¹ Yesu wa ngidile mu wato, wa zaugile ha sambwa diko dia muta, wa yile mu dimbo diawo. ² Hene ejile mu mu batela muthu mu moshi wa gikata, wa swama ha gitanda. Ha gumona gukwikila gwawo, Yesu wa lezele muthu wa gikata egi: " Munami, zula gikhesa; masumu aye a lolulama." ³ Alongogi ako a shigo adi zwelele ene nu ene egi: " Muthu yogu udi mu vweza." ⁴ Yesu wa jiyile ngindu jiawo wa zwelele egi: " Mukunda nu ikhi mudi mu yindula ndaga jia bola mu mitshima yenu? ⁵ Ikhi idi ya kola ha gu zwela egi: " Masumu aye a lolulama" nga ndo " Zuga wenda?" ⁶ Uvi, mukunda mu jiye egi Muna Muthu udi nu giyega haha ha mavu ha gu lolula masumu,..." hene mwene a leza gikata egi: " Zuga, zula gitanda giaye, nda monjiaye." ⁷ Gu nyima muthu mwene wa zugile wa vutugile mu inzo yenji. ⁸ Tangwa gimvuga gia monele nganyi, a yitugile mwa vula enji a vutudile lukumu gwa Nzambi wa hanele giyega gia nganyi gwa athu. ⁹ Tangwa Yesu a khalele mu balega ga ginano nu hama hene wa monele muthu mu moshi jina dienji Matayo, wadi tumbiga mu inzo yinyi a nu futisa gitadi. Wa mu lezele egi: " Ngu hate." Wa zugile enji wa mu hatele. ¹⁰ Gu nyima Yesu wa yile mudi tumbiga monzo ha gudia; afutisi a yitadi a vula nu athu ako a lujingu lwa bola ejile mudia nenji nu alongogi hama ha moshi. ¹¹ Tangwa afalisaye a monele nganyi, a lezele alongogi egi: " Mukunda nu ikhi Longi wenu adi mudia nu afutisi a yitadi nu athu a lujingu lwa bola hama ha moshi?" ¹² Tangwa Yesu a vile ndaga yene, wa zwelele egi: " Athu wanyi adi nu mwila wa bonga a nu khala go nu funu ya munganga, khuta wanyi adi nu misongo. ¹³ Hene ndenu mu jiyise disongidila gia ndaga yiyi egi: " Nga nu tshigina khenda uvi gi menga ndo" mukunda eme nge jile go ha gu tamega athu a bonga ha gu balula mitshima, uvi athu wanyi a masumu." ¹⁴ Gu nyima alongogi a Yowani ejile ha gu mu hula egi: " Mukunda nu ikhi etwe nu afalisaye tudi nu gikalulu gia gu tuna gudia, uvi alongogi aye ashi mu kita nganyi go? ¹⁵ Yesu wa a lezele egi: " Athu wanyi a tamegeya gu khinji ya makwela a jiya gu khala nu khenda tangwa muthu yonu wa kwedi udi mu katshi diawo? Uvi ilumbu mba iza tangwa muthu yonu wa kwedi mba wa katudiya mu katshi diawo, mba adi mu tuna gudia. ¹⁶ Gushi nu muthu mu moshi go wa nu bamba gitemba gia mulele wa pha holu dia mulele wa kulu, mukunda gitemba gia mulele wa pha mba gi mu nana mulele wa kulu, nganyi gu tauga mba gu mu koma nji. ¹⁷ Muthu gwa nu futula go matombe a pha mu katshi dia mabungu a kulu, mukunda gula wa kita nganyi, mabungu a feto tauga, matombe a yandiga gudi zogela ebuna mabungu ene a feto bola. Uvi, matombe a bonga a nu mbiya mu katshi dia mabungu a pha, nganyi ima yiyi iyadi i mu khala ya gu tanina mwa bonga." ¹⁸ Tangwa Yesu a khalele mua leza ndaga jiene, fumu mu moshi wa masuta wa phusanele phene-phene nu mwene wa fugamele gu twama dienji. Wa zwelele egi: " Munami wa mukhetu wa katuga gufwa iza u mu hage mago ha mutwe mukunda a jinge." ¹⁹ Yesu wa zugile enji wa mu hatele nu alongogi. ²⁰ Gu nyima mukhetu wa khalele nu misongo ya gu zoga menga katuga mvula kumi nu jiyadi we jile gu kunda dia Yesu hene a kwatele songi ya mulele yenji; ²¹ mukunda wa zwelele egi: "Gula nga kwata milele yenji ngu mu beluga." ²² Yesu wa balumugile gwa mukhetu mwene wa mu lezele egi: " Munami, zula gikhesa. Lukwikilu lwaye lwa gu belula." Kaka mu tangwa diene mukhetu mwene wa belugile. ²³ Tangwa Yesu a kumile mu inzo ya Fumu wa masuta, wa monele athu a khalele mu bula mihembo enji nu gimvuga gia khalele mu haga milolo ya vula; ²⁴ mwene wa zwelele egi: " Katugenu haha mukunda mona mukhetu gwa file go, uvi udi gu tulo." Hene a yandigile gu mu lela. ²⁵ Tangwa gimvuga gia athu gia zoleye honze, wa ngidile gu sugu enji wa mu kwatele gu koko; mu mbala imoshi mona mukhetu wa zugile. ²⁶ Sango ya ndaga yene ya phanzanele mu membo akima. ²⁷ Tangwa Yesu a katugile hama hene, ifwa meso iyadi a yandigile gu mu hata. A yandigile gu kabuga mu ndinga ya ngolo egi: " Tu vile khenda, Muna Davidi!" ²⁸ Tangwa Yesu a ngidile mu inzo, ifwa meso yene ejile phene-phene nenji. Yesu wa a hudile egi: " Keti mudi mu kwikila egi nga jiya gu kita nganyi? A vutudile egi: " Eya Fumu." ²⁹ Hene Yesu a kwatele meso awo enji wa zwelele egi: " Ndaga yene i salame mu lukwikilu lwenu." ³⁰ Hene meso awo a kangugile. Gu nyima Yesu wa a kebesele mu ngolo egi: " Ata muthu mu moshi gwa jiya go ndaga yene." ³¹ Uvi athu ene mu yadi a yile mu phanza sango yene mu membo akima. ³² Tangwa athu wawa muyadi a khalele mu vutuga gawo, athu ejile mu batela Yesu gatabu ga moshi ga khalele nu pheve ya bola. ³³ Tangwa pheve yene ya bola ya zoleye, gatabu ga yandigile gu zwela. Gimvuga gia athu gia yitugile nu gu zwela egi: " Ndaga ya ngagi khanji i monega go gu Izrayele!" ³⁴ Uvi afalisaye a khalele mu zwela egi: " Idi mu ngolo jia fumu wa pheve jia bola adi mu kaya pheve jia bola." ³⁵ Yesu wa khalele muya mu mbanza nu mu membo akima. Wa khalele mu longa mu jinzo jiawo jia isambu mu jiyisa sango jia bonga jia gifumu, nu gu belula misongo ikima nu ifu ya mwila ya phila ikima. ³⁶ Tangwa a monele gimvuga gia athu, wa a vile khenda mukunda a khalele mu niongamana nu mu mona phashi. A khalele ole mameme a konda Muthu wa nu a tala. ³⁷ Wa lezele alongogi egi: " Ima ya gu katula mu ilanga idi ya vula uvi athu a gisalo adi gabiyo. ³⁸ Hene mu bondila Fumu wa gisalo gia gu katula ima mu gilanga ha gu mi tumila athu a gisalo a gu katula ima mu gilanga."