pu riba di kusas garandi. Yentra pa alegria bu sinhor.

²⁴ Kil servu ku risibi un talentu fala: Sinhor n'sibi kuma abo bu rigurosu, bu ta kebra nunde ku bu ka simia, bu ta djunta nunde ku bu ka spadja. ²⁵ N'medi, n'bai sukundi bu talentu na tchon. Ali ke ki di bo.

²⁶ Ma si sinhor ruspundil i fala: Servu mau i amonton, bu sibi ba kuma n'ta kebra nunde kun ka simia ta djunta nunde kun ka spadja. ²⁷ Pa kila bu dibi di n'terga ba nha dinheru pa bankerus, ora kunriba n'ta risibil ku jurus ²⁸ Pa kila, bo tomal si talentu bo da kil ku tene des talentu. ²⁹ Pabia tudu kil ku tene i na buridu, pa i tene tchiu. Ma kil ku ka tene nada, te kil ki tene i tomadu el. ³⁰ Bo bota fora servu ku ka bali, na sukuru. NNunde ku ten tchur ku nheme dintis.

³¹ Ora ku fidju di omi na bin ku si gloria ku tudu andjus ku el, I na sinta na Si tronu di gloria. ³² Si dianti i na djunta djintis di tudu nasons, i na sipara djintis un di utrus, suma ku pastor ta sipara karnel ku bodis. ³³ I na pui karnel na si mon direita, ma bodi na si mon skerda. ³⁴ Rei na fala kilis ku sta na si mon direita: Bo bin abos benditu di nha Pape, Bo yarda reinu ku purparadu pa bos, des ku mundu fundadu. ³⁵ Pabia n'tene fomi bo dan di kume, sedi bu dan di bibi, nsedu ba ospri bu gasidjantan, ³⁶ n'staba nun bo bistin, n'staba duenti bo kuida di mi, n'staba na kalabus bo bin visitan.

³⁷ Djustus na ruspundi, e fala: Sinhor Kal tempu ku no odjau ku fomi no dau di kume.. O ku sedi no dau dau di bibi. ³⁸ Kal tempu ku no odjau ospri no gasidjantau., O nun no bistiu? ³⁹ Kal dia ku no odjau duenti o na kalabus no visitau..

⁴⁰ Rei ruspundi: Na bardadi na konta bos tudu ku bo fasi pa e nha ermons ami ku bo fasi. ⁴¹ I nafala kilis ku sta na si mon skerda: Bo afasta di mi. Abos malditus, pa fugu di iternu ku purparadu pa diabu ku si andjus, ⁴² Pabia n'tene ba fomi bo ka dan di kume, n'tene bo ka dan di bibi, ⁴³ Kontran ospri bo ka gasidjantan, N'staba nun bo ka bistin, n'staba duenti ku na kalabus bo ka visitan.

⁴⁴ E na ruspundi e fala: Sinhor kal dia ku no odjau ku fomi, ku sedi, o ospri, o nun, o duenti o na kalabus, no ka sirbiu.

⁴⁵ I na ruspundi elis; na bardadi na konta bos ke ku bo ka fasi e nha pikininus i ami ku bo ka fasi. ⁴⁶ Esis na bai pa kastigu iternu, ma djustus pa vida iternu.