¹ Jesus papia ku kil manga di djintis ku si disipulus, ² i fala elis: Skribas ku fariseus e ta sinta na kadeira di Moises. ³ Ma ke ku e ordena bos, bo fasil, bo guardal. Ma ka bo imita se atus, pabia e ta fala ma e kata kumpri ⁴ E ta mara kargu pisadu i difisil di karga, e ta pul na ombrus di omis. Ma elis e kana balansa nin dedu pa kargal. ⁵ E ta fasi tudu kusas pa djintis odja elis, e ta omenta fita di testa e ta largusi franjas di se kamisa. ⁶ E gosta di pumerus lugaris na festas i purmerus kadeiras na sinagogas, ⁷ pa fala elis mantenhas spesial na prasa pa povu tcoma elis Mestris. ⁸ Ma bo ka dibi di tchomadu Rabi, pabia pa bos i ten son un Mestri, abos tudu i ermons. ⁹ Ka bo tcoma nin omi di tera no pape, pabia abos bo tene son un pape, El i ta na seu. ¹⁰ Nin ka bo tchomadu mestri, pabia bo ten son un Mestri, ki Kristu. ¹¹ Kil ku mas garandi na bo metadi i na sedu bo servu. ¹² Kin ku izalta si kabesa i na umiliadu, kin ku umilia si kabesa i na izaltadu.

¹³ Ai di bos, skribas ku fariseus ku findjiduris. Bo fitcha reinu di seu pa omis. Pabia bo kana yentra nin bo ka disa kili ku dibi di yentra. ¹⁴ Ai di bos skribas fariseus, ku findjiduris. Bo ta splora kasas di viuva tementi bo na ronka ku orason kumpridu. Bo na risibi maior kondenason. ¹⁵ Ai di bos skribas ku fariseus ku findjiduris. Bo ta rodia mar ku tera pa otcha konvertidus. Ora ki konverti bo ta fasil fidju di nfernu dus bias mas pior di ke bos.

¹⁶ Ai di bos ku ta gia segus, ku bo ta fala: Kin ku jura pa lugar sagradu, i ka nada, ma kin ku jura pa uru di lugar sagradu i dibi di kumpri juramentu. ¹⁷ Segus tulus. Kal ki maior, uru o lugar sagradu ke ku signifika uru. ¹⁸ Kin ku jura pa altar, i ka nada. Ma kin ku jura pa oferta ku sta riba di altar i obrigadu kumpri e juramentu. ¹⁹ Segu kal ki maior, oferta o altar ku konsagra oferta.. ²⁰ Pa kila kin ku jura pa altar, i jura pa el ku tudu kusa ku sta riba del. ²¹ Kin ku jura pa lugar sagradu, i jura pa kin ku mora la. ²² Kin ku jura pa seu, i jura pa tronu di Deus i pa kin ku sinta la.

²³ Ai di bos skribas fariseu ku findjiduris. Pabia bo ta dizimu di ortaln, di endru, ku kuminhu, ma bo ta disa kusas mas mportanti di lei suma djustisa, miserikordia ku fe. Ma bo ka dibi di fasi e kusas e disa ki utrus. ²⁴ Giaduris di segus, bo ta filtra un muskitu bo nguli un kamelu.

²⁵ Ai di bos, skribas fariseus ku findjiduris. Bo ta limpa kopu ku pratu, ma pa dentru sta xeiu di furtu ku nveja. ²⁶ Fariseus segus. Bo limpa purmeru dentru di kopuku pratu pa fora tambi fika limpu.

²⁷ Ai di bos skribas fariseus ku findjiduris. Pabia bo parsi koba ku kaiadu, ku pa fora i ta parsi bonitu, ma pa dentru i sta xeiu di os di mortu ku susudadi. ²⁸ Na mesmu manera tambi abos bo ta parsi algin djustu dianti di omis, ma dentru sta xeiu di findjimentu ku pekadu.

²⁹ Ai di bos skribas fariseus ku findjiduris. Pabia bo ta kumpu kasas na koba di prufetas bo ta fadja koba di djustus. ³⁰ Bo ta fala si no staba na tempu di o papes, no kana partisipa ba ku elis na darma di prufetas. ³¹ Bo ta tustumunha kontra bos propiku sedu fidjus di kilis ku mata prufetas. ³² Bo kompleta ke ku bo pape kumsa. ³³ Serpenti, rasa di kobra, kuma ku bo na kapli di juis di nfernu.. ³⁴ Na manda pa bos prufetas, omis djirus, ku skribas. Alguns delis bo na mata elis i bo prinda elis na krus, algun bo na suta elis na bo sinagogas, bo na pirsigi elis di sidadi pa sidadi, ³⁵ pa i pudi kai riba di bos sangi di djustuskudarmadu na tchon, des di Abel, djustu, ate di Zakarias, fidju di Barakias, kil ku bo mata entri lugar sagradu ku altar. ³⁶ Na konta bos bardadi tudu e kusas na bin riba de djorson.

³⁷ Jerusalen, Jerusalen, ku ta mata prufetas, i ta fertcha pedra pa kilis ku mandadu. Kantu bias ntenta djunta bu fidjus suma ku galinha ta djunta si fidjus bas di si asas, ma bu ka misti. ³⁸ Bo kasas na dingi. ³⁹ Na konta bos bo kana odjan mas te ora ke fala benditu kil ku na bin na nomi di Sinhor.